DEUTERONOMY 29 - Bawm Common Language Bible Version

Moab Ram Ah Israel Tla Sinah LALPA Thudântuk

¹ Hi bang tla hi Moab ram ah LALPA nih Mosi sinah Israel tla rangah thudântuk siam piak na ding hen thu a pêk mi chu asi; hi bang zawzawng tla hi Sinai Tlângah LALPA thudântuk sap singsuan mi asi.

² Mosi nih Israel mi tla zawzawng chu tlangah a pumh na le, an sinah, “LALPA nih Aigupta lalchem leh a rianṭuantu tla leh a ram pumpi ah thil a ti mi tla chu nanmah ngelchel nih nan muh asi.

³ Râi ṭihnungkâi, thilchê ti tla leh thilchê rokual a ti mi tla chu nan muh asi.

⁴ Sikhawmsele tusûn ni tiang hen nan thil theih lakah theihthiamnâk zeikhawm a nan pêk na lo rih.

⁵ Kum sâwmli kar chu ramkaro ah LALPA nih an kalpi na le, nan nipuan leh nan pheikawk khawm a ṭet lêm lo.

⁶ Ei ding sang leh uain leh zû din ding khawm nan nei lo le, sikhawmsele LALPA nih amah chu nan Pathian asi ti an theihtir na ding hen nan herh mi zawzawng chu a nan pêk na.

⁷ Hi mun hi kan hawng tleng le, Hesbon ah mi Sihon lalchem leh Basan ah mi Og lalchem chu hawng kan do ding hen an hawng suak rawh. Sikhawmsele annih tla chu kan neh na le,

⁸ an ram chu kan lâk le, Reuben phun leh Gad phun leh Manaseh phun khingkhuai tla sinah kan ṭhenh zâr na.

⁹ Hi bang thudântuk siam mi tla hi zûl ule, nan thilti zeizawng ah nanna dingchang lai.

¹⁰ “Tusûn ni ah LALPA nan Pathian mâika ah nan dîr le, nan ektê hen a nan rui natu leh rianṭuantu tla, nan mipa tla,

¹¹ nunau tla leh nan fa tla leh nan sinah ramdang minung um mi tla, nan thing tuktu leh tî thantu tla hen.

¹² Tusûn ah hinah hin LALPA nih a nan tiamh na mi thudântuk lakah chun lût ding nan si rawh le, ngelchel hen nan pawm ding asi,

¹³ LALPA nih a mi tla nan si mi leh nan Pathian sinâk chu nan sinah leh a nan thlâk natu Abraham, Isak leh Jakob sinah thu a tiamh mi hâwi hen tuah a birhtir khonâk ding hen.

¹⁴ LALPA nih ngelchel hen thudântuk a siam mi hi nanmah tla sinah cho asi lo.

¹⁵ Hinah tusûn ni ah a mâika ah dîrtu kan ektê rang leh kan thlâk tla a hawng suak lo rih mi tla rang khawm ah asi.

¹⁶ “Aigupta ram ah kan nung dân leh mi ram tla kan hawng pal liauah kan umdân zei hâwi asi ti nan theih asi.

¹⁷ An milem thing, lung, tangkasa leh ngûn hen an siam mi fihnungkâi tla nan muh asi.

¹⁸ Hinah mipa, nunau, dâwngsungkhur mawh phun mawh tusûn ni ah dîrtu tla zawzawng nih LALPA nan Pathian chu kaltâk hen phun dang pathian tla nan sawnh lebang lai theih set u. Chubang tla chu thil khâ leh tûr keuh hen a ram a thlâk mi asi sual lebang lai.

¹⁹ Tusûn ni ah hi bang hâwi khung tak hen ngiarnâk tla hi theihthiam lo hen mah duh thu hen um mi tla khawm nih ka rangah ṭhatnâk asi titu âukhawm an um lo ti theih u. Mi sia khawm mi ṭha khawm, chu nih chun bang ver hen an râwk na lai.

²⁰ Chubang hâwi minung chu LALPA nih a ngaihdam awtlo, ngaihdam ding ngangâk hen a thinthawknâk chu mei hâwi hen a lakah a alh lai le, LALPA nih a veih dep lânlo chu siatnâk hi lasuibu lakah rîn zawzawng hi a tlûnah a tlung lai.

²¹ LALPA nih Israel phun zawzawng theihtirnâk ding hen thudântuk lakah mi siatbarhnâk zawzawng, hi LALPA sîntirnâk bu ah rîn mi tla hâwi hen siatnâk a tlûnah a tlung lai.

²² “Hi nûnthâi ah nan thlâk tla leh ramdang mi tla nih nan ram ah siatnâk LALPA nih a hawng tlungtir mi tla chu ram lât tak a thawk hen a hawng muh lai.

²³ Phâisen tla chu a karo hen a um lai le, kât leh chitê nih a tuam lai; zeikhawm chîng asi lai lo le, belh tiang a kho lai lo. Nan khuapi tla chu Sodom leh Gomorah, Admah leh Zeboim a thinthawk fâk liauah LALPA nih a râwk mi hâwi asi lai.

²⁴ Churawhchun, laikulh pumpi nih, ‘Zei zia me si LALPA nih hi hâwi hen an ram ah a ti le? Hi hâwi thinthawknâk hi a san zei me si?’ an ti lai.

²⁵ ‘Aigupta ram thawk hen a suakpi na liauah an thlâk natu Pathian sinah thudântuk an siam mi LALPA mi tla nih an buar ruangah ti hen an sâng lai.

²⁶ A lânah an sawnh dahlo mi pathian dang an sawnh le, chu pathian tla chu LALPA nih sawnh ding hen a khap na mi asi.

²⁷ Churuangchun LALPA chu a mi tla tlûnah a thin a thawk le, an ram ah siatnâk hi lasuibu lakah rîn mi zawzawng a tlungtir mi asi.

²⁸ LALPA chu thungâi a thin a thawk le, a thinthawknâk rokual tak hen an ram ah mi chu a ṭhial zek na le, ramdang ah a siah ving na, chunahchun tu liauah an um rawh.’

²⁹ “LALPA kan Pathian nih a thuptê hen a kil mi thil zeimawh a um; sikhawmsele a dân chu a hawng langh le, kanmah leh kan thlâk tla nih kan zûl kumza ding mi chu asi.