DEUTERONOMY 16 - Bawm Common Language Bible Version

Kalkanh Kût

¹ ‘LALPA nan Pathian zahnâk ding hen Abib thla ah Kalkanh Kût ulh u;’ chu thla zân ah chun Aigupta ram ah mi ruang an suah na ruangah.

² Mun pakhat, sawnhnâk ding mun ah chun kal ule, Kalkanh Kût buh LALPA zahnâk ding ah ei ding hen nan ranrual mawh dawrâ mawh pakhat thah u.

³ Chu buh chu nan ei tikah sang thilnu telh mi hen nan ei ding asi lo. Aigupta ram nan mâk awt liauah mawhsareh nan ei hâwi khan ni sarih chu sang thilnu telhlo mi nan ei ding asi. Chu sang nan ei ding mi chu- tuarnâk sang ti asi lai. Aigupta ram thawk hen nan hawng suak hen, chu ram chu tuarnâk ram asi ti nan damsung zawzawngah nan theih khonâk ding hen.

⁴ Ni sarih kar zawng nan ram sungah âukhawm nih thilnu nan siah ding asi lo, a ni khat ni ah zânleibâi ah ran thah mi sâ chu, chu zân lîlâ ah ei ding asi.

^5-6 “Kalkanh Kût ran chu sawnhnâk mun pakhat ah thah u, mun dang rerêng chu LALPA nan Pathian nih an pêk na awtlo. Aigupta ram nan suaktâk liau mi ni cham, nî tlâk tikah ti u.

⁷ Sawnhnâk mun pakhat ah chu sâ chu suang ule, ei u; a thâituan ah in leiah kîr u.

⁸ A dang ni ruk kar chu sang thilnu telhlo mi nan ei lai le, a ni sarih ni chu LALPA nan Pathian sawnh ding hen a pûm ule, chu ni ah chun zei rian khawm ṭuan lah u.

Fângzûn Kût

⁹ Fângzûn nanna dawmhnâk thawk hen rêl ule, zarhkar sarih ah

¹⁰ Fângzûn Kût ulh u, LALPA nan zahnâk ding ah malsâwmnâk an pêk na mi mah duh thu a thil ap tla a sinah put u.

¹¹ Nan khua ah um mi tla numei, ngâkṭah, ramdang minung, Levi tla, nan fa leh to-aw tla hen, munkhat dut hen lâwm bû hen LALPA mâika ah um u. Hi hi sawnhnâk mun pakhat ah ti u.

¹² Hi thupêk tla hi zûl ding hen theihkumza u; Aigupta ram ah sal nan si mi kha philh lah u.

Basâ Kût

¹³ “Nan fâng nan khâwng hen grep nan sûr dih rawh chun Basâ Kût ni sarih ulh u.

¹⁴ Nan khua sungah um mi numei, ngâkṭah, ramdang mi, Levi, nan to-aw leh nan fa tla hen a lâwm u.

¹⁵ Sawnhnâk mun pakhat ah hi kût hi LALPA nan Pathian zahnâk ding hen ni sarih ulh u. LALPA nih nan fângzûn leh nan rianṭuan mal a sâwm ruangah a lâwm u.

¹⁶ “Nan phun ah minung zawzawng sawnhnâk mun pakhat ah LALPA sawnh ding hen kum khat ah veithum nan kal ding asi: Kalkanh kût, Fângzûn kût leh Basâ Kût liau tla ah.

¹⁷ Mikip nih thilpêk LALPA nan Pathian nih malsâwmnâk a pêk na mi chu mah tikho tâwk hen an pêk ding asi.

Lâirêl Dân Dik

¹⁸ “LALPA nan Pathian nih a nan pêk na mi khua kip ah lâirêltu leh rianṭuantu ruat na u. Chubang tla nih zapi tla chu thliar dangnâk nei lo hen lâi an rêl ding asi.

¹⁹ An lâirêlnâk lakah khat leikâng ṭângṭawmnâk nei hen diklo tak hen lâi an rêl ding asi lo; nawhnâk khawm an ei ding asi lo, thilpêk nih mifing leh mi zumhkâi mit a châwttir le, diklo tak hen thu thlûknâk a siam tâwn.

²⁰ Rep tak leh ṭha tak hen um kumza ule, churawhchun LALPA nan Pathian nih an pêk na mi ram nan luah lai le, chunah chun nan um kumza lai.

²¹ “LALPA nan Pathian rangah mâichâm nan siam chun a kiangah Aserah pathiannu lem thing hen siam mi siah lah u.

²² Milem sawnhnâk ding hen lung zeikhawm phun lah u; chubang chu LALPA nih a hua asi.”