AMOS 7 - Bawm Common Language Bible Version

Langhnâk Ah Khâubawk Tla Muhnâk

¹ LALPA Zahkâi sinah mi langhnâk ka nei. Chunah chun lal vo fapawn an ât thluh nûnah leh belh tla chawrh ding anna dawmh liauah khâubawk hutum a umtir mi ka muh.

² Chu langhnâk ka nei mi lakah chun khâubawk nih thil ring ram lakah mi a ei hep mi ka muh le, churawhchun kei nih, “LALPA Zahkâi, na mi tla ngaihdam na rawh, zeitin an him kho zia lai? An tâwm hen an chak lo thlo mi!” ka ti.

³ LALPA nih a thinlung a lêt le, “Na muh mi chu a hawng tlung lai lo,” a ti.

Langhnâk Ah Mei Muhnâk

⁴ LALPA Zahkâi sinah mi langhnâk ka nei fâwn. Chunah chun a mi tla mei hen a rêp na awt mi ka muh. Tual tangah tisumsumriat rokual tak chu mei nih a khangh le, ram tla chu kâng ding hen a dawmh rawh.

⁵ Churawhchun, kei nih, “LALPA Pathian, ti lah râu rawh! Zeitin na mi tla an dam kho lai? Anmah tâ nih an tâwm hen an chak lo mi!” ka ti.

⁶ LALPA nih a thinlung a lêt le, “Hi khawm hi a hawng tlung ber lai lo,” a ti.

Langhnâk Ah Tahnâk Rî Muhnâk

⁷ LALPA sinah mi langhnâk ka nei le, chunah chun vâm pakhat tahnâk rî hen sak mi kiangah tahnâk rî a kut ah put hen dîr mi ka muh.

⁸ Anih nih, “Amos, zei na muh?” ti hen hawng ka deih. Kei nih ka sâng le, “Tahnâk rî,” ka ti. Churawhchun, anih nih “Rî hen tahlo mi vâm an sizia langhtir ding ka tum mi asi. Anmah ka rêp na awt mi thinlung ka lêt awtlo.

⁹ Isak thlâk tla nih an sawnhnâk mun tla chu râwk asi lai. Israel tla mun thenhlimh chu râwk hen a um lai. Jeroboam lal sinâk chu ka dawnghtir lai,” a ti.

Amos Leh Amaziah

¹⁰ Bethel mi bâwlpu Amaziah nih Jeroboam Israel lal sinah theihtirnâk thu a thanh: “Mi le tla sinah Amos nih a nan phiar, a thusim nih ram a râwk ver awt.

¹¹ A thusim chu hi hi asi: Jeroboam chu râltuknâk ah a thi lai le, Israel mi tla chu an ram thawk hen sal ah put hen an um lai,” a ti.

¹² Churawhchun, Amaziah nih Amos sinah, “Khuavâng, â tâwk rawh! Juda ram leiah kîr le, chunah va sim, na sim mi man an pêk seh.

¹³ Hi Bethel ah hin thu sim lah rawh, hi hi phun tla Biakin lal nih a sawnhnâk in asi,” a ti.

¹⁴ Amos nih a sâng le, “A man duh hen thusimtu khuavâng kasi lo. Kei chu ranrual zauhkhenhtu leh theipi kûng zauhkhenhtu kasi.

¹⁵ Sikhawmsele LALPA nih dawrâ ka vêngnâk ah mi hawng ka lâk le, a mi Israel tla sinah kal hen thu sim ding hen thu hawng ka pêk.

¹⁶ Churuangah tuah LALPA thusim chu ngâi rawh, ka thusim leh Israel tla tlûnah thinthawknâk chu bâng ding lam na hawng ka simh rih.

¹⁷ Churuangah Amaziah, LALPA nih thu a nan simh asi, ‘Na nupi chu khualâi tlângah â zuar mi asi lai, na fa tla chu râltuknâk ah thah hen an um lai. Na ram chu an ṭhen phin lai le, midang tla sinah pêk hen a um lai le, nangmah khawm lunglotu ram ah na thi lai. Israel mi tla chu an ram ah mi sal ah put an si lai,” a ti.