DEUTERONOMY 18 - Bawm Common Language Bible Version

Bâwlpu Tla Vo

¹ “Levi phun bâwlpu tla nih Israel ram ah zeikhawm tingvo an nei ding asi lo; LALPA sinah thil ap leh bâwlnâk pêk mi lakah an nung ding asi.

² Phun dang tla nih an nei hâwi hen ram an nei ding asi lo; an vo chu LALPA nih a tiamh mi hâwi hen LALPA bâwlpu tla sinâk chu asi.

³ “Zeiliau zawng ah ranrual mawh dawrâ mawh hen bâwlnâk chu a dâr, a khâ, a pawpi chu bâwlpu rangah pêk ding asi.

⁴ An vo anna ting masa chem ding mi chu fâng, uain, oliv sariak leh samul tla asi.

⁵ Nan phun zawzawng lakah Levi phun chu LALPA nih amah rian ṭuan kumza ding hen bâwlpu ah a thîm na mi chu an si.

⁶ “Levi âutal a duhtu zawzawng nih Israel ram ah zei khua tal thawk hen mun pakhat sawnhnâk ding mi lakah a va kal hen

⁷ LALPA a Pathian rangah bâwlpu rianṭuan ding hen Levi dang tla nih chunah an ṭuan hâwi hen chunah chun a ṭuan kho bâk lai.

⁸ Bâwlpu dang tla tawng mi zat hâwitê â ting lai le, a dâwngsung nih zeital an hawng kuat mi chu a kil kho lai.

Lunglotu Tla Umdân Zûl Lo Ding Hen Nunsimhnâk

⁹ “LALPA nan Pathian nih a nan pêk na mi ram nan va lût tikah, chunah um mi phun tla umdân fihnungkâi châwng lah u.

¹⁰ Nan mâichâm tlûnah mi mei lakah nan fa tla bâwlnâk ah mang lah ule; nan mi tla chu simkan khotu mawh, tuakthiam mawh, simkhotu mawh,

¹¹ tamhthiam mawh leikâng châwngtir lah na ule, mithi thlarau khawm thu deihtir lah na u.

¹² LALPA nan Pathian nih chubang hâwi thil fihnungkâi titu chu a hua asi, churuang tak chun asi nan kalnâk zawzawng ram ah mi phun tla a narnâk chu.

¹³ LALPA lakah zumhkâi thlir hen um u,” a ti.

Khuavâng Fial Ding Hen Thutiamhnâk

¹⁴ Churawhchun, Mosi nih, ‘Ram nan luah ding mi ram ah um mi tla nih chun sim khotu tla leh tuak khotu tla thu an châwng tâwn, sikhawmsele LALPA nan Pathian nih chun chu hâwi ti ding an siang na lo asi.

¹⁵ Keimah hâwi mi khuavâng nanmah lakah mi ngelchel a ruat lai le, chu thu nan ngâi ding asi.

¹⁶ “Sinai tlângah nanna pûm liauah LALPA thusim chu theihlo rawh ding hen leh ṭihnung a kâi zia muhlo rawh ding hen nan ngiar le, kan thi lebang lai ti nan ṭih ruangah.

¹⁷ Churuangah LALPA nih ka sinah, An deih mi chu deihnâk fing asi.

¹⁸ Anmah lakah mi nangmah hâwi mi khuavâng pakhat an sinah ka fial lai le; thusim ding mi tla chu ka simh lai le, thu ka pêk mi tla zawzawng chu zapi tla a simh na lai.

¹⁹ Ka min hen thu a sim lai le, a thu ngâi duhlotu âuzawng ka rêp na lai.

²⁰ Sikhawmsele zei khuavâng zawng keimah thupêk lo hen ka min hen thusimtu chu, chu hâwi a ti ruangah a thi ding asi, chu hâwi hen zei khuavâng tal pathian dang tla min hen thusimtu tla chu an thi ding asi,’ a ti.

²¹ “Khuavâng thusim chu LALPA thawk hen mi asi lai lo ti ruangah nan lawk a sawng kho.

²² Khuavâng nih LALPA min hen thu a sim hen, a thusim chu a diklo asi chun LALPA thuchah asi lo. Chu khuavâng chu mah thu hen a sim mi asi le, amah chu nan ṭih ding asi lo.