AMOS 3 - Bawm Common Language Bible Version

¹ Israel mi tla, Aigupta ram thawk hen suak mi phun zawzawng nih LALPA nih nan thâwngthâng a sim mi thuchah hi ngâi u:

² “Hi tual tlûnah phun zawzawng lakah nanmah cho hi kan theih na hen kan zauhkhenh na mi chu nan si, chu hâwi mi nan si ruang chun nan sual tla ṭihnung a kâi hen ka nan rêp na san chu asi,” a ti.

Khuavâng Ti Ding Mi Thil

³ A tawng tâ lo hen mi panih munkhat ah khualtlâwng an kal dah tâwn ma?

⁴ Sa seh lo hen tumun ah chakeibaknei a hûk tâwn mazei? Chakeibaknei chak liau khawm thil zeimawh tawnglo hen a pûk ah a lût dah tâwn ma?

⁵ An tarh mi chuk lo hen thang ah va a awh dah tâwn ma? A tawnghtu umlo hen thang a pelh dah tâwn ma?

⁶ Mi tla ningṭihnâk umlo thlo hen khuapi ah râltuk tâwtawrâwt an tum dah tâwn ma? LALPA fial mi silo hen khuapi ah siatnâk a tlung tâwn ma?

⁷ LALPA Zahkâi nih a thiltum a to-aw khuavâng sinah langh tâ lo hen zei thil khawm a ti dahlo.

⁸ Chakeibaknei a hûk liauah âu ṭih lotu a um? LALPA Zahkâi nih thu a sim mi chu âunih a thuchah khap khotu um?

Samaria Vânduainâk

⁹ Aigupta leh Asdod mun ah um mi tla sinah thu sim u, “Samaria kiangkam tlângah a pûm ule, chunah dân buarnâk leh nawknâk tla chu zauh u,” a ti.

¹⁰ LALPA nih, “Hi bang mi tla nih hin dân buar leh siat leh râwk hen thil an lâk mi tla hen an in sung tla an khattir, zumhkâi hen um ding dân khawm an theih loh.

¹¹ Churuangah an mêlma tla nih an ram chu an hual lai le, anna vêngnâk tla chu an râwk lai le, an in tla an rawk lai,” a ti.

¹² LALPA nih, “Chakeibaknei nih dawrâ a seh mi chu dawrâpu nih a kê panih leh nakhaw cho â ting mi hâwi hen, tuah nuam ti tak hen êltu Samaria mi tla chu tâwmtê cho an âwl lai.

¹³ Tuah ngâi ule, Jakob dawngsung tla chu theihtir na u,” LALPA Zahkâi, Zeizawng tikho nih a sim mi asi.

¹⁴ Israel mi tla an sual ruangah ka rêp na ni ah chun Bethel ah mi mâichâm chu ka râwk lai, mâichâm ki kip tla chu â râwk dip lai le, tual ah a tlû lai.

¹⁵ Busik liauah in tla leh ṭhâlpini in tla ka râwk lai. Sâi hâ hen thuamh mi in tla khawm râwk hen a tlû lai le, in lian tatak tla â râwk lai,” a ti.