DEUTERONOMY 21 - Bawm Common Language Bible Version

Mi Thah Leikâng Thu Ah A Fianglo Mi

¹ “LALPA nan Pathian nih a nan pêk na mi ram ah, phâisen ah minung an thah mi, a thahtu theihlo mi, mi nih a muh chun,

² nan hotu leh lâirêltu tla chu an va kal lai le, a kiang mi khua tla chu ruak hen zei vial a lât tah na seh.

³ Churawhchun, a naih chemtu khua lakah ruitu tla nih chaw lâ, rianṭuannâk ah mang dahlo mi an thîm ding asi.

⁴ Tiva tî a kang dahlo mi kiangah, chu mun chu âukhawm nih nâwn lo mi, zeikhawm chînglonâk mun ah chun a ngâwng an khiak ding asi.

⁵ Levi bâwlpu tla khawm chunah chun an va kal bâk lai le, anmah nih thunawk tla chu dân hâwi hen thlûktu ding an si ruangah. LALPA nan Pathian nih amah rianṭuantu leh a min hen malsâwmnâk simtu a thîm na mi an si ruangah.

⁶ Chu a naih chemtu khua lakah ruitu tla nih chun, an thah mi minung an tawngnâk mun ah chun chawpê tlûnah an kut an ṭâwl lai le,

⁷ ‘Hi minung hi kannih thah mi asi lo, a thahtu khawm kan theih loh.

⁸ LALPA, na mi Israel tla Aigupta ram a mi na suah na mi tla chu ngaihdam na rawh. Hawng kan ngaihdam le, hi thilsual tilo hen an thah mi pa ruangah hawng kan mawhtir lah’ an ti ding asi.

⁹ Chu hâwi hen LALPA nih ti ding hen a nan duh na mi zia hen nan ti lai le, an thah mi ruangah mawhnâk chu nan tlûnah a um lai lo rawh.

Râltuknâk Ah Nunau Rêngtlâk Thu

¹⁰ “LALPA nan Pathian nih râltuknâk ah nehtu ah an siam na hen, mi nan tleih mi tla lakah,

¹¹ nunau mêlṭha umpi ding hen nan duh mi an um chun;

¹² nan in leiah tlungpi ule, a lû mêt rel ule, a kuttin muar u.

¹³ chun a nipuan thleng u. Nan in ah a nu leh pa ruangah a lungfâk mi thla khat a ulh lai le; chu nûnah nan umpi kho lai.

¹⁴ A nehnûnah nan duh lo nawlh chun nan suah ding asi. Nanmah nih nan duh ruang ko ah zângran hen nan ihpi mi asi ruangah sal hâwi hen nan siam hen nan zuar ding asi loh.

Fapa tîr Ro Thâwntu Thu

¹⁵ “Mi nih nupi panih nei hen an panih hen fapa ring piak vevê sele, sikhawmsele a fapa masa chem chu a duh dauh mi nupi fa silo sele;

¹⁶ Chu tikah a fa tla rangah thil neih a ṭhenh zâr na ding dân chu a fapa tîr a duh dauh mi nupi fa ti hen a thliar hen a dang na ding asi lo.

¹⁷ A fapa tîr rangah tingvo a lehnih hen a neih lakah mi a pêk ngelchel ding asi, a nupi a duh dauh mi fapa silah menza khawmsele. Chu minung nih chun a fapa tîr chu dân hâwitê hen a vo pêk hen fapa tîr min a puttir ding asi.

Ê-aw Ngâilo Mi Fapa Thu

¹⁸ “Mi nih fapa nei hen lungkhung leh ê-aw ngâilo si sele, a rêp khawmsele nu leh pa thu ngâilo mi si sele,

¹⁹ a nu leh pa nih a umnâk khua mi ruitu tla mâika ah kalpi na sele, lâirêlnâk ah dîrtir seh.

²⁰ Annih nih chun an sinah, ‘Kan fapa hi a lungkhung hen a hel le, kan thu a ngâi duh lo; tangka tla a veih salam le, thungâi hen zû a duh,’ an ti ding asi.

²¹ Churawhchun, khua mi tla nih lung hen thi thlo hen an seh ding asi; chu hâwi hen sualnâk chu nan veih ding asi. Israel lakah mikip tla nih chubang thil chu an theih lai le, an lâu lai rawh.

Dân Dang Dang Tla

²² “Minung a sual ruangah an thah hen a taksa thing phun lakah an thlâi mi chu,

²³ zân khuavâr hen an siah ding asi lo. Chu ruak thlâi mi nih chun Pathian siatbarhnâk chu ram lakah a hawng tlungtir awt ruangah chu ni lîlâ ah ruak chu vûi ding asi. LALPA nan Pathian nih a nan pêk na mi ram chu nâwmtir lo ding hen ruak chu vûi ving u.