DEUTERONOMY 12 - Bawm Common Language Bible Version

Sawnhnâk Dingah Mun Pakhat

¹ “Hi bang tla hi an thlâk natu LALPA Pathian nih a nan pêk na mi ram ah nan um kar zawzawng nan zûl ding mi dân tla chu asi. Ngâi na u!

² Nan luah ding mi ram ah chun thupêk tla chu zûl hen, chunah um mi tla nih an sawnh mi pathian tlâng sâng leh tlâng tlûnah tla, thing ring tang tla ah an pathian sawnhnâk mun chu râwk ver u.

³ An mâichâm leh an lungphun tla chu khuai dip u. An pathiannu Aserah singsiahnâk ruk tla chu duah ule, hâu ule, chu mun ah chun zeiliau khawm ah an sawnh lo rawhnâk ding hen.

⁴ “Hi bang hâwi minung tla nih an pathian an sawnh mi dân hen nan LALPA leh nan Pathian chu nan sawnh ding asi lo.

⁵ Nan ram sungah mi nan phun zawzawng tla nih sawnhnâk ding mun chu LALPA nih amah sawnhnâk ding mun pakhat cho a thîm awt.

⁶ Chunah chun bâwlnâk tla nan pêk lai le, duah ding mi leh thil dang bâwlnâk tla, parâ lû ah pakhat leh nan thilpêk tla, LALPA sinah thilpêk nan tiamh mi tla, nanmah duh thu hen thil nan ap mi leh nan ranrual leh nan dawrâ lakah a ring tîr mi fa tla nan ap ding asi.

⁷ Chunah chun LALPA nan Pathian umnâk mal a nan sâwm na mi ram ah chun nan fa le, nan dâwngsung tla hen nan rianṭuan mi thil ṭha chu lâwm tak hen nan ei lai.

⁸ “Chunah nan va kal tikah chun, a lân hâwi hen thil nan ti ding asi lo rawh. Tu tiang hen nanmah duh thu hen Pathian nan sawnh,

⁹ thlangam tak hen nan va umnâk ding mun, LALPA, nan Pathian nih a nan pêk na mi ram ah nan va lût lo rih ruangah.

¹⁰ Jordan Va nan kanh tikah LALPA nih a nan luahtir na lai le, chunah chun nan va um lai rawh. Nan mêlma zawzawng lakah mi a nan hum na lai le, thlangam tak hen nan um lai.

¹¹ LALPA nih amah nan sawnhnâk ding hen mun pakhat cho a thîm lai le, chunah chun thu kan pêk na mi thil zeizawng a sinah nan kalpi lai. Nan bâwlnâk duahphung tla leh bâwlnâk dang tla, parâ lû pakhat leh nan thil ap tla, a bîk hen LALPA sinah thilpêk nanna tiam mi tla LALPA sinah nan pêk ding asi.

¹² Chunah LALPA umnâk ah chun nan fa tla, nan to-aw tla, nan khua lakah Levi um mi tla hen munkhat lâwm tak hen um ule; Levi tla nih anmah rang ê hen mun an nei lo ti theihkumza u.

¹³ Nanmah duhnâk kip ah bâwlnâk nan ap ding asi lo.

¹⁴ Nan phun lakah mi phun khat umnâk ah LALPA nih a ruat mi mun pakhat cho ah nan pêk ding asi. Chu mun pakhat cho ah chun ap ding mi bâwlnâk tla, duah ding mi leh thil dang zawzawng tla chu nan ap ding asi.

¹⁵ “Sikhawmsele, nan ran lam chu nan umnâk zawzawngah nan thah hen nan ei kho. LALPA nih a nan pêk na mi chu nan duh zat zawng nan ei kho. Nan ektê hen dân lakah mi thiang mawh mi thianglo mawh, khawm nih nan ei kho, nan ei nget tâwn hâwi hen sakhi leh sazuk sâ tla.

¹⁶ Sikhawmsele, a thî tla chu ei lah ule; tî hâwi hen tual ah nan thlêt ver ding asi.

¹⁷ LALPA sinah nan pêk mi chu zei thil khawm nan umnâk ah nan ei ding asi lo; fâng parâ lû pakhat, uain, oliv sariak, nan ranrual leh dawrâ lakah a ring tîr mi LALPA sinah thilpêk ding nanna tiam mi, nanmah thinlung suak hen nan ap mi leh thil dang ap mi tla zawzawng hi.

¹⁸ Nanmah leh nan fa tla, nan to-aw leh nan khua lakah Levi um mi tla hen, munkhat dut hen hi bang thil ap tla hi LALPA nan Pathian nih amah sawnhnâk mun ah a thîm mi mun cho ah nan ei dut ding asi. Chunah chun nan thilti zawzawngah nanna lâwm ding asi.

¹⁹ Nan ram ah nan um sung zawzawng chu Levi tla rangah thlawrhthlâu lah na u.

²⁰ “LALPA, nan Pathian nih nan ram a kauh tikah chun thu a nan tiamh na mi hâwi hen nan duh tik zawng ah sâ nan ei kho lai rawh.

²¹ Sawnhnâk ding munkhat ah a lât tuktarâi chun nan sinah ka sim rawh hâwi hen LALPA nih a nan pêk na mi ranrual leh dawrâ tla chu zeiliau zawng ah in ah an sâ tla nan ei kho.

²² Dân ah thiang mi leh thianglo mi khawm nih chu sâ chu an ei kho, sakhi leh sazuk sâ ei kho asi hâwi hen.

²³ Nungnâk chu thisen ah a um mi asi ruangah a thî hen châwm nuk hen sâ nan ei ding asi lo.

²⁴ Ei ding hen thî mang lah u, chu ngâk chun tî hawi hen tual ah thlêt u.

²⁵ Hi bang thupêk tla hi nan zûl chun, LALPA a lâwm lai le, nanmah leh nan thlâk tla rangah thil zeizawng a tluang lai.

²⁶ LALPA sinah thilpêk ding nan tiamh mi leh nan thil ap tla amah nan sawnhnâk leh thil ap nan pêknâk ding mun pakhat cho ruat u.

²⁷ LALPA mâichâm ah duah hep ding mi bâwlnâk pêk ule; bâwlnâk a sâ ei hen mâichâm tlûnah a thî thlêt hep ding mi khawm chunah ap u.

²⁸ Thu ka nan pêk na mi zeizawng zumhkâi tak hen zûl ule, nan rangah leh nan thlâk tla rangah sul-le-lam tluangnâk asi kumza lai le; LALPA lawmhtirnâk ding hen thil dik nan ti ruangah.

Milem Sawnhnâk Thu Ah Nunsimhnâk

²⁹ “An ram chu nan va rûn tikah phun tla chu a veih na lai le, nan va luah lai le, chunah chun nan va um lai.

³⁰ Chubang phun tla chu LALPA nih a veih tik chun an phung-leh-lam zûl lo ding hen a thiamthih ule, chu chu siat thihnâk asi ruangah. An pathian chu zei hâwi hen an sawnh ti hen theih ding a tum lah u, anmah sawnh dân nan châwng sual lebang lai.

³¹ An pathian an sawnh dân hen nannih chu LALPA nan Pathian rangah sawnh lah u, annih nih an pathian an sawnhnâk, LALPA nih a hua mi thil fihnungkâi zawzawng an ti ruangah. An mâichâm tlûnah an fa tla bâwlnâk ding ah mei ah an paih na.

³² “Thu ka nan pêk na mi zawzawng ti ule, chu lakah mi chu zeikhawm sap lah ule, lawnh ber lah u.