DANIAL 5 - Bawm Common Language Bible Version

Lal Belsazar Puai Tuahnâk

¹ Zân khat chu Belsazar nih a milian sâng khat puai rokual tak munkhat dûm ding hen a sâwm na le, munkhat hen uain an din.

² An din liau chun Belsazar nih a pa Nebukadnezar nih Jerusalem Biakin thawk hen a lâk mi ngûn leh tangka hâi leh khêng tla va lâk ding hen thu a suah. Lal nih a lâktir na mi chu amah leh a milian tla, a nupi leh a nupisûn tla nih dinnâk ah mang ding hen.

³ Ngûn leh khêng tla an hawng lûtpi kâ hen, chu hen chun uain tla an din le,

⁴ pathian tla, ngûn, tangka, thîr thing leh lung tla hen siam mi chu an sawr na.

⁵ Lâkkhatko ah khâwnvâr chêu umnâk vâm lakah puan bêk mi lakah minung kut hen lasuirîn mi a hawng lang sawm, chu kut hen rîn mi chu lal nih a muh sawm.

⁶ Mawhsareh hen a hawng dâng ver le, a ṭih tuktarâi ruangah a khûp tla â nîn.

⁷ Dâwithiam tla, mitdâwi thiam tla, vân lei theihtu tla kawh na ding hen mi a fial chawlh na, an hawng lût rawh chun lal nih an sinah, “Âuzawng hi lasuirîn rêl khotu leh simhfiang khotu chu lal thuam puan senduk mi hen thuamh asi lai le, zahkâinâk ngûn chikchîn a ngâwng ah awih hen lalram sungah thuneih lakah pathumnâk asi lai,” a ti.

⁸ Lal krai pêktu tla nih an hawng naih le, sikhawmsele chu lasuirîn chu rêl hen lal rangah simhfiang khotu âukhawm an um lo.

⁹ A lawksawng tuk ah lal Belsazar chu a dâng dadauh, a milian tla khawm nih a ti zia an theih lo.

¹⁰ Lalnu nih lal leh a milian tla hâu a theih le, puai tuahnâk kardang sungah a va lût rawh, anih nih chun, “Bâwipa dam kumza rawh! Na thinlung nawk ruangah dâng rê hen um lah.

¹¹ Na ram sungah pathian thenhlimh tla thlarau nei mi pakhat a um, na pa dam liau khawm chu minung nih finghnâk ṭha, theihthiamnâk, pathian tla finghnâk hâwi mi a muhtir. Churawhchun, na pa lal Nebukadnezar nih chamchawh thiam tla, mitdâwi thiam tla, dâwithiam tla leh vân leikâng theihtu tla tlûnah anih chu a siah.

¹² Mi ngâk hen a lei hen thiltikhonâk nei mi asi le, a fing hen mang simhfiang a thiam le, theihfiang khonâk leh thuthup a simhfiang kho; chu minung chu Danial lal nih a min ah Beltesazar an ti mi chu va kawhtir na le, anih nih chubang umzia chu a nan simhfiang lai,” a ti.

Danial Nih Lasuirîn Mi Chu A Simhfiang

¹³ Danial chu mawhsareh hen lal sinah an hawngpi le, lal nih a sinah, ‘Nang hi ma Danial, Juda mi saltâng, Juda ram thawk hen ka pa nih hinah an put mi ma na si?

¹⁴ Na thâwng ka theih dân hen pathian thenhlimh tla thlarau na lakah a um le, thiamnâk, theihnâk leh finghnâk na nei ti ka theih.

¹⁵ Krai pêktu, mitdâwi thiam tla, hi lasuirîn hi simfiang ding hen ka kawh na le, sikhawmsele a umzia an simfiang kho lo.

¹⁶ Tuah nang lam nih chun thilthup leh thuthup na simhfiang kho ti ka theih, hi lasuirîn hi na rêl kho hen a umzia na ka simhfiang kho asi chun, lal thuam puan senduk hen thuamh na si lai le, na ngâwng ah zahkâinâk chikchîn awihtir na si lai le, lalram sungah thuneihnâk leikângah pathumnâk na si lai,” a ti.

¹⁷ Danial nih a sâng le, “Na lâwmman pêk ding chu na rangah a siah le, a si lo leh midang rangah pêk le, nangmah lal rangah ka nan rêl piak lai le, zeise â rîn a umzia zei asi, kan simhfiang lai.

¹⁸ “Pathian rokual nih na pa Nebukadnezar chu lal rokual takah a siam le, zahkâinâk leh lalnâk a pêk.

¹⁹ A rokual tuktarâi ruangah phun zawzawng leh zât zawzawng leh hawlh zawzawng nih an ṭih le, an thîr. Thah ding a duh mi chu a thah na, nungtir ding a duh mi chu a nunh na. A duh mi zawng zahkâi hen khawm a tuah, ningzak khawm a saih na.

²⁰ Sikhawmsele a hawng a zûm le, simh ngâilo hen lungkhung hen ṭhatlo a rawt le, a laltophah lakah mi thlâk hen a um le, zahkâi mun ah mi chu a vei rawh.

²¹ Minung lakah mi chu nar hen a um le, ran thinlung put hen a hawng um, mâng ah mi sanatung sinah a um le, chawchal hâwi hen belh a ei le, a sanhtu umlonâk lênglei ah dâmtî tlâ nâk ah a it, a dawnghnâk ah chun Pathian rokual nih minung lalnâk ram tlûnah thu a nei hen a duh mi zawng sinah a pêk kho ti a theih.

²² “Sikhawmsele nang, a fapa nih, hi thu zawzawng na theih khawm ah nâunâk thinlung na nei lo.

²³ Vân ah mi Lalpa duh lo kâng hen thil na ti le, a Biakin ah mi hâi leh khêng tla na lâk, nang, na milian tla, na nupi tla, na nupisûn tla hen uain dinnâk ah nan mang le, pathian tla, ngûn, tangka, dâr, thîr, thing leh lung hen siam mi muh kho lo mi, zeikhawm theihlo mi pathian tla nan sawr. Sikhawmsele, na thih leh na dam thu ah thuneitu leh thil na ti mi zeizawng lakah thuneitu Pathian chu na zah lo.

²⁴ Churuangah asi, Pathian nih hi thu rîn ding hen kut a hawng fial mi chu.

²⁵ “Hi hi thurîn chu asi: Mene, Mene, Tekel, Upharsin (Number, number, khîng, ṭhenkhuainâk) ti asi.

²⁶ A umzia chu hi hi asi: Mene, Mene,(Number) Pathian nih na lalnâk ni tla a rêl le, a dawngtir rawh;

²⁷ Tekel (khîng) khîng hen a nan khîngh le, na zâng tuktarâi hen na lang le;

²⁸ Upharsin (ṭhenkhuainâk) na lalram chu ṭhen hen Medes leh Persia sinah pêk âsi rawh,” a ti.

²⁹ Mawhsareh hen Belsazar nih a to-aw tla sinah Danial rangah lal puan senduk thuamh hen a ngâwng ah ngûn chikchîn awih ding hen thu a pêk na. Chun a lalram sungah thuneitu lakah pathumnâk ah a siah.

³⁰ Chu zân takah chun Belsazar, Babulon lalchem chu thah hen a um le,

³¹ churawhchun Darias Mede mi kum sâwmruk leh kum nih mi nih lal thuneihnâk chu â ting rawh.