DEUTERONOMY 11 - Bawm Common Language Bible Version

LALPA Rokualnâk

¹ “LALPA nan Pathian chu dâwt ule, a dân zawzawng tla chu zûl kumza u.

² LALPA ruangah amah lakah theihthiamnâk nan nei mi chu theihkumza u. Hi theihthiamnâk neitu hi nan fa le tla asi lo, nanmah tla nan si. LALPA rokualnâk, a thiltikhonâk, a chak zia leh

³ thilchê ti tla nan muh rawh asi. Aigupta lalchem leh a ram pumpi ah thil a ti mi tla khawm nan muh asi.

⁴ Aigupta mi kawrsen an rang tla leh an kari tla, Tipi Sen lakah nanmah an ṭhawl na liauah an pil le, a veih hep na mi kha nan muh asi.

⁵ Hi mun nan hawng tleng lânah ramkaro ah LALPA nih thil a ti mi tla khawm nan theih asi.

⁶ Dathan leh Abiram, Reuben phun a mi Eliab fapa tla lakah a ti mi khawm nan theih nawlh kha. Tual a hawng kak le, nan ektê mitmuh hen an dawngsungkhur hen an puanin tla, an to-aw tla leh an ran zawzawng tual a kak le, a dawlh hep na mi tla.

⁷ Asi, nanmah tak kha LALPA nih thil rokual a ti mi tla chu nan muh asi.

Ram Tiam Lakah Mi Malsâwmnâk

⁸ “Tusûn ni ah dân ka nan pêk na mi zawzawng hi zûl u. Chu tikah Jordan Va kanh hen nan lûtnâk ding mi ram chu nan luah kho lai.

⁹ Nan thlâktu tla leh an thlâk tla sinah pêk ding hen LALPA nih a tiamh mi ram ṭha leh neihnâk ram ah sâwt tak nan um lai.

¹⁰ Nan luah ding mi ram chu a lânah nan umnâk Aigupta ram hâwi asi lo. Chunah chun thlâi chî nan erh khawm ah har tak hen tidil ding hen rianṭuan a herh le;

¹¹ sikhawmsele, nan va lûtnâk ding mi ram chu tlâng sâng tak leh tivakuam tinung um mi ram asi.

¹² LALPA nan Pathian nih hi ram chu a kilkâwi kumza, tlâitluan hen a vêng hen a kil ding mi asi.

¹³ “Churuangah, thupêk tusûn ni ah kan pêk na mi tla hi zûl ule, LALPA, nan Pathian chu dâwt ule, nan thinlung zawzawng hen amah nâwl zulh u.

¹⁴ Chu hâwi nan ti chun, nan ram ah a herh tik zawng ah ruah a hawng sûrtir lai le, fângzûn liau leh fûr tla khawm ah, churawhchun, fâng tla, uain tla, Oliv sariak tla leh

¹⁵ nan ranrual tla rangah belh tla a hawng um lai. Nan duh tâwk hen fâng tla nan nei lai.

¹⁶ LALPA lakah nan um mi chu pathian dang tla leiah pial rîlmâl lah u.

¹⁷ Nan pial chun, LALPA nan tlûnah a thinthawk lai. Ruah a khap lai le, nan thlâi chî keuhnâk ding mi tual a char fêk lai. Churawhchun, ram ṭha an pêk na mi sikhawmsele zeikarlo ah nan thi hep lai.

¹⁸ “Hi bang thupêk tla hi theihkumza hen nan thinlung tharhnâk ah mang u. Nan bân ah a khimh ule, nan chal ah khimh u, thinlung ah theihkumzanâk ding ah.

¹⁹ Nan fa tla sîntir na ule, in ah khawm simh na u, mun dang khawm ah, rian nan ṭuan liau leh nanna dîn liau khawm ah sîntir na u.

²⁰ Nan kawtkâ tung leh nan kawtkâ kawm ah khawm rîn u.

²¹ Churawhchun, LALPA nan Pathian nih nan thlâktu tla rangah a tiamh mi ram ah chun nanmah leh nan fa tla hen hun sâwt tak nan um lai. Tual tlûnah vân a um kar vial chu chunah hun sâwt tak nan um lai.

²² “Dân ka nan pêk na mi zawzawng chu zumhkâi tak hen zûl ule, LALPA nan Pathian chu dâwt ule, thu a nan pêk na mi kip ti hen a lakah zumhkâi tak hen um u.

²³ Churawhchun, nan kalnâk zawng ah phun tla chu an nar piak na lai le, nanmah ngâk hen thiltikho dauh tla ram chu nan luah lai.

²⁴ Nan lamh mi tual nan kalnâk zawng chu nan tâ asi lai. Nan ramri simlei mi ramkaro thawk hen marlei mi Lebanon Tlâng leh, saklei mi Eufretis tiva thawk hen thlanglei mi Mediteranian Tipi tiang asi lai.

²⁵ Chu ram ah nan kalnâk kip ah LALPA nan Pathian nih chunah minung tla chu nanmah an ṭih na ding hen a siam na lai le, âukhawm nih a thutiam hâwi hen a nan kham kho na lai lai lo.

²⁶ “Tusûn ni ah hin malsâwmnâk leh siatbarhnâk thîm ding hen kan pêk na.

²⁷ LALPA, nan Pathian thupêk tusûn ah kan pêk na mi hi nan zûl chun malsâwmnâk asi lai le;

²⁸ a tlûnah nan sawnh dahlo mi phun dang pathian leikângah nan pial hen hi bang thupêk tla hi nan zûl lo chun siatbarh nan si lai.

²⁹ LALPA nih ram nan va luah ding mi lakah an kalpi na tikah chun malsâwmnâk chu Gerizim Tlângah nan sim lai le, siarbarh thu chu Ebal Tlângah nan sim lai.

³⁰ (Hi bang tlâng hi Jordan Va saklei kângah Jordan Vadung Kanaan mi umnâk ram tla asi. Gilgal khua kiangah mi More ah mi thing thenhlimh thawk hen lât tuktarâi lo ah thlanglei kângah a um mi asi.)

³¹ Tuah LALPA nan Pathian nih an pêk na mi ram Jordan Va chu nan kanh awt rawh asi. Chunah chun nan va kal hen nan va um tikah chun

³² tusûn ah dân kan pêk na mi hi zûl ding hen theihkumza u.