DANIAL 6 - Bawm Common Language Bible Version

Danial Chakei Pûk Ah A Um Mi

¹ Darias nih a ram pumpi sungah lâirêltu zâ leh kul ruat na ding hen thu a thlûk.

² Chu nûnah Danial leh midang panih governor tla hotu ding leh lal duhzia leikâng titu ding hen a thîm na.

³ Danial chu midang zauhkhenhtu mawh governor tla ngâk hen a rianṭuan ṭha dauh hen a lang, midang ngâk hen muisung dauh hen a um ruangah lal nih ram pumpi ah thuneitu dauh hen a ruat.

⁴ Churawhchun, zauhdiktu tla leh lâirêltu tla nih Danial chu ram lakah a rianṭuannâk lakah a diklo nâk an hâwl le, sikhawmsele Danial chu mi zumh tlâk asi ruangah diklonâk zeikhawm a ti lo le, zumhkâilonâk khawm a lakah a um lo ruangah zeikhawm an ti kho lo.

⁵ Churawhchun, thu anna ruah le, “Danial chu a phung leikâng thu lakah asi lo chun phiar khonâk zeikhawm kan tawng kho ding asi lo,” an ti.

⁶ Churawhchun, lal sinah an va kal le, a sinah, “Lal Darias, na lalnâk um kumza seh!

⁷ Na ram sungah um mi zawzawng nih zauhdiktu tla, governor tla, lieutenant governor tla leh rianṭuantu zawzawng nih khauh tak hen thu na suah ding hen rem kan ti, ni sâwmthum kar chu âukhawm zei pathian sin khawm ah mawh zei minung sin khawm ah, nangmah lal sin cho lo chu zei thil khawm deih lo ding hen thu suah. Chu lakah âuzawng buartu chu chakeibaknei pûk ah lawnh ding hen thu suah.

⁸ Churawhchun, nang lal nih hi thu hi suah hen na min rîn le, Medes leh Persia dân lakah khauh tak lêt kho lo mi asi lai,” an ti.

⁹ Chun, lal Darias nih chu thu suah lakah a min a rîn rawh.

¹⁰ Churawhchun, lal nih a min a rîn rawh ti Danial nih a theih rawh chun in leiah a lâwi le, a umnâk in chawnh tlûnah Jerusalem hawi hen langawtkawt a um, chunah chun a ti kumza hâwi hen nisiar ni khat lâi ah veithum vima thla a cham.

¹¹ Chun, Danial mêlma tla nih thla a cham mi an muh rawh chun,

¹² an ektê hen amah phiar ding hen lal sinah an kal, annih nih chun lal sinah, “Bâwipa, ni sâwmthum hawng um ding mi lakah âuzawng nih nangmah sin cho lo chu pathian sinah mawh minung sinah mawh thil deihtu chu chakeibaknei pûk ah lawnh ding ti hen na min na rîn asi lo mazei mu?” an ti. Lal nih a sâng le, “Si ta a, Medes leh Persia dân lêt kho lo mi thupêk bir tak asi,” a ti.

¹³ Churawhchun, lal sinah, “Danial, Juda lakah mi saltâng pakhat nih, nangmah lal nih thu na pêk mi thusuah a ngâilo, khauh tak hen ni khat ah veithum thla a cham,” an ti.

¹⁴ Chu thu chu lal nih a theih rawh chun a thinlung a râwk thlo, a chelh ri hen Danial chu hum khonâk kâng a hâwl, nî tlâk tiang hen â ṭang.

¹⁵ Churawhchun, chu minung tla chu an lal sinah, an hawng kîr nawlh le, a sinah, “Bâwipa, Medes leh Persia dân tla lakah lal nih dân a suah mi chu lêt kho lo ti na theih asi,” an ti.

¹⁶ Churawhchun, lal nih Danial chu tleih hen chakeibaknei pûk ah lawnh ding hen thu a pêk rawh. Lal nih Danial sinah, “Na Pathian, zumhkâi tak hen a rian na ṭuan mi nih a nan hum seh,” a ti.

¹⁷ Chun Danial chu âukhawm nih suah kho lo ding hen lung hen pûk chu an sinh le, lal nih amah lal singsiahnâk leh a milian tla singsiahnâk hen chu lung chu a singsiah.

¹⁸ Churawhchun, lal chu a in leiah a kîr le, it kho lo hen khua a dei ver le, buh khawm a ei lo, amah lawmhnâk khawm zeikhawm timhtuah asi lo.

¹⁹ Khua a dei kâ hen lal chu mawhsareh hen pûk leiah a va kal rawh.

²⁰ Chunah a va tleng rawh chun, siherh tak hen, “Danial Pathian nung to-aw! Zumhkâi tak hen a rian na ṭuan mi Pathian nih chakeibaknei lakah a nan hum kho ma?” ti hen a auh.

²¹ Danial nih a sâng le, “Bâwipa, dam kumza rawh!

²² Pathian nih a vânmifial a hawng fial le, chakeibaknei nih hawng ka seh kho lo ding hen an kâ a chîp piak pang, hi hi thilsual ka ti lo ruangah leh nang lal tlûnah khawm thil pawi ka tilo ti a theih ruangah a ti mi asi,” a ti.

²³ Lal chu thungâi â lâwm le, khursung ah mi Danial chu suah ding hen thu a pêk. Churawhchun, an suah le, Pathian a zumh ruangah zeikhawm a pawi lo ti an muh.

²⁴ Churawhchun, lal nih Danial phiartu tla chu an nupi leh an fa tla hen tleih na hen chakeibaknei pûk ah lawnh na ding hen thu a suah le, khurtaw an tleng lânah chakeibaknei tla nih an dawmh sawm na le, an ruh tla an ṭam ver.

²⁵ Churawhchun, lal Darias nih phun kip, chi kip leh hawlh kip sinah lasuikuat a rîn le, a kuat rawh: “Chibai!

²⁶ Ka ram pumpi sungah mikip nih Danial Pathian ṭih leh zah ding hen thu kan pêk na. “Anih chu Pathian nung asi le, lâi a rêl kumza lai. A ram chu a vei lai lo le, a thiltikhonâk nih dawngh a nei lai lo.

²⁷ A hum hen ruang a suah, vân ah leh tual tlûnah a thilchê rokual a ti. Danial khawm chakeibaknei nih thah lo hen a hum,” a ti.

²⁸ Danial chu Darias leh Kirus Persia mi nih lâi an rêl kar zawng chu a sul-le-lam a tluang vima.