EXODUS 11 - Bawm Common Language Bible Version

Mosi Nih Fa tîr Thihnâk Thu A Phuang

¹ Churawhchun, LALPA nih Mosi sinah, “Aigupta lalchem leh a mi le tlûnah rêpnâk dang pakhat ka tlungtir nawlh awt, chu tikah a nan suah na lai. Chu tikah hinah mi hi nar ving nan si lai rawh.

² Tuah Israel mipi tla chu an zâwlbâwm sinah ngûn tla leh tangka tla deih na ding hen simh na,” a ti.

³ LALPA nih Aigupta mi tla chu Israel tla a sunhsaktir na. Mipi leh lalchem rianṭuantu tla nih Mosi chu mi rokual tak si ngelchel ding hen an ruat.

⁴ Churawhchun, Mosi nih lalchem sinah, “LALPA nih, Zân lâi chirah Aigupta ram ka hawng ṭawl lai le,

⁵ Aigupta ram ah mi fapa tîr lalchem fapa a ro thâwntu ding mi thawk hen fâng rialtu sal nunau fapa tiang an thi lai. Ran lakah khawm ring masa chem mi an thi lai.

⁶ Aigupta ram pumpi ah ṭahnâk a um lai le, chu hâwi chu a lânah zeiliau khawm ah a um dah loh, um khawm a um nawlh lai lo rawh.

⁷ Israel tla leh an ran tla chu ui khawm nih a auh na lai loh rawh. Chu tikah Kei LALPA nih, Israel leh Aigupta mi ka thliar na zia nan theih lai,’ ” a ti.

⁸ Mosi nih, “Na rianṭuantu tla zawng ka sinah an hawng lai le, ka mâika ah an kûn lai, ka mi tla zawzawng put hen kal ving ding hen an ka ngiar lai. Chu tikah ka kal lai rawh,” a ti. Churawhchun, thinthawk bû hen Mosi nih lalchem chu a kaltâk rawh.

⁹ LALPA nih Mosi sinah, “Aigupta ram ah thilchê ka ti vima khonâk ding hen lalchem nih na thu a êl vima lai,” a ti.

¹⁰ Mosi leh Aron nih hi bang thilchê zawzawng hi lalchem mâika ah an ti. Sikhawmsele, lalchem thinlung chu a khungtir ruangah Israel tla chu a ram ah mi a suaktir na lo.