DEUTERONOMY 8 - Bawm Common Language Bible Version

Ting Ding Mi Ram Ṭha

¹ “Tusûn ni ah dân ka nan pêk na mi tla hi zumhkâi tak hen zûl ule, nan thlâktu tla sinah LALPA nih a tiamh na mi ram nan luah tikah nungdam hen tam tak nan zan khonâk ding hen.

² LALPA nan Pathian nih ramkaro pal hen lam lât tak kum sâwmli kar a nan rui na mi kha theihkumza u, a thupêk nan ngâi ma ngâilo, zei hâwi hen nan thinlung a um ti a theih kho ding hen nan lakah harsatnâk tlungtir hen a nan nik na mi kha.

³ Sungvâng tak hen a nan siam na le, churawhchun manna ei ding a nan pêk na, an thlâk natu tla nih a lânah an ei dahlo mi buh chu. Hi hi mi nih sang lak cho ah a ngauh lo hen, sikhawmsele thil zeizawng LALPA nih a sim mi lakah a ngauh ding hen a nan sîntir na mi asi.

⁴ Hi kum sâwmli sungah nan nipuan tla a ṭet lo, nan kê tla khawm a phing lo.

⁵ LALPA nan Pathian nih pa nih a fa tla nun a simh hâwi hen repnâk hen lungfîm an suah na asi ti theih u.

⁶ Churuangah LALPA nih thu an pêk na mi hâwi hen ti u, a dân hâwi hen um ule, amah chu ṭih u.

⁷ LALPA nan Pathian nih ram ṭha tak tiva leh tinungva tla, tual tang thawk hen tiva kuam lei leh tlâng tla ah tî a suak mi tla;

⁸ chu ram ah chun wheat leh barley fâng tla, grep leh theipi tla, pomegranate leh oliv tla leh khuaitizû suaknâk ram ah an kalpi na.

⁹ Chu ram ah chun nan sung a vâng hen zeikhawm nan samphâng lai lo rawh. Lungpi sung tla ah chun thîr a um le, tlâng tla lakah chun dâr chawh ding a um.

¹⁰ Ei ding phung nan duh mi zawng nan nei lai, LALPA nan Pathian nih ram ṭha a nan pêk na mi ruangah a sinah lâwmthu nan sim lai rawh.

LALPA Philhnâk Ruangah Nunsimhnâk

¹¹ “LALPA nan Pathian chu philh lo ding hen theih set u; tusûn ah ka nan pêk na mi a dân tla hi pakhat khawm relh lo hen nan zûl ding asi.

¹² Ei ding nan duh phung zawzawng nei hen umnâk ding hen in ṭha tla

¹³ nan sak hen ranrual leh nan dawrâ, nan ngûn leh tangka, nan neih dang zawzawng a hawng pung tikah,

¹⁴ Aigupta ram ah sal nan si mi ruang an suah natu LALPA nan Pathian chu philh hen nanna zûm sual lai, theih set u.

¹⁵ Ramkaro ṭihnungkâi kâu tak, rûl tûrnei leh tlâng cha-âi umnâk ram pal hen a nan rui na asi. Chu ram châr leh tî umlonâkah chun lungpi thawk hen nan rangah tî a suaktir.

¹⁶ Ramkaro ah an thlâk natu tla nih an ei dahlo mi buh manna an pêk na. Nanmah niknâk ding hen harsatnâk an pêk na le, a dawnghnâk ah thil ṭha hen mal an sâwm na ding hen.

¹⁷ Churawhchun, nanmah thiltikhonâk leh chaknâk hen neih-le-siah hen um ah nanna ruat lonâk ding hen.

¹⁸ Nei ding hen thiltikhonâk a nan pêk natu chu LALPA nan Pathian asi ti theihkumza u. A nan thlâk natu sinah thu a tiamh mi lakah tusûn ni tiang hen zumh a kâi ruangah hi hi a ti mi asi.

¹⁹ LALPA nan Pathian chu philh rîlmâl lah u, pathian dang tla sawnh ding leh an rianṭuan piak hen hertâk lah u. Nan ti asi chun nan vei ngelchel lai ti tusûn ni hin kan simh na asi.

²⁰ LALPA thu nan ngâilo chun, nan kalnâk ram ah phun tla a veih na ding mi hâwi hen nan vei lai.