AMOS 8 - Bawm Common Language Bible Version

Langhnâk Ah Thei Rah Bâwm

¹ LALPA Zahkâi sinah mi langhnâk ka nei nawlh. Chunah chun theirah bâwm ka muh.

² LALPA nih, “Amos, zei na muh?” hawng ka ti. “Theirah bâwm khat,” ti hen ka sâng. LALPA nih ka sinah, “Ka mi Israel rangah a dawnghnâk a hawng tlung. Ka rêp na ding mi lakah ka lêt ding asi lo.

³ Chu ni ah chun lal in ah la saknâk mun chu âu nâk leh lungfâknâk mun a si lai. Mun kip ah mithi ruak a um lai. Dâisip hen an lawnh na lai,” a ti.

Israel Râwk Leh Siatnâk

⁴ Nannih mipâm lamhbêktu leh ram lakah mipâm veih ding tumtu tla, hi hi ngâi u.

⁵ Nan thinlung ah, kan fâng tla kan zuar khonâk ding hen ni thenhlimh len ding mi kan ngâk rarâm lai. Thil zuar dawmh ding hen Dinhni hi zeitik ah â lîm awt le? A leiba tawng ding hen khîng diklo kan mang lai le, thil hawng kan châwktu tla khîng thlâi lakah kan perpet na lai.

⁶ A man dêng lo rê kan fâng man tla a leiluat a sâng hen kan zuar kho lai. Mipâm, a leiba sam kholotu kan tawng lai le, a pheikawk bawp khat man men pêk kholotu pa chu sal ah kan châwk lai,” nan ti.

⁷ LALPA, Israel Pathian nih chun thu a tiamh rawh, “An thilsual ti chu ka philh kho ding asi lo.

⁸ Churuangah tual â nîn lai le, ram lakah minung tla hamh tak hen an um lai. Ram pumpi â nîn lai le, Nile Tiva tî hâwi hen a thawk thulh a tlû thulh lai.

⁹ Sûn chirah nî ka tlâktir ding mi leh sûn chirah tual ka mûitir ding tik a tlung awt rawh. Kei, LALPA Zahkâi nih chu chu ka sim mi asi.

¹⁰ Nan kût ni tla chu mithi vûi ni ah ka changtir lai le, nanna lâwmnâk la chu ngaihsia hen âunâk ah ka changtir lai. Nan lû ka mêt lai le, salâpuan kan aihtir na lai. Nu leh pa nih an fapa an neihlem mi thihnâk ruangah an lungfâk mi hâwi asi lai. Chu ni chu khâtîk hen a dawng lai.

¹¹ “Ram sungah pâm ka hawng tlungtir ding tik a nâi rawh. Mi tla chu sang ruang silo hen an sung a vâng lai le, tî ruang silo hen an ti a hâl lai, LALPA thuchah duh hen an tî a hâl hen an sung a vâng lai. Kei, LALPA nih ka sim mi asi.

¹² Mi zapi tla chu marlei thawk hen simlei kângah, saklei thawk hen thlanglei ah an vâi sup lai, LALPA thuchah mun kip thawk hen an hâwl lai le, sikhawmsele an tawng lai lo.

¹³ Chu ni ah chun nungâk leh tlangvâl ṭhisel tak men tîhâl ruangah an tlû lai.

¹⁴ Samaria ah mi milem sâl hen thutiamtu tla, ‘Dan pathian’ min sâl hen thutiamtu tla, ‘Bersheba pathian’ min sâl hen thutiamtu tla chu an tlû lai le, an thawk nawlh lai lo rawh,” a ti.