DEUTERONOMY 30 - Bawm Common Language Bible Version

Malsâwmnâk Leh Remnawlhnâk Ding Hen Thil Herh Tla

¹ “Malsâwmnâk leh siatbarhnâk lakah tuah duh thîmnâk kan pêk na. Hi bang thil zawzawng hi nan sinah a hawng tlung hen LALPA nan Pathian nih an rek na nâk mi phun tla nâwngah nan va um tikah duh thîmnâk ka nan pêk na mi hi theihkumza u.

² Nanmah leh nan thlâk tla LALPA leiah nanna hawi hen nan thinlung zawzawng hen tusûn ah ka nan pêk na mi a thupêk tla hi nan zûl chun,

³ LALPA nan Pathian nih nan lakah khua a ruat lai. A nan rek na nâk phun lakah mi chu an kîrpi nawlh na lai le, sul-le-lam tluang tak hen an siam nawlh na lai.

⁴ A lât chemnâk kâwlkil ah an rek na khawmsele, LALPA nan Pathian nih a nan pumh na hen an kîrpi nawlh na lai,

⁵ churawhchun a lânah an thlâk natu umnâk ram chu nan luah nawlh kho ding hen. A lânah an thlâk natu ngâk hen tam dauh leh sûl-le-lam tluang dauh hen an siam na lai.

⁶ LALPA nan Pathian nih nanmah leh nan thlâk tla rangah ê-aw ngâinâk thinlung a nan pêk na lai le, churawhchun nan thinlung zawzawng hen amah nan dâwt lai le, chu ram ah chun nan um kumza lai.

⁷ Nan lakah chubang siatbarhnâk zawzawng chu an hua natu leh an nehsawh natu nan mêlma tlûnah a tlung lai le,

⁸ tusûn ni ah ka nan pêk na mi a thupêk zawzawng tla hi nan zûl hen nan kil lai rawh.

⁹ Nan thilti zeizawng lakah LALPA nih nan sul-le-lam a tluangtir lai le; fa tam tak leh ranrual tam tak nan nei lai le, nan phâisen nih fâng tam tak a suah lai. A nan thlâk natu tla sul-le-lam tluangtir a duh mi hâwi hen, nan sul-le-lam tluangtir ding thungâi a duh lai,

¹⁰ sikhawmsele hi a sîntirnâk lasuibu ah rîn mi dân zawzawng nan zûl hen nan kil ding asi. Nan thinlung zawzawng hen amah leikângah nanna hawi ding asi.

¹¹ “Tusûn ni ah thupêk ka nan pêk na mi hi nan ti kho lo rê ding hen nan rangah har tuktarâi mi asi lo.

¹² Tlûn leiah vân ah mi khawm asi lêm lo. Âu me a va kâi hen, kan theih khonâk ding leh kan zûl ding hen hawng kan lâk piak kho lai?’ tiding mi khawm chu asi lo.

¹³ Tisumsumriat varâl lei ving ah mi khawm asi lêm lo. Kan theih khonâk ding leh kan zûl ding hen, ‘Âunih tisumsumriat tan hen hawng kan lâk piak kho lai?’ tiding mi khawm asi lêm lo.

¹⁴ Asi lo zia chu, hinah nan sinah a um ko asi. Nan theih hen nan sim kho. Churuangah tuah zûl u.

¹⁵ “Tusûn ni hin thil ṭha leh thil ṭhalo, nungnâk leh thihnâk thîm ding hen ka nan pêk na.

¹⁶ LALPA nan Pathian thupêk tusûn ah ka nan pêk na mi hi nan zûl chun, nan dâwt hen a thu nan ngâi hen a dân zawzawng nan kil chun nan sul-le-lam a tluang lai le, minung tam tak mi phun nan si lai. Nan va luah ding mi ram ah LALPA nan Pathian nih mal an sâwm na lai.

¹⁷ Sikhawmsele, ê-aw ngâilo hen a thu nan êl chun, pathian dang tla sawnh hen nan pial chun

¹⁸ nan vei ver lai, tuah hinah ka nan theihtir na asi. Jordan Va kanh hen nan va luah ding mi ram ah tam sâwt nan um lai lo.

¹⁹ Tuhin thihnâk leh nungnâk, Pathian malsâwmnâk leh siatbarh thîm ding hen ka nan pêk na, nan thîm mi lakah theihpitu ding hen tual leh vân ka auh asi. Nungnâk chu thîm u.

²⁰ LALPA nan Pathian chu dâwt ule, a lakah ê-aw ngâi hen zumhkâi hen um u, chu tikah an thlâk natu Abraham, Isak leh Jakob tla sinah pêk ding hen thu a tiamh mi ram ah nanmah leh nan thlâk tla hen sâwt tak nan um lai,” a ti.