DEUTERONOMY 22 - Bawm Common Language Bible Version

¹ “Nan hâwi Israel tla chawpê mawh dawrâ mawh a rî â sût hen a tek mi nan muh chun zauhtâu ko lah u; a dâwngpu sinah kalpi u.

² Sikhawmsele a dâwngpu umnâk a lât thlo chun, âu tâ asi ti nan theihlo chun, in leiah tlungpi u. A dâwngpu nih a hawng hâwl chun pêk u.

³ Chu hâwi hen sanatung mawh puan tliar mawh zei thil tal nan hâwi Israel tla nih an thlâu mi chu ti u.

⁴ “Nan hâwi Israel tla sanatung mawh chaw mawh a rîl chun, zauhtâu ko lah; thawh le, dîrtir nawlh.

⁵ “Nunau nih mipa nipuan â ruk ding asi lo, mipa khawm nih nunau nipuan â ruk ding asi lo; LALPA nan Pathian nih chu hâwi titu chu a hua asi.

⁶ “Vâ bû thing lakah mi mawh tual ah mi mawh a fa hen mawh a ti tlûnah a khurh mi nan muh chun, chu apinu chu nan lâk piak ding asi lo.

⁷ A fa chu nan lâk kho lai le, a pinu chu nan thlah ding asi, chu tikah nan san a sâu lai le, nan sul-le-lam a tluang lai.

⁸ “Inthar nan sak tikah in tlûn dâi nan siam ding asi. Mi âumawh chunah tlasual hen thi na khawmsele, nan mawhlonâk ding hen.

⁹ “Phâisen munkhat ah grep leh thlâi chi dang chîng lah u; nan chîng chun grep mawh thlâi chi dang mawh a pakhat chu mang ding siang asi loh.

¹⁰ “Phâisen nâwnnâk ah sanatung leh chawchal bawp na hen nâwn lah.

¹¹ “Puan mangṭhia leh samul telh hen tah mi puan a aih lah.

¹² “Nan puan a kî pali ah a mûm thlaih u.

Pungnâk Thenhlimh Thu Ah Dân Tla

¹³ “Mi nih nungâk a umpi hen a nehnûn ah a duh nawlh lo hen,

¹⁴ chu nungâk chu a thiang tâwk lo ti hen anna umh ving nûnah a thang a nawmh kho.

¹⁵ “Chu hâwi thil a hawng um chun chu nungâk nu leh pa nih anna umhnâk puan lakah thisen â buaih mi chu a thiang ti theihnâk ding hen chu khua mi lâirêlnâk in ah ruitu sinah an zauhtir ding asi.

¹⁶ Chu nungâk pa nih an sinah, ‘Hi ka fanu hi, hi minung sinah a umpi ding hen ka pêk le, tu chun a duh lo rawh.

¹⁷ Âwkrâwl hen thang a nawmh le, a umpi rawh chun nungâk thenhlimh asi loh’ a ti. ‘Sikhawmsele, hi lakah hin ka fanu chu nungâk thenhlimh asi ti â thei; zauhnik u, anna umhnâk nipuan lakah thî â buaih mi hi!’ a ti ding asi.

¹⁸ Churawhchun, khua lakah ruitu tla nih a pasal chu an kalpi hen an vuak ding asi.

¹⁹ Tangka zâ an châwitir ding asi, chu tangka chu nungâk pa rangah an pêk ding asi, chu minung nih chun Israel nungâk rangah ningzak a saih ruangah. Chu lâwng khawm silo hen, a dam sung zawng ah mâk lo hen a nupi ah a nei kumza ding asi.

²⁰ “Chu thangnawmhnâk chu a dik hen nungâk thenhlimh a sinâk a fiang lo chun,

²¹ a pa tualmâi ah an kalpi lai le, khua mi minung tla nih thi thlo hen lung hen an seh ding asi. Kan mi lakah thil ningzakkâi tak a ti hen, pasal nei lânah a pa in ah a um liauah pung hen a um ruangah. Hi hâwi hen Israel lakah thilsual chu nan veih ding asi.

²² “Mi midang nupi a pung liauah an tleih chun, an panih hen thah na ding asi. Chu hâwi hen sualnâk chu veih ding asi.

²³ “Mi nih mi deih mi nungâk a pung liauah khua lakah an tleih chun,

²⁴ an panih hen khua lênglei ah nan suakpi hen thi thlo lung hen nan seh na ding asi. Khua lakah hâu theihkhonâk ah um ko hen chu nungâk chu ṭangpitu hâwl hen a âu lo ruangah a thi ding asi. Chu mipa khawm chu mi deih mi nungâk a pung ruangah a thi bâk ding asi. Hi hâwi hen chubang sualnâk chu nan veih ding asi.

²⁵ “Mi nih âunih mawh an deih mi nungâk mâng ah a tleihrêm chun, a tleihrêmtu mipa cho thah ding asi;

²⁶ nungâk chu zeitin khawm ti ding asi lo, thih phah rê ding hen thilsual a ti lo ruangah. Hi thu hi minung pakhat nih minung pakhat rangah a do hen a thah mi hen â bang asi.

²⁷ Mi nih mi deih mi nungâk rangah mâng ah a tleihrêm le, ṭangpitu duh hen a âu khawm ah ṭangpitu an um lo.

²⁸ “Mi nih mi deih lo mi nungâk a tleihrêm chun,

²⁹ man rang ding ah nungâk pa rangah tangka sâwmnga a pêk ding asi, a nupi asi lai rawh, zângran hen pung ding a awt ruangah. A thih lânlo a mâk kho ding asi lo.

³⁰ “A pa nupi tla lakah a zei mi tal a pung hen a pa rangah ningzak a saih ding asi lo.