DEUTERONOMY 14 - Bawm Common Language Bible Version

Ulhnâk Lei Thu Ah Khapnâk

¹ “LALPA nan Pathian mi nan si le, mithi ruangah lungfâk tuk ah nan taksa ât hen nan khamul tla midang nih an ti hâwi hen mêt lah u.

² LALPA nan Pathian mi nan si, amah mi siding hen laikulh ah um mi lakah an thîm na mi asi.

Sâ Thiang Leh Thianglo

³ “LALPA nih thianglo a ti mi chu zeikhawm ei lah.

⁴ Hi bang ran tla hi nan ei kho lai, ranrual; dawrâ tla, kêl tla,

⁵ sakhi tla, saza, mâng kêl, sazuk,

⁶ zei ransa tal a ketin a kâk mi leh a râwl dawlh a khâi nawlh mi.

⁷ Sikhawmsele zei ransa tal a ketin kâklo mi leh a râwl dawlh a khâi nawlh lo mi chu ei kho asi lo. Sangâwngsâu, zungnampi mawh sâirem nan ei kho lai lo. Thianglo hen ngaih an si, an râwl dawlh chu an khâi nawlh le, khawmsele an ketin a kâk lo.

⁸ Vawksa ei lah u, thianglo hen ngaih asi, an ketin chu a kâk le, an râwl dawlh an khâi nawlh lo. Hi bang hâwi ransa tla hi ei lah ule, an taksa tawngh khawm tawngh lah u.

⁹ “Zei ngâ tal a ṭek leh a hir a um mi chu nan ei kho lai.

¹⁰ Sikhawmsele, tî lakah nungnâk nei mi hir leh ṭek nei lo mi chu nan ei kho lai lo, thianglo hen ngaih an si.

¹¹ “Zei vâ tal a thiang mi chu nan ei kho lai.

^12-18 Sikhawmsele, hi bang hi nan ei lo ding mi vâ tla chu an si: murâ, sumbuh, kâite, thlâkâwi, mû, chawpê ruaklâwm, langâk, vachâ, tisumsumriat vâ, lili âr, tivarak, ngaikuang râl, tipi vâ, vasuangtuar leh balâk tla.

¹⁹ “A murui hen an zuang mi thilnung thla nei vial ei lah u;

²⁰ Thilnung thlanei a thiang mi vial nan ei kho.

²¹ “Amah lung hen a thi mi ransa nan ei ding asi lo. Ramdang minung nan sinah an um mi tla chu nan eitir na kho, asi lo leh an sinah nan zuar kho. Sikhawmsele nannih lam chu LALPA nan Pathian lakah mi nan si le, a mi tla nan si. “Kêl fa mawh dawrâ fa mawh a nu nûk hâng hen suang lah u.”

Parâ Lû Ah Pakhat Dân

²² “Nan phaisen ah a suak mi kum siar hen parâ lû pakhat vauh u.

²³ Churawhchun, LALPA nan Pathian nih amah sawnhnâk ding a ruat mi mun ah kal ule, chunah chun nan parâ lû ah pakhat fâng, uain, oliv sariak leh nan ranrual lakah a fa tîr, dawrâ lakah mi khawm ei u. LALPA nan Pathian nan chawnglawmhnâk ding ah ti kumza u.

²⁴ Nan in thawk hen sawnhnâk in chu, LALPA nan Pathian nih mal an sâwm na mi parâ lû ah pakhat put ding hen a lât tuktarâi chun, hi hâwi hen ti u:

²⁵ Nan thil tawng tla chu zuar ule, a tangka hen put u.

²⁶ Nan duhnâk lei zawng ah mang ule, chaw sâ rangah mawh, dawrâ mawh, uain leh zû rang khawm ah, chunah LALPA nan Pathian mâika ah nan dâwngsung hen lâwm tak hen ei u.

²⁷ “Nan khua ah Levi murui tla chu thlawrhthlâu lah na u, mah rang ê hen thil an nei lo ruangah.

²⁸ Kum thumnâk pâwl tlâk ah nan parâ lû pakhat nan thilneih zawzawng chu khua lakah pumh u.

²⁹ Hi bang ei ding tla hi Levi murui rangah asi, thil zeikhawm an tâ a umlo ruangah, ramdang mi, mi ngâkṭah, numei tla nan khua ah um mi tla rang khawm asi. An hawng lai le, an herh zia zawng hen anna ting bâk ding asi. Hi hâwi hen ti ule, LALPA nan Pathian nih mal an sâwm na lai.