DEUTERONOMY 6 - Bawm Common Language Bible Version

Thupêk Rokual

¹ “Hi bang dân tla zawzawng hi LALPA nan Pathian nih a nan sîntir na ding hen thu hawng ka pêk mi chu asi. Chu ram ah nan va lût hen nan luah tikah zûl u.

² Chu ram ah nan um kar zawzawng chu nanmah leh nan thlâk tla nih LALPA nan Pathian chu zah hen a dân ka nan pêk na mi zawzawng hi nan zûl ding asi, chu tikah chu ram ah chun sâwt tak nan um kho lai.

³ Israel mi tla, ngâi ule, zûl u! Chun nan sul-le-lam a tluang lai le, phun chak tak nan hawng si lai le, neihnâk leh ram ṭha ah chun nan um lai, LALPA hawng kan thlâktu Pathian nih a tiamh mi hâwi hen.

⁴ “Israel tla, hi hi theih u! LALPA, LALPA amah cho chu kan Pathian asi.

⁵ LALPA nan Pathian chu nan thinlung zawzawng hen nan thlarau zawzawng hen nan chaknâk zawzawng hen dâwt u.

⁶ Tusûn ni ah ka nan pêk na mi thupêk tla hi philh rîlmâl lah u.

⁷ Nan fa le tla chu sîntir na u. In ah nan um liau khawm umlo liau khawm, nanna dîn liau leh rian nan ṭuan liau khawm ah sîntir lemang na u.

⁸ Nan bân ah khih ule, nan chal ah a khimh u, theih nawlh lemang ding hen.

⁹ Nan in kawtkâ tung leh nan kulh kawtkâ ah rîn u.

Ê-aw Ngâilo Ruangah Nunsimhnâk

¹⁰ “An thlâk natu Abraham, Isak leh Jakob sinah LALPA nan Pathian nih thu a tiamh na mi hâwi hen ram leh khuapi ṭha tak nan sak lo mi a nan pêk na lai.

¹¹ In tla chu nanmah siah silo mi thil ṭha hen a khat zat lai, nan chawh lo mi tikhurchawh tla a um lai, nan phun lo mi grep leh oliv tla a um lai. Chu ram ah LALPA nih an lûtpi na tikah chun nan duh mi zawng nan ei lai.

¹² LALPA nih Aigupta ram ah sal ah nan um mi an suah na mi kha philh lah ule, theihkumza u.

¹³ LALPA nan Pathian chu ṭih ule, amah cho chu sawnh u, amah min cho hen thutiamnâk nei u.

¹⁴ Pathian dang sawnh lah ule, nan kiangkam ah um mi tla pathian zeikhawm sawnh lah u.

¹⁵ Pathian dang tla nan sawnh chun LALPA thinthawknâk chu nan lakah mei hâwi hen a hawng tlung lai le, an veih dep na lai, nan sinah um mi LALPA nan Pathian chu helnâk sâithiam lo mi asi ruangah.

¹⁶ “Masah ah nan ti mi hâwi hen LALPA nan Pathian niksak dêl lah u.

¹⁷ Dân a nan pêk na mi nan zûl mi zawzawng kha fiang tak hen theih u.

¹⁸ LALPA thusim a dik leh a ṭha mi chu ti ule, nan sul-le-lam a tluang lai. LALPA nih an thlak natu sinah a tiamh mi ram ṭha chu nan luah kho lai le,

¹⁹ thu a tiamh rawh hâwi hen nan mêlma tla chu a nar phin na lai.

²⁰ “Hi nûnthâi ah nan fa tla nih, ‘Zei rangah LALPA kan Pathian nih hi bang dân tla hi zûl ding thu hawng kan pêk?’ ti hen an deih na lai.

²¹ Churawhchun, nannih nih, Aigupta lalchem sal ah kan um le, LALPA nih a thiltikhonâk rokual tak hen ruang hawng kan suah.

²² Kan mit ngelchel nih thilchê a ti mi tla, Aigupta mi tla leh an lalchem leh a rianṭuantu tla zawzawng tlûnah thil ṭihnungkâi a ti mi tla kan muh.

²³ Hinah hawng kan kalpi ding hen Aigupta ah mi chu hawng kan suah le, hawng kan thlâktu tla sinah ti ding hen a tiamh rawh hâwi hen hi ram hi hawng kan pêk rawh.

²⁴ Churawhchun, LALPA kan Pathian nih hi bang dân zawzawng hi zûl ding hen leh amah chu ṭih ding hen thu hawng kan pêk rawh asi. Kan zûl asi chun kan phun tla hawng kan vêng kumza lai le, sul-le-lam tluang tak hen hawng kan kil lai.

²⁵ LALPA nih thu hawng kan pêk mi zawzawng zumhkâi tak hen kan zûl chun kan tlûnah a lâwm lai,’ nan ti ding asi.