DANIAL 2 - Bawm Common Language Bible Version

Nebukadnezar Mang

¹ Nebukadnezar chu a lal mi, a kum nihnâk ah mang a nei. Chu nih chun a lawk a sawngtir le, a it kho lo le,

² churawhchun chamchawh thiam tla, mitdâwi thiam tla, dâwi thiam tla, thilchê thiam mi tla chu a mang simhfiangtu ding hen a kawh na. An hawng le, lal mâika ah an dîr rawh chun,

³ “Mang ka nei mi thu ah thungâi ka lawksawng, zei tinâk tak me asi theih ding ka duh,” a ti.

⁴ Lal chu Aramaik hawlh hen an sâng le, “Bâwipa, dam kumza rawh! Na mang chu hawng kan simh le, kan simhfiang piak lai,” an ti.

⁵ Lal nih an sinah, “Ka thinlung ah ka ruat dân hen mang ka manh mi leh a umzia nan hawng ka simhfiang ding asi. Nan simhfiang kho lo asi chun, nan kut kê ka thlêk ver lai le, nan in tla khawm nâwmpawng ah ka siam awt.

⁶ Sikhawmsele mang leh a umzia nan hawng ka simhfiang kho asi chun lâwmman kan pêk na lai le, zahkâi tak hen kan siam na lai le, chawnglawmhnâk rokual tak kan pêk na lai. Asi chun tuah mang chu zei asi, a umzia zei hawng ka simh u,” a ti.

⁷ Lal chu an sâng nawlh le, “Bâwipa, mang cho hawng kan simh le, kan simhfiang lai,” an ti.

⁸ Churawhchun, lal nih, “Ka ti rawh mi hâwi hen nan tlâitir salam asi,

⁹ nan simfiang kho lo asi chun bang rang hen ka nan rêp na awt, zeitin mawh thil a hun dangtir nan duh ruangah nanmah lakah âwkrâwl thu hawng ka simh ding hen nanna rual mi asi. Mang chu zei asi ti sim phawt ule, chu tikah a umdân chu nan ka simhfiang kho awt ti ka theih lai,” a ti.

¹⁰ Krai pêktu tla nih an sâng le, “Lal nih theih ding na duh mi chu sim khotu ding hi tual tlûnah pakhat khawm a um lo, zei lal leh mi lianchem leh thiltikho chem tla khawm nih, chamchawh thiam tla, mitdâwi thiam leh dâwithiam tla rangah chu hâwi hen an ngiar dahlo.

¹¹ Lal nih thu na deih mi hi a har tuktarâi ruangah minung lakah umlo mi pathian tla cho lo nih chun âukhawm nih ti kho mi zât asi lo,” an ti.

¹² Churawhchun, lal chu a thinthawk tuktarâi le, Babulon ram ah krai pêktu zawzawng tla chu thah hep ding hen thu a pêk.

¹³ Churawhchun, an ektê thah ding thupêk lakah chun Danial leh a hâwi tla khawm anna tel bâk.

Pathian Nih Mang Umzia Danial Rangah A Theihtirnâk

¹⁴ Churawhchun, Danial chu lal hotu vêngtu Ariok, thahnâk thu pêktu sinah a va kal rawh, thiamthih tak hen Ariok sinah,

¹⁵ “Zei ruangah me lal nih chu hâwi thupêk ṭihnungkâi chu a suah êu le,” a ti. Ariok nih Danial chu thil a hawng umdân tla chu a simh.

¹⁶ Danial chu a va kal sawm le, mang chu lal rangah sim kho ding hen a tik tlâitir dauh ding hen a deih.

¹⁷ Churawhchun, Danial chu in leiah a lâwi le, a hâwi Hananiah, Misael leh Azariah tla chu thil hawng um mi thu tla a simh na.

¹⁸ Vân Pathian sinah khuaruatnâk ding hen, Babulon ram ah lal krai pêktu tla hen thah an si lonâk ding leh lal chu simhfiang kho ding hen thlacham ding hen a simh na.

¹⁹ Chu zân lîlâ ah chun Danial nih langhnâk a muh mi lakah lal chu a muh sih le, vân Pathian sawr hen a muh rawh. Danial nih,

²⁰ “Pathian chu a fing hen thil a tikho a! Kumleza hen amah chu sawr kumza u.

²¹ Tik-le-rî tla a duh duh hen a siam le; lal tla a thu thu hen a siam hen a lawnh, finghnâk leh theihthiamnâk pêktu chu asi.

²² Thil thûk leh â thup mi langhtu asi; mûi lakah thilthup tla a theih le, chêunâk nih amah chu a kulh dak.

²³ Hawng ka thlâktu Pathian, kan zah hen kan sawr asi. Nangnih finghnâk leh chaknâk hawng ka pêk asi. Ka thlachamnâk chu na ka sâng le, lal rangah simh ding hen na hawng kan muhtir,” a ti.

Danial Nih Lal Mang Chu A Sim Le, A Simhfiang

²⁴ Churawhchun, Danial chu lal krai pêktu tla thahnâk ding hen thupêktu Ariok sinah a va kal le, a sinah, “Thah na lah rih, lal sinah hawng ka kalpi le, mang umzia chu lal ka simhfiang lai,” a ti.

²⁵ Mawhsareh hen Ariok nih Danial chu lalchem Nebukadnezar mâika ah a va kalpi le, lal sinah, “Juda saltâng mi lakah lal nih mang na manh mi simhfiang khotu ka tawng rawh,” ti hen a simh.

²⁶ Lal nih chun Danial, (Beltesazar an ti mi) sinah, “Mang ka manh mi leh a simhfiangnâk na sim kho lai ma?” a ti.

²⁷ Danial nih a sâng le, “Bâwipa, nang rangah simh khotu ding hen mifing mitdâwi thiam, chamchawh thiam mawh vânlei thil theih khotu mawh âukhawm an um lo.

²⁸ Sikhawmsele lal rangah muhtirtu vân Pathian a um, hi nûn mâilei thil a hawng um ding mi lal nangmah rangah a nan theihtir mi asi, tuah langhnâk na muh mi leh mang na it liauah na manh mi chu kan simh lai.

²⁹ Na it liauah, mâilei ah thil a hawng tlung ding mi mang leiah na muh le; Pathian nih thil a hawng tlung ding mi nangmah lal rangah a nan muhtir mi asi. Hi thuthup hi ka sinah langh hen a um le,

³⁰ tuah ka sinah hi thuthup hi midang ngâk hen fing khun mi khawm kasi lo, sikhawmsele, nang, lal nih na theih khonâk ding leh na dawn mi tla theihthiamnâk ding ruangah asi.

³¹ Lal nih langhnâk na muh mi chu, na mâika ah minung lem lian tak tlêu durh leh lek zur mi zauh hen ṭihnungkâi tak na muh.

³² A lû chu ngûn ṭha chem hen siam mi asi, a ir leh a bân tla chu tangkasa asi, a tâi leh a tawkâwng chu dâr asi.

³³ A kê tla chu thîr asi, a kê chu a khing thîr a khing valei asi.

³⁴ Na zauh liau chirah âu tawngh tham lo hen lung lianpi a hawng rîl le,

³⁵ thîr leh valei, dâr, tangkasa, ngûn tla chu a mân le, ṭhalpini ah fâng zâpnâk mun ah mi vûisadip hâwi hen an um hep, thli nih a sêm phin, sikhawmsele chu lung chu a hawng lian le, tual pumpi a luah hep.

³⁶ Chu chu mang chu asi, tuah a simhfiangnâk nang lal rangah kan simh lai.

³⁷ Bâwipa, lal zawzawng lakah a lianchem mi na si, vân Pathian nih lal ah an siam le, thiltikhonâk, chaknâk leh zahkâinâk a nan pêk.

³⁸ Tual tlûnah um mi zawzawng ramsa leh va tla tlûnah lâirêltu ah a nan siam. Nang chu ngûn lû chu na si.

³⁹ Na nehnûnah nangmah ngâk hen a mê dauh mi lalram a hawng dîr lai, chu nûnah a pathumnâk dâr lalram nih tual pumpi ah lâi a rêl lai.

⁴⁰ Chu tikah lalram pali a hawng um lai le, thîr hâwi hen a khauh lai le, thîr khauh tak nih thil zeizawng a siat leh a râwk mi hâwi hen a lânah mi lalram chu a râwk hen a siat lai.

⁴¹ A kezaphah a khing thîr a khing valei khawm na muh ber, chu umzia chu ram ṭhen dip hen a um ding mi asi, a zeimaw mi nih thîr chak nei mi asi lai, thîr hen valei chawmh mi asi ruangah.

⁴² A kê mar a khing thîr a khing valei umzia chu ram khing khuai a chak lai le, a khingkhuai a chak lai lo tinâk asi.

⁴³ Thîr leh valei â chawmh mi khawm na muh ber. Chu nih chun chu lalram mi tla chu dâwngsungkhur khat ah a tlâi ding hen nupi pasal anna umh tawnh lai tinâk asi le, sikhawmsele tikho asi lai lo, thîr leh valei â châwm kholo mi hâwi hen.

⁴⁴ Chu liau lâirêltu san ah vân Pathian nih ram a hawng dirh lai. Dawngh ti a um lai lo rawh, neh hen a um lai lo rawh le, lalram zawzawng râwk hep hen a um lai le, zungzâl hen a um kumza lai rawh.

⁴⁵ Âu tawngh tham lo hen lung a beuh le, a hawng rîl mi nih milem, thîr, dâr, valei, tangkasa, ngûn hen siam mi a denh mi na muh. Pathian rokual nih hi nûnthâi ah thil a hawng tlung ding mi nang lal rangah a nan simh mi asi. Na mang na manh mi tak leh a simfiangnâk chu ka nan simh hen ka nan pêk rawh asi,” a ti.

Lal Nih Danial Rangah Lâwmman A Pêk

⁴⁶ Churawhchun, lal Nebukadnezar chu tual ah a buk le, Danial sinah bâwlnâk leh thil ap pêk ding hen thu a pêk.

⁴⁷ Lal nih, “Na Pathian chu pathian zawzawng lakah a rokual chem le, lal tla tlûnah Lal asi le, thilthup tla langhtu asi. Thilthup na simhfiang ruangah chu chu ka theih mi asi,” a ti.

⁴⁸ Churawhchun, Danial chu mun sâng tak a pêk le, thil ṭha tatak a pêk le, Babulon ram ṭhen lakah hotu ah a siam le, lal krai pêktu zawzawng tlûnah hotu ah a siam.

⁴⁹ Danial nih a ngiar mi hâwi hen lal nih Sadrak, Mesak, leh Abednego khawm Babulon ram ṭhen zawzawngah zauhkhenhtu an si, Danial chu zeiliau zawng ah lal lâirêlnâk ah a um kumza.