DEUTERONOMY 23 - Bawm Common Language Bible Version

LALPA Mi Tla Lakah Mi Thleinâk

¹ “Mipa tilkhei mi mawh a siaṭha tan mi mawh chu LALPA mi lakah telh kho asi lo.

² “Lakfa mawh lakfa nih a thlâk mi a san ranâk tiang hen LALPA mi lakah tel kho asi lo.

³ “Amon mi mawh Moab mi mawh, an thlâk rerêng chu a san ranâk tiang khawm LALPA mi lakah telh kho asi lo.

⁴ Buh leh tî Aigupta ram thawk hen suak hen nan kal liauah pêk ding an duh na lo ruangah leh Mesopotamia ram ah Pethor khua mi Beor fapa Balaam chu nanmah tla siat an barh na ding hen an mang ruangah.

⁵ Sikhawmsele LALPA nan Pathian nih Balaam thu chu a ngâi piak duh lo le; siat an barh na ding ngâk hen an dâwt na ruangah bâwngmal lam an sâwmtir na.

⁶ Nan phun a um kar zawng chu hi bang phun tla hi an sul-le-lam tluang ding hen zei lak khawm ah ṭangpi lah na u.

⁷ “Edom mi tla lam chu zauhnawmh lah na u; nan rualsia tla an si ruangah. Aigupta mi tla chu zauhnawmh lah na u; an ram ah veikhat nan um rawh asi.

⁸ An thlâk tla chu san thumnâk thawk hen LALPA mi lakah telh kho an si.

Râltuktu Tla Um Mun Thiang Tak Hen Kilkâwinâk

⁹ “Râltuk liauah riakmun ah dân lakah an nawmhtir natu ding mi thil chu veih ver u.

¹⁰ Mi zân ah a mang asia hen a siaṭha lakah mipa chi a suak hen a nâwm chun riakmun lêngah a va suak lai le, chunah chun a va um ding asi.

¹¹ Zânlei ah tak â khawlh lai le, nî tlâk nûnah riakmun leiah a hawng kîr nawlh lai.

¹² “Suak ding nan duh tikah nan kal kho ding hen riakmun lênglei ah mun nan nei ding asi.

¹³ Chawhnâk nan thuamthil lakah a put sih ule; pâwng nan kal tikah nan chawh lai le, nan vurh nawlh kho ding hen.

¹⁴ Nan riakmun chu thiang tak hen kilkâwi ule, LALPA nan Pathian chu nan riakmun ah nanmah an zauhkhenh na ding hen leh nan mêlma tla an nehtir na ding hen a um ruangah. LALPA nih dunglei an sît na ding hen thil diklo zeikhawm ti lah u.

Dân Dang Dang

¹⁵ “Sal a dâwngpu thawk hen him ding duh hen na sinah a hawng tek chun kîrtir nawlh lah.

¹⁶ Nan khua lakah a duhnâk zawng ah a um kho, nan nehsawh ding asi lo.

¹⁷ “Israel lakah mipa mawh nunau mawh anna zuar ding asi lo.

¹⁸ LALPA nan Pathian in ah an thutiam zulhpeh ding hen chubang leikângah tawng mi tangka nan hawng put ding asi lo. Â zuar mi minung chu LALPA nih a hua asi.

¹⁹ “Nanmah Israel phun lakah tangka mawh fâng mawh thil dang zeital nan pûktir chun a fa lâk lah u.

²⁰ Ramdang mi minung sin lam chun nan lâk kho lai le, nan hâwi Israel phun lakah lam chun nan lâk ding asi lo. Hi bang dân tla hi zûl ule, LALPA nan Pathian nih ram nan luah ding mi lakah thil zeizawng nan ti mi lakah mal an sâwm na lai.

²¹ “LALPA nan Pathian sinah thu nan tiamh mi chu zulhpeh lo hen siah lah u; LALPA nih nan thutiam lakah an tleih na lai le, nan zulh lo chun sual asi.

²² Sual lo ding hen LALPA sinah thutiamnâk nei lo dâidua ule,

²³ nan tiamh mi asi chun ti ngelchel ding asi ti theih u.

²⁴ “Mi grep dûm nan kalnâk lampi ah nan pal chun, nan duh tâwk nan ei kho lai, sikhawmsele, a putnâk hen nan put ding asi lo.

²⁵ Nan kalnâk lampi ah fâng mun nan pal khawmsele, a rah nan kut hen nan zûn kho rirî chu nan ei kho; favah hen lam chun nan ât ding asi lo.