AMOS 5 - Bawm Common Language Bible Version

Rim Ding Hen Kawhnâk

¹ Israel mi tla, mithi vûinâk la kan sak nawh na nâk hi ngâi u:

² Nungâk thenhlimh Israel chu a tlû le, A thawk nawlh rerêng lo rawh! Tual ah lawnh hen a um le, Âukhawm nih an thawh lo.

³ LALPA Zahkâi nih, “Israel khuapi ah mi kawrsen sâng fial asi le, zâ cho an hawng kîr; khuapi dangah mi zâ fial hen an um le, sikhawmsele parâ cho an hawng kîr,” a ti.

⁴ LALPA nih Israel mi tla sinah, “Ka sinah hawng ule, nan nung lai.

⁵ Bersheba ah sawnh ding hen kal lah. Bethel ah hawng ka tawng ding hen a tum lah-- Bethel chu râwk asi lai, Gilgal khawm ah kal lah-- a minung tla chu sal ah kal ding hen vânduainâk ah an um,” a ti.

⁶ LALPA sinah kal u, chu tikah nan nung lai. A sinah nan kal lo chun, Israel mi tla tlûnah mei kâng hâwi hen an phiat dep na lai. Bethel mi tla chu mei nih a kâng lai le, âukhawm nih an mih kho lai lo.

⁷ Nannih diknâk hen rual rêt mi leh midang perpettu tla nan vânduai rawh!

⁸ LALPA nih ârfi tla, Firuk leh Lîkûk chân thum tla a siam na. Mûi chu sûn ah a changtir le, sûn chu zân ah a changtir. Tipi mi tî tla chu a kawh na le, tual tlûnah a thlêt. A min chu LALPA asi.

⁹ Chaknâk leh kulh bir lakah siatnâk a tlungtir.

¹⁰ Nannih hi thudik dotu leh lâirêlnâk ah thudik simtu tla huatu nan si.

¹¹ Mipâm tla nehsawhtu leh an fâng tla lâk piaktu nan si. Churuang chun lungin ṭha tak nan sak mi sungah nan um lai lo le, nan dam sungah mi grep dawh tak nan phun mi hâng khawm nan din lai lo.

¹² Sual ṭihnungkâi tatak nan ti mi leh dân tam tak nan buar mi tla ka theih, mi ṭha tla nan nehsawh na le, nawhnâk nan lâk, mipâm tla khawm lâirêlnâk ah an dik mi khawm diklo hen nan tuah na.

¹³ Churuang chun sualnâk ti liauah dâisip hen um chu thilti finghkâi tak asi!

¹⁴ Na nung khonâk ding hen thilsual ti tumlo hen thil dik ti tum rawh. LALPA Pathian zeizawng tikhotu chu na sim mi hâwi hen amah chu na sinah a um lai.

¹⁵ Sual chu hua le, thil dik chu duh le, lâirêlnâk ah chun diknâk hi dingchangnâk asi ti theih rawh. Hi phun thibang um rih mi tla sinah hin LALPA nih khua a ruat lai dahmawh.

¹⁶ Churuangah LALPA Pathian, Zeizawng tikho nih, “Khuapi sungah ngaihsia hen âunâk leh lungfâknâk a um lai. Phâisen tuahtu tla chu a thi mi ruangah ulhtu tla sinah kawh an si lai.

¹⁷ Grep min tla khawm ah lungfâknâk a um lai, an rêp na ding hen ka hawng ruangah chubang zawzawng chu a hawng tlung lai,” a ti. Chu chu LALPA nih a sim mi asi.

¹⁸ LALPA ni mawhlahtu tla rangah ṭihnung a kâi awt chiam e! Chu ni chu nan rangah zei a ṭhatnâk a um awt? Nan rangah chu ni chu chêu ni silo hen mûinâk ni asi lai.

¹⁹ Mi, chakeibaknei thawk hen a tek le, vawm hen anna tawng mi hâwi mawh, mi in leiah a tlung le, vâm a tham le, rûl nih a chuk mi hâwi bang hen!

²⁰ LALPA ni nih chun chêu silo hen mûinâk a hawng tlungtir awt, chêunâk umlo thlo hen mûi khup hen um ni asi lai.

²¹ LALPA nih, “Nan kût ni khua tla chu ka huatkâng tak asi, chubang chu kei um khonâk asi lo!

²² Duah mi thil ap leh sangvut thil ap nan hawng put khawm ah ka pawm lai lo; ran bit tal hen nan châwm mi ka sinah nan hawng put mi khawm ka pawm awtlo.

²³ Hâu suah hen la nan sak mi bâng ule; nan ṭingṭang rihâu khawm ngâi ding ka duh lo.

²⁴ Chu ngâk hen, diknâk chu tiva hâwi hen luangtir ule, repnâk chu kang dahlo mi tiva hâwi hen umtir u.

²⁵ “Israel mi tla, ramkaro ah kum sâwmli kar ka nan rui na liauah bâwlnâk leh thil ap ka nan deih na lo.

²⁶ Sikhawmsele tu chun, Sakkuth lem, nan lal pathian leh Kaiwan nan ârfi pathian chu,

²⁷ Damaska khua lanh leiah sal ah kan kalpi na tikah chubang milem tla chu nan kalpi lai,” a ti. LALPA, a min Zeizawng tikho, Pathian nih a sim mi asi.