DEUTERONOMY 2 - Bawm Common Language Bible Version

¹ LALPA thupêk hâwi hen Akaba Likâwlneng lei mi lampi ah kan kal le, Edom tlâng ram ah sâwt ual kan vâi.

² LALPA nih chun ka sinah,

³ “Tlâng ram ah nan um sâwt tawk rawh, marlei kângah na kal ding asi hawng ka ti.

⁴ Hi bang sîntirnâk tla hi a nan pêk na ding hen hawng ka simh: ‘Edom tlâng ram tla chu pal hen nan kal lai le, nan unau Esau thlâk tla lât takah um mi ram ah nan va kal lai. Annih nih chun an ṭih na lai le,

⁵ sikhawmsele, annih tla hen nanna do ding asi lo, an ram chu feet khat khawm ka nan pêk na awt lem lo ruangah. Edom ram chu Esau thlâk rangah ka pêk mi asi.

⁶ An lakah thawk hen tî-le-râwl nan châwk kho lai,” a ti.

⁷ “LALPA nih nan thilti zawzawng mal an sâwm na zia theihkumza u. Hi ramkaro kâu tak ah nan vâi mi tla khawm a nan zauhkhenh na asi. Hi kum sâwmli sung zawng nan sinah a um le, nan thil herh zeizawng nan nei.

⁸ “Churawhchun, Elat leh Eziongeber khuapi thawk hen a kal mi lampi chu kan mâk le, Tipi Thi leiah kan kal, mar saklei kângah Moab leiah kanna her.

⁹ LALPA nih, ‘Lot thlâk Moab minung tla chu nawktir lah na ule, do lah na u. Ar khuapi anmah ka pêk na rawh, an ram zeikhawm ka nan pêk na awt lêm lo,” a ti.

¹⁰ (Milian phun chak tak Emim an ti mi chu Ar khua ah an um. Milian chi dang tla Anakim hâwi hen mi sâng an um.

¹¹ Anakim an ti na mi hâwi hen annih tla chu Rephaim an ti na; sikhawmsele Moab mi nih chun Emim an ti na.

¹² Hor mi tla chu Edom ram ah an um le, sikhawmsele, Esau thlâk tla nih an nar na. An phun chu an râwk dep na le, anmah chu chunah chun an um. Israel tla nih an mêlma tla LALPA nih a pêk na mi ram sungah mi an nar na mi hâwi hen.)

¹³ “LALPA nih hawng ka simh mi hâwi hen Zered Va chu kan kanh rawh.

¹⁴ Chu chu Kades Barnea kan mâknâk thawk hen kum sâwmthum leh kum riatnâk asi. LALPA nih a sim rawh mi hâwi hen chu thlâk lakah mi râl dotu tla zawzawng chu an thi hep rawh.

¹⁵ An vei dep lânlo chu LALPA nih a do thlir na.

¹⁶ “An thi hep nûnah,

¹⁷ LALPA nih kan sinah,

¹⁸ ‘Tusûn chu Moab ram pal hen Ar khua lei lampi ah nan kal lai.

¹⁹ Lot thlâk Amon mi tla ram kiangah nan va um lai rawh. Nawktir lah na ule, annih tla chu do lah na u, anmah tla ka pêk na mi ram asi, nannih rangah tâwm khawm kan pêk na ding mi asi lo ruangah’ ” a ti.

²⁰ (Hi ram hi Rephaim ram khawm an ti, chu ram ah um mi tla min asi; Amon mi tla nih Zamzummim an ti.

²¹ Anakim mi hâwi hen an sâng. Phun dang ngâk hen an tam le, mi chak chi an si. Sikhawmsele LALPA nih a veih hep na le, churawhchun Amon mi tla nih an ram an lâk le, chunah chun an um.

²² Esau thlâk Edom tlâng ram ah um mi tla rangah LALPA nih chu hâwi hen a ti piak na. Hor murui chu Pathian nih a veih dep na, Edom mi nih an ram chu an lâk le, chunah chun an um le, an um pawt rawh.

²³ Kret tikulh lei mi tla chu Mediteranian kiangkam tla ah an um. Avim tla a tîr thawk hen umtu tla chu an veih na le, an ram Gaza khuapi simlei kâng mi tiang an lâk hep.)

²⁴ “Moab ram kan lanh nûnah LALPA nih kan sinah, ‘Tuah a thawh ule, Arnon Va kanh u. Sihon, Hesbon ah mi Amor lalchem leh a ram chu nan thu neihnâk tangah ka siah rawh. Do ule, a ram chu luah u.

²⁵ Tusûn ni thawk hen mun kip ah mi nih an ṭih na ding hen ka siam na lai. Mikip nan min an simnâk ko khawm ah lâu hen an thir lai,’ a ti.

Israel tla Nih Sihon Lalchem An Neh Mi

²⁶ “Churawhchun, Kedemot ramkaro thawk hen Hesbon ah mi Sihon lalchem sinah hi bang remnâk thu sim ding hen mi ka fial na:

²⁷ ‘Na ram pal ding hawng kan siang piak rawh. Lampi tê hen pial lo hen kan kal lai.

²⁸ Kan ei ding buh leh kan din ding tî man kan pêk ver lai. Kan duh chem mi chu na ram pal hen

²⁹ Jordan Va kanh hen LALPA kan Pathian nih hawng kan pêk mi ram ah kal ding chu asi. Esau thlâk tla Edom ram ah um mi leh Moab tla Ar khua ah um mi tla khawm nih an ram tla pal ding hawng kan siang piak asi,’ ti hen.

³⁰ “Sikhawmsele, Sihon lalchem nih chun a ram kan pal ding mi chu a siang lo. LALPA nan Pathian nih a lung a khungtir le, a hel, amah chu kan neh hen kan luah mi ram hi kan lâk khonâk ding hen.

³¹ “Churawhchun, LALPA nih ka sinah, ‘Zauh u, Sihon lalchem leh a ram chu nan mâika ah humtu a nei lai lo; a ram chu lâk ule, luah u,’ ti hen a ka simh.

³² Sihon chu a mi zawzawng hen Jahaz khuapi kiangah hawng kan do ding hen a hawng le,

³³ sikhawmsele, LALPA kan Pathian nih kanmah thuneihnâk tangah a siah le, amah leh a fapa tla leh a mi zawzawng tla kan thah hep na.

³⁴ Chu liau chun kan neh na le, an khua tla kan râwk le, nunau mipa an fa tla kan thah ver na. Pakhat khawm kan zuah na lo.

³⁵ Ranrual tla kan lâk le, khua tla kan rûn.

³⁶ LALPA kan Pathian nih khuapi zawzawng hawng kan lâk tir le, Arnon tivakuam kiangah mi Aroer thawk hen leh chu vakuam a lâi ram ah mi khuapi thawk hen Gilead lei mi lampi zawzawng tla khawm kan lâk. Kulhnei khuapi pakhat khawm ti kho lo kan nei loh.

³⁷ Sikhawmsele Amon tla ram kiangkam mawh Jabok Tiva kap tla mawh tlâng ram mi khuapi leikâng mawh LALPA kan Pathian nih kal lo ding hen thu hawng kan pêk mi mun tla chu zei mun khawm ah kan kal lo.