DEUTERONOMY 10 - Bawm Common Language Bible Version

Mosi Nih Thupêk A Tawng Nawlh Mi

¹ “Churawhchun, LALPA nih ka sinah, ‘A tîr mi hâwi hen lungtlêp panih siam le, a sungah siah ding hen thing tawbala siam. Tlângah ka sinah hawng kâi le,

² na khuai mi lungtlêp ah rîn mi ber chu lungtlêp lakah ka rîn nawlh lai le, chu tikah tawbala sungah na siah lai,’ a ti.

³ “Churawhchun, thingrî thing hen tawbala ka siam le, a tîr mi hâwi hen lungtlêp panih ka siam le, tlângah ka kâipi rawh.

⁴ Chun LALPA nih a tîr mi thu tê kha chu tlângah nanna pûm liauah mei thawk hen nan sinah thu a hawng sim mi thupêk parâ a nan pêk na mi kha chu lungtlêp tla lakah chun a rîn rawh. Chu lungtlêp chu LALPA nih hawng ka pêk le,

⁵ ka kîr le, tlângah mi chu ka ṭum rawh. Pathian nih thu hawng ka pêk mi hâwi hen thing tawbala ka siam mi sungah ka siah le, chunah chun a um pawt rawh,” a ti.

⁶ (Israel mi tla chu Jaakan mi tla tikhurchawh thawk hen anna thawh le, Moserah ah an kal. Aron chu chunah chun a thi le an vûi, a fapa Eleazar nih a ruangrûl ah bâwlpu rian a ṭuan rawh.

⁷ Chunah thawk hen Gudgodah ah an kal le, Jotbathah tikhurchawh tî umnâk mun ah an kal.

⁸ Tlâng tlûnah khan LALPA nih Levi phun a mi tla chu bâwlpu rianṭuan ding hen Thudantuk Bâwm lakah thuneitu siding leh a min hen malsâwmnâk simtu ding hen a ruat na. Chu chu an rianṭuan asi kumza.

⁹ Churuangah asi, Levi phun tla chu phun dang hâwi hen ram an nei lo mi chu; LALPA nan Pathian nih thu a tiamh hâwi hen LALPA bâwlpu tla tawng mi chu an tâ asi bâk ko.)

¹⁰ “A lânah mi hâwitê hen tlângah chun ni sâwmli leh zân sâwmli ka râu. LALPA nih veih ding a nan duh na lo le, ka thu a ngâi nawlh fâwn.

¹¹ Churawhchun, a nan thlâk natu sinah pêk ding hen thu a tiamh mi ram chu nan va luah khonâk ding hen nanmah tla a nan rui na ding hen hawng ka simh.

Pathian Nih A Ngiar Mi Chu

¹² “Tuah Israel mi tla, LALPA nan Pathian nih a nan ngiar na mi chu ngâi u: LALPA chu sawnh ule, thu a nan pêk na mi zawng chu ti u, amah chu nan thinlung zawzawng hen dâwt ule, a nâwl zulh u,

¹³ a dân zawzawng tla zûl u. Nanmah ṭhatnâk ding ah tusûn hin ka nan pêk na asi.

¹⁴ Vân a sâng chem mi leh tual lakah mi thil zawzawng LALPA tâ asi.

¹⁵ Sikhawmsele LALPA nih nan thlâktu tla a dâwt zia chu thungâi a fâk le, phundang tla ngâk hen an thîm dauh na le, nannih chu a mi thîm tla nan si.

¹⁶ Churuangah chun LALPA thu ngâi ule, nan lung khungtir lah u rawh.

¹⁷ LALPA nan Pathian chu pathian zawzawng lâirêltu leh thiltikhonâk lakah Chungnungchem asi. Anih chu a chak hen a rokual le, ṭih ding mi tak asi. Mi thliar leh dang a nei lo le, nawhnâk khawm a lâk lo.

¹⁸ Ngâkṭah leh numei tla a dâwt na, kan sinah ramdang minung um mi tla khawm a dâwt le, ei ding leh nipuan tla a pêk na.

¹⁹ Churuangchun ramdang minung tla chu dâwt na ule, nannih khawm veikhat Aigupta ram ah nan va um bâk rawh ruangah.

²⁰ LALPA nan Pathian thu cho ngâi ule, amah cho sawnh u. A sinah zumhkâi tak hen um ule, amah min cho hen thutiamnâk nei u.

²¹ Sawr u, anih chu nan Pathian asi, thilchê rokual tak an ti piak na mi chu nan mit ngelchel hen nan muh asi.

²² Aigupta ram ah a nan thlâk natu tla an kal liau chun sâwmsarih cho an tling. Tu lam chun LALPA nan Pathian nih vân ah ârfi zat an pungtir na rawh.