DEUTERONOMY 15 - Bawm Common Language Bible Version

Kum Sarihnâk

¹ “Kum sarih kum kip a dawng rawh chun, pûk nan pêk mi tangka chu veih piak na u.

² Hi hâwi hi nan ti ding mi chu asi. Mi âuzawng nih nan hâwi Israel lakah tangka nan lângtir na mi tla chu veih piak na u, tangka chu âukhawm nih chawh lah seh, LALPA amah tak nih â bat mi chu veih asi rawh a ti ruangah.

³ Ramdang mi sinah mi lam chu nan chawh na kho, nanmah minung tak lakah mi chu nan chawh na ding asi lo.

⁴ “LALPA nan Pathian nih ram a nan pêk na ni ah chun mal a nan sâwm na lai.

⁵ Tusûn ni ah thu ka nan pêk na mi hi thiamthih tak hen nan zûl hen, a lakah ê-aw nan ngâi chun pakhat khawm nan pâm lai loh.

⁶ LALPA nih thu an tiamh na mi hâwi hen mal an sâwm na lai. Phun tam tak tla rangah nan pûktir na lai le, nannih lam nih chun âu sin khawm ah nan pûk lai loh, phun tam tak tla chu nan thu thu hen nan siah lai le, sikhawmsele zei phun khawm nih nan tlûnah thu an nei lai loh.

⁷ “LALPA nan Pathian nih a nan pêk na mi ram ah, a zei khua lak khawm ah ṭangpi herh mi Israel mi an um chun mah kawngkâ cho ruat hen ṭangpi ding duh lo lah u.

⁸ Chu ngâk hen chun khiar lo hen a herh rirî chu pûktir u.

⁹ Thil zeimawh pûktir ding sianglo lah u, bângki veihnâk kum a nâi rawh ruangah khawm ti lah u. Chubang hâwi dawnnâk diklo chu nan thinung ah um lah seh. Pûk ding nan sianglo chun nanmah sâwi hen Pathian a auh lai le, nan mawh lai.

¹⁰ Siang tak hen mah kawngkâ ruat lo hen pêk u, nan thilti zeizawng ah LALPA nih mal an sâwm na lai.

¹¹ Israel lakah mi zeimawh ṭangpi herh mi an um tâwn lai, an lakah khiar lo ding hen thu kan pêk na.

Sal Tlûnah Ti Dân

¹² “Israel lakah mi, nunau mawh, mipa mawh nan sinah sal ah anmah an hawng a zuar chun, nan sinah a um mi kum ruk a tling rawh chun suah na u. A kum sarih kum a tling chun nan suah ding rêng asi.

¹³ Nan suah na liauah kut karo hen suah lah na u.

¹⁴ Siang tak hen LALPA nih mal a nan sâwm na mi fâng, dawrâ, uain nan pêk na bâk ding asi.

¹⁵ Nannih khawm Aigupta ram ah sal nan si mi kha theihkumza ule, chunah mi chu LALPA Pathian nih an suah na mi nan si ruangah, hi thupêk tla hi tuah kan pêk na mi asi.

¹⁶ “Sikhawmsele, nan sal nih suak ding a duh lo hen, nang leh na dâwngsung chu an duh na hen um rih ding khawm a duh kho.

¹⁷ Churawhchun, nan in kawtkâ leiah kalpi ule, a nâ vih ule, a damsung zawzawng nan sal asi lai rawh. Nan sal nunau chu, chu hâwi ber hen ti u.

¹⁸ Nan sal chu lungsilo bû hen suah lah u, sal a sinâk man chu kum ruk karah rian a ṭuan rawh ruangah.

Ranrual Leh Dawrâ Lakah A suak Masachem Mi

¹⁹ “Nan ranrual leh dawrâ lakah a suak masa chem mi, a mipa zawzawng chu LALPA nan Pathian rangah siah u. Hi ranrual lakah mi chubang chu a zei mi khawm rian nan ṭuantir ding asi lo, dawrâ khawm a mul nan mêt ding asi lo.

²⁰ Kum siar hen nanmah leh nan dâwngsung tla hen sawnhnâk mun ah nan ei ding asi.

²¹ Sikhawmsele, ran lakah diklonâk a um chun, a khêng hen mawh, a mitchâw hen mawh, râwknâk lian tak a um asi chun LALPA sinah bâwlnâk ah nan mang ding asi lo.

²² Chubang ran tla chu in leiah nan ei kho lai. Nan ektê hen a thiang mi khawm a thianglo mi khawm sazuk leh sakhi hâwi hen nan ei kho lai.

²³ Sikhawmsele, a thî nan ei ding asi lo; ei ding ngangâk hen tual ah tî hâwi hen thlêt u.