DEUTERONOMY 5 - Bawm Common Language Bible Version

Thupêk Parâ

¹ Mosi nih Israel mi tla a pumh na le, an sinah, “Israel mi tla, tusûn ni ah dân kan pêk na mi zawzawng tla hi ngâi u. A sîn ule, nan zûl ding mi chu theihthiam u.

² LALPA kan Pathian nih chun Sinai tlângah

³ kan pa le rang cho ah thudântuk a pêk lo le, tusûn ni tiang ah nung dam hen um mi tla rangah khawm pêk asi.

⁴ Chu tlângah chun LALPA nih mâitawnh hen mei thawk hen nan sinah thu a sim.

⁵ Chu liauah chun tlângah kal ding hen mei nan ṭih ruangah LALPA nih thu a sim mi zawzawng chu keimah nih an simh na ding hen LALPA leh nanmah karah ka dîr asi. “LALPA nih,

⁶ ‘Aigupta ram ah sal ah nan um mi an suah natu LALPA nan Pathian kasi.

⁷ “ ‘Keimah lo chu zei pathian khawm sawnh lah u.

⁸ “ ‘Zei lem khawm, vân ah mi mawh tual tlûnah mi mawh tual tangah tî lakah mi mawh nan rangah nan siam ding asi lo.

⁹ Zei lem khawm sawnh hen mâimûk lah u, Kei, LALPA nan Pathian kasi ruangah, hel hi ka sâithiam lo. Hawng ka huatu tla chu an thlâk tla san thum leh san li tiang ka rêp na tâwn asi.

¹⁰ Sikhawmsele hawng ka dâwttu leh ka dân zâwttu tla chu san sâng tiang an lakah ka dâwtnâk ka langh asi.

¹¹ “ ‘Sual leikâng rang ding ah ka min mang lah u, Kei, LALPA nan Pathian âuzawng ka min diklo tak hen mangtu tla rêptu kasi.

¹² “ ‘Dinhni chu ulh ule, thenhlimh tak hen mang u, LALPA nan Pathian nih thu ka nan pêk na mi hâwitê hen.

¹³ Nan rianṭuannâk ding hen ni ruk nan nei,

¹⁴ sikhawmsele a ni sarih ni chu ka sinah ap hen dinhnâk ni chu asi. Chu ni ah chun âukhawm nih rian an ṭuan ding asi lo, nan fa tla, nan sal tla, nan ran tla, ramdang minung nan ram ah mi tla khawm nih an ṭuan ding asi lo. Nanmah hâwi hen nan sal tla khawm anna dîn ding asi.

¹⁵ Nannih khawm Aigupta ram ah sal nan si. Kei, LALPA nan Pathian nih ka thiltikhonâk rokual leh ka chaknâk hen kan suah na mi nan si ti theihkumza u. Churuang tak chun Dinhni ulh ding hen thu ka nan pêk na asi.

¹⁶ “ ‘Kei, LALPA nan Pathian nih thu kan pêk na mi hâwi hen nan nu leh nan pa tla zah na ule, thil zeizawng tluang tak hen a kal lai le, kan pêk na mi ram ah sâwt tak hen nan um kho lai.

¹⁷ “ ‘Minung thah lah.

¹⁸ “ ‘Ṭang dang pawmtâk lah.

¹⁹ “ ‘Fîr lah.

²⁰ “ ‘Diklo tak hen âukhawm phiar lah.

²¹ “ ‘Mi nupi, a in, a ram, a sal, a ranrual, a sanatung mawh a neih rerêng ngarh lah, a ti.

²² “Tlâng sâng takah nanna pûm liauah LALPA nih a nan pêk na mi dân tla chu hi bang hi asi. Mei leh sûm sah tak thawk hen hâu fâk tak hen a hawng sim le, hi bang thupêk lo chu zei dang khawm a sim lo. Churawhchun, lungtlêp panih lakah a rîn le, ka sinah a hawng ka pêk rawh.

Mi Zapi Tla Nih An Ṭih

²³ “Tlâng chu mei hen a khat dil liauah, a mûinâk thawk hen hâu nan theih le, a nan ruitu tla leh nan phun lakah a lû dauh tla ka sinah an hawng le,

²⁴ ‘Mei thawk hen thu a sim mi kan theih liauah LALPA kan Pathian nih a rokualnâk hawng kan muhtir! Tu chun Pathian nih minung a sawnh khawmsele a thi lêm lo ti kan theih.

²⁵ Sikhawmsele zei rangah hawng kan veihtu ding mei ṭihnungkâi lakah thih kan tum nawlh awt? LALPA kan Pathian thusim kan theih chun kan thi ngelchel ding hen kan ruat.

²⁶ Pathian nung nih mei thawk hen thu a sim mi theihtu minung a dam mi âu me um?

²⁷ Mosi, va kîr le, LALPA kan Pathian nih a sim mi zeizawng va ngâi. Chun hawng kîr le, na sinah a sim mi zawng hawng kan simh bâk. Kan ngâi lai le, kan zûl lai,’ an ti.

²⁸ “Hi hi LALPA nih a theih rawh chun ka sinah, ‘Hi zapi tla thusim hi ka theih asi, an dik asi.

²⁹ Hi hâwi hen an dawn kumza hen, keimah lâwng an ka zah kumza hen ka thupêk tla an zûl kumza chun zeizawng ah an sul-le-lam a tluang lai le, an thlâk tla khawm an um kumza lai.

³⁰ Kal le an puanin leiah kîr ding hen simh na.

³¹ Sikhawmsele nang Mosi lam chu ka sinah um rih le, ka dân zawzawng leh ka thupêk tla ka nan pêk lai. Zapi tla chu sîntir na le, ka pêk na mi ram ah chun an zûl ding hen, a ti.

³² “Israel mi tla, LALPA nan Pathian nih thu an pêk na mi thil zeizawng nan ti mi chu theih u. A dân pêk pakhat khawm zûl lo hen um lah u.

³³ A ektê hen zûl ule, churawhchun thil zeizawng ah nan sul-le-lam a tluang lai le, nan va luah ding mi ram ah chun nan um kumza lai.