AMOS 6 - Bawm Common Language Bible Version

Israel Tla Siatnâk

¹ Nannih Zion ah nuamchenhtu tla leh Samaria ah him tak a um ding hen ruattu Israel phun lakah mi rokual rangah ṭihnung a kâi awt chiam e, nannih chubang tla sinah ṭangpi deih hen kaltu tla!

² Kalneh khuapi ah kal le va zauh. Churawhchun, Hamat khuapi rokual ah va kal le, Philistia khuapi Gath ah va kal, Israel leh Juda ram ngâk hen ṭhat dauhnâk an nei ma? Nan ram ngâk hen an ram chu a kâu dauh ma?

³ Chu siatnâk a hawng tlung ding mi lakah chun va a pêk ding nan duh lo. Zeital ti khawm ule, chu ni hawng tlung ding chu a nâi dadauh asi.

⁴ Nannih nuamchenh a it hen, puan phah tlûnah dawrâ fa puai eitu!

⁵ David nih a ti mi hâwi hen ṭingṭang tum hen la phuak hen sak duhtu tla, nan rangah ṭihnung a kâi awt chiam e!

⁶ Uain chu hâi khat dil hen nan din le, rimthâw ṭha chem nan mang le, sikhawmsele Israel tla siatnâk thu ah lungfâknâk nan nei lo.

⁷ Churuang chun sal ah kal mi lakah a masa chem nan si lai. Nan din ei leh puai tuah tla a dawng lai rawh.

⁸ LALPA Pathian, Zeizawng tikho nih hi simhkannâk a pêk mi asi: “Israel mi tla anna zûmnâk chu ka hua, an nuamchenhnâk mun chu zeikhawm ka siar lo. An khuapi chem sungah um mi zawzawng chu an mêlma rangah ka pêk awt,” a ti.

⁹ Dâwngsungkhur ah parâ thibang um khawmsele an thi lai.

¹⁰ A thi mi tla unau pakhat ruak vûitu a um lai le, anih nih in ah mi ruak chu a lâk lai. Chu nih chun in ah a thibang âutal a um mi chu, “Na sinah midang tla an um ma?” ti hen a auh lai. A sângtu hâu nih chun, “A um lo!” ti hen a sâng lai. Churawhchun, unau â chang mi nih, “Dâisip! LALPA min sim ding ko men kanna thiamthih ual ding asi,” a ti.

¹¹ LALPA nih thu a hawng pêk mi lakah chun, in lian leh in tê tla a râwk dep lai.

¹² Lung tlûnah rang a tek lai ma? Mi nih chawchal hen tipi an nâwn ma? Sikhawmsele repnâk chu tûr ah nan changtir le, diknâk chu diklonâk ah nan changtir.

¹³ Lodebar khuapi nan lâk ruangah nanna khâwng. “Karnaim lâk ding hen kan chak tâwk rerêng,” ti hen nanna zûm.

¹⁴ LALPA Pathian, Zeizawng tikho amah tak nih, “Israel mi tla, nan ram luah ding hen kawrsen tla ka hawng fial awt. Marlei kângah Hamat Liamnâk thawk hen simlei kângah Arabah vakuam tiang an nehsawh na lai,” a ti.