DEUTERONOMY 26 - Bawm Common Language Bible Version

Fâng Thar Ap Mi

¹ “LALPA nan Pathian nih an pêk na mi ram nan luah hen chunah nan va um tikah chun,

² mikip nih nan thlâi thar kawk lakah Pathian rangah voh masa chem mi siah ule, Pathian sawnhnâk mun pakhat ah nan kalpi ding asi.

³ Chu liauah bâwlpu si mi sinah va kal ule, a sinah, ‘Hawng kan pêk ding hen hawng kan thlâktu tla sinah a tiamh mi ram ah tuah ka lût rawh ti LALPA ka Pathian sinah ka theihtir asi,’ nan ti ding asi.

⁴ “Bâwlpu nih nan kawk chu nan sinah mi a lâk lai le, LALPA nan Pathian mâichâm mâika ah a siah lai.

⁵ Churawhchun, LALPA mâika ah hi bang thu tla hi nan sim ding asi: ‘Hawng ka thlâktu chu Aramean mi mivâi asi le, ramdang minung dawrnâk nei lo mi asi, um ding hen a dâwngsung tla Aigupta ram ah kalpitu asi. An kal liauah chun minung tâwmtê an si, sikhawmsele, phun rokual leh thiltikho tak an hawng si rawh.

⁶ Aigupta mi tla nih chun sal hâwi hen rian fâk tak hawng kan ṭuantir.

⁷ Churawhchun, ṭangpi deih hen LALPA hawng kan thlâktu Pathian chu kan auh. Anih nih chun kan tuar mi tla, kanna hamh zia tla, kan vânduai zia tla a theih hen hawng kan muh rawh.

⁸ A chaknâk leh a thiltikhonâk rokual hen Aigupta ram ah mi hawng kan suah rawh. Thilchê ti leh thilchê tla, thil ṭihnungkâi tla a tlungtir.

⁹ Hi ram ningno tak leh neih-le-siahnâk ram ah hin hawng kan put hen hawng kan pêk rawh.

¹⁰ Churuang chun thlâi thar hawng ka pêk mi vo masa chem tuah LALPA sinah ka hawng pêk asi,’ na ti ding asi. “Churawhchun, kawk chu LALPA mâika ah toh ule, chunah chun sawnh u.

¹¹ LALPA nan Pathian nih nanmah leh nan dâwngsungkhur tla rangah thil ṭha a nan pêk na mi tla lakah a lâwm u; Levi leh ramdang minung nan sinah um mi tla khawm nih an ulhpi na bâk seh.

¹² “A kum thumnâk ah nan thil chîng mi lakah nan tawng mi parâ lû ah pakhat chu Levi tla, ramdang mi, mi ngâkṭah tla, numei tla sinah nan pêk lai le, chu tikah mi zapi nih an thil herh ei ding mi an tawng ver lai.

¹³ Hi bang hi nan ti tikah LALPA sinah, ‘Hi parâ lû ah pakhat thenhlimh zeikhawm ka in ah ka mâk lo; Levi tla, ramdang minung tla leh numei tla rangah nangmah nih thu na ka pêk hâwi hen ka pêk na. Parâ lû ah pakhat leikângah zeikhawm philh leh zûl lo ka nei lo.

¹⁴ Ka ulh liau khawm ah chu lakah mi zeikhawm ka ei lo; dân ah thianglo hen ka um khawm ah ka in ah chu lakah mi zeikhawm ka lâk lo; mi thi rangah thil ap ah chu lakah mi zeikhawm ka pêk lo. LALPA, na thu ka ngâi le; parâ lû ah pakhat thu ah na thupêk hâwi hen ka zûl ver.

¹⁵ Vân ah na umnâk thenhlimh thawk hen na mi Israel tla rangah hawng zauh na le, malsâwm na rawh; hawng kan thlâktu tla rangah thu na tiamh mi hâwi hen ram ningno leh neihnâk na hawng kan pêk mi hi malsâwm rawh,’ nan ti ding asi.

LALPA Mi Tla

¹⁶ “Tusûn ni ah hin LALPA nan Pathian nih a dân zawzawng zûl ding hen thu a nan pêk na; churuangah zumhkâi tak hen nan thinlung zawzawng hen zûl u.

¹⁷ Tusûn ni ah hin LALPA chu nan Pathian asi tih nan theihtir le; a thu ngâi ding hen, a dân tla zûl ding hen leh a thupêk zawzawng ti ding hen thu nan tiamh rawh asi.

¹⁸ Tusûn ni ah hin LALPA nih amah mi tak ah thu a nan tiamh na mi hâwi hen a nan pawm na rawh; a dân zawzawng zûl ding hen thu a nan pêk na asi.

¹⁹ A siam mi phun dang tla ngâk hen rokual dauh hen an siam na lai le, a min chu zah hen nan sawr lai. Thu a tiamh hâwi hen amah mi tak nan si lai rawh,” a ti.