DEUTERONOMY 17 - Bawm Common Language Bible Version

¹ “LALPA nan Pathian sinah ranrual mawh dawrâ mawh sâwinâk um mi hen a bâwl lah u; chu chu LALPA nih a hua asi.

² “Nan khua tla lakah mi khua pakhat ah nunau mawh mipa mawh, LALPA lakah sual leh a thudântuk buar hen

³ pathian dang nî mawh, thlâ mawh, ârfi mawh sawnh leh a rian a ṭuan ti nan theih chun LALPA thupêk hen â kalh asi.

⁴ Chu hâwi thu nan theih chun deihfiang ver u. A dik mi asi hen chubang hâwi thilsual Israel lakah a hawng um mi asi chun,

⁵ chu minung chu khua lênglei ah suah ule, lung hen thi thlo seh u.

⁶ Chu hâwi chu a mawh ti minung panih mawh chu ngâk a tam mawh theihpitu a um tik cho ah thah asi lai le; theihpitu minung pakhat cho asi chun thah ding asi lo.

⁷ Theihpitu tla nih a masa chem hen lung hen an seh lai le, chu tikah midang tla nih chu minung chu lung hen an seh ding asi; hi hâwi hen sualnâk lakah nanna thlei ding asi.

⁸ “A zeimaw mi thunawk tla chu khua mi lâirêltu tla rangah thlûk ding hen a har tuk khawm asi kho, thil-le-rî thunawk, taksa liamh thu, thah mi leh thahtu kar lakah mi thunawk tla. Chubang hâwi thu a hawng um chun LALPA nan Pathian nih a ruat mi sawnhnâk mun pakhat ah kal ule,

⁹ Levi bâwlpu tla leh lâirêltu, chu liauah rianṭuan hen um mi sinah nan thunawk tlunh ule, anmah rangah thu chu thlûktir na u.

¹⁰ Annih nih thu an thlûk lai le, a nan simh na mi hâwitê hen nan ti ding asi.

¹¹ An thuthlûk leh an sîntir na mi tla pawm hep u.

¹² Âuzawng lâirêltu mawh bâwlpu tla nih an ti mi siarlo tak hen zûl duhlotu tla chu thah ding asi; chu hâwi hen Israel lakah mi thilsual chu nan lawnh ding asi.

¹³ Mikip nih an theih lai le, an ṭih lai, âukhawm nih chu hâwi ti ding an ngamh lai lo rawh.

Lalchem Thu Ruangah Sîntirnâk

¹⁴ “LALPA nan Pathian nih an pêk na ding mi ram nan va luah hen nan va um tik chun, nan kiangkam ah phun tla hâwi hen nan herh mi lalchem nan ruat bâk lai.

¹⁵ Lalchem nan thîm ding mi chu LALPA thîm mi asi ngelchel ding asi. Nanmah lakah mi pakhat asi ngelchel ding asi; ramdang mi minung nan lalchem rangah siam lah u.

¹⁶ Lalchem nih chun a kawrsen tla rangah rang tla tam tak a nei ding asi lo, rang tla châwk ding hen Aigupta ah mi a fial na ding asi lo, LALPA nih chu ram ah chun a mi tla kîr lo rawh ding a ti ruangah.

¹⁷ Lalchem nih nupi tam tak a nei ding asi lo, LALPA lakah mi pial tirtu an si awt ruangah; ngûn leh tangka tam tak nei a tum ding asi lo.

¹⁸ Lalchem a hawng si chun Pathian dân bu leh a sîntirnâk Levi bâwlpu tla nih an kil mi a bul ah mi thu bu siam mi a nei ding asi.

¹⁹ A dam kar zawng ah chu lasuibu chu a kiangah kil hen a rêl ding asi, churawhchun LALPA chu zah dân a theih lai le, chu lakah mi thupêk zeizawng tla chu zumhkâi tak hen a zûl ding hen.

²⁰ A hâwi Israel tla ngâk hen ṭha dauh hen â ruat ding mi leh LALPA thupêk lakah zei kâng khawm ah a zûl lonâk ding mi lakah chu nih chun a vêng ding hen. Churawhchun, kum tam tak lâi a rêl lai le, a thlâk tla nih Israel tla chu thlâk tam tak rangah lâi an rêl lai.