DEUTERONOMY 27 - Bawm Common Language Bible Version

Pathian Dân Lungtlêp Lakah Rîn Mi Tla

¹ Churawhchun, Mosi leh Israel ruitu tla nih zapi tla sinah, “Tusûn ni ah sîntirnâk ka nan pêk na mi zawng hi zûl u.

² LALPA nan Pathian nih a nan pêk na mi ram ah lût ding hen Jordan Va nan kanh ni ah chun lung lian pipi tla phun hen lung chulhnâk nan chulh lai le,

³ chu lakah chun dân zawzawng leh sîntirnâk tla rîn u. LALPA nan thlâktu Pathian nih a nan tiamh na mi ram ṭha leh, neihnâk ram nan va lût tikah chun,

⁴ Jordan varâl lei nan tleng rawh chun, tusûn ni ah thu ka nan sîntir na hâwi hen Ebal tlângah lung tla chu phun ule, lung chulhnâk chulh u.

⁵ Chun, chunahchun lung hen mâichâm siam ule, a ruakhâu thîr mang lah u;

⁶ LALPA nan Pathian rangah mâichâm nan siam mi rerêng chu phel lo mi lung hen siam ding asi ruangah. Chunah chun duah ding mi bâwlnâk chu nan ap lai le,

⁷ chunah chun nanna bâwl lai le, kawmhnâk thil ap chu ei ule, LALPA nan Pathian mâika ah lâwm tak hen um u.

⁸ Chu lung chulh mi tla lakah chun Pathian dân thu tla fiang tak hen rîn u,” an ti.

⁹ Churawhchun, Mosi leh Levi chi bâwlpu tla nih Israel zapi tla sinah, “Israel mi tla, hawng a hawi ule, ka thu hi ngâi u. Tusûn ni ah hin LALPA nan Pathian mi tla nan si rawh;

¹⁰ churuangah a thu ngâi ule, tusûn ni ah a dân tla ka nan pêk na mi zawzawng kil u,” an ti.

Ê-aw Ngâilo Ruangah Siatbarh

¹¹ Churawhchun, Mosi nih Israel mi tla sinah,

¹² “Jordan Va nan kanh nûnah mi zapi tla tlûnah malsâwmnâk an sim tikah chun hi bang phun tla hi Gerizim tlângah an dîr ding asi: Simeon, Levi, Juda, Isakar, Josef leh Benjamin tla hi.

¹³ Siatbarh liau khawm ah hi bang phun tla hi Ebal Tlângah an dîr lai: Reuben, Gad, Aser, Zebulun, Dan leh Naphtali tla hi.

¹⁴ Hi bang thu tla hi Levi phun nih hâu fâk tak hen a sim lai:

¹⁵ “Pathian siat chu lung hen mawh, thing hen mawh thîr hen mawh milem siam hen a thup hen sâwnhtu tlûnah tlung seh; LALPA nih milem sawnh chu a hua asi,’ an ti lai. “Mi zapi zawzawng nih ‘Amen!’ ti hen an sâng lai.

¹⁶ “A nu leh pa siarlotu tlûnah Pathian siat um seh,’ an ti lai. “Mi zapi zawzawng nih ‘Amen!’ ti hen an sâng lai.

¹⁷ “A unau hen an nirî ṭhialtu chu Pathian siat a tlûnah um seh,’ an ti lai. “Mi zapi zawzawng nih ‘Amen!’ ti hen an sâng lai.

¹⁸ “ ‘Mitchâw, a mahlo leikângah kalpitu chu Pathian siat a tlûnah um seh,’ an ti lai. “Mi zapi zawzawng nih ‘Amen!’ ti hen an sâng lai.

¹⁹ “ ‘An diknâk lakah ramdang minung, numei, ngâkṭah tla thlawrhthlâu chu Pathian siat an tlûnah um seh,’ an ti lai. “Mi zapi zawzawng nih ‘Amen!’ ti hen an sâng lai.

²⁰ “ ‘A pa nupi tla lakah a zei mi tal pung hen a pa rangah mualphohtu chu Pathian siat a tlûnah um seh,’ an ti lai. “Mî zapi zawzawng tla nih, ‘Amen!’ ti hen an sâng lai.

²¹ “ ‘Ran pungtu zawzawng chu Pathian siat a tlûnah um seh,’ an ti lai. “Mi zapi zawzawng nih ‘Amen!’ ti hen an sâng lai.

²² “ ‘A farnu tak mawh, a pa ei fanu mawh, a nu ei fanu pungtu chu Pathian siat a tlûnah um seh,’ an ti lai. “Mi zapi zawzawng nih ‘Amen!’ ti hen an sâng lai.

²³ “ ‘A pi (nupi nu) pungtu chu Pathian siat a tlûnah um seh,’ an ti lai. “Mi zapi zawzawng nih ‘Amen!’ ti hen an sâng lai.

²⁴ “ ‘A thup hen mi thahtu chu a tlûnah Pathian siat um seh,’ an ti lai. “Mi zapi zawzawng nih ‘Amen!’ ti hen an sâng lai.

²⁵ “ ‘Mi sualnâk nei lo mi thah ding hen tangka lâktu tlûnah Pathian siat um seh,’ an ti lai. “Mi zapi zawzawng nih ‘Amen!’ ti hen an sâng lai.

²⁶ “ ‘Pathian dân zawzawng leh sîntirnâk zûl duhlotu tlûnah Pathian siat um seh,’ an ti lai. “Mi zapi zawzawng nih ‘Amen!’ ti hen an sâng lai.