2 SAMUEL 9 - Bawm Common Language Bible Version

David Leh Mephiboseth

¹ Nikhat chu David nih, “Saul dâwngsung lakah mi pakhat tal an um rih ma aw? A um rih mi asi chun Jonathan ruangah a lakah ṭhat ka suah awt,” a ti.

² Saul dâwngsung lakah mi to-aw pakhat Ziba a um le, chu to-aw rang chun David sinah kal ding hen fial asi. Lalchem nih, “Ziba ma na si?” ti hen a deih. “Ka si, Pu,” ti hen a sâng.

³ David nih Ziba sinah, “Kal le, Saul dâwngsungkhur lakah mi va chek, Pathian sinah ka tiam rawh hâwi hen a lakah ka vêlneihnâk leh zumh ka kâinâk suah ding ka duh,” a ti. Ziba nih a sâng le, “Jonathan fapa lakah a khêng mi pakhat a um,” a ti.

⁴ Lalchem nih, “A zeiah a um?” ti hen a deih. Ziba nih a sâng le, “Amiel fapa Makir, Lodebar ah mi in ah a um,” a ti.

⁵ Churawhchun, lalchem David nih a kawhtir.

⁶ Jonathan fapa, Mephiboseth Saul tupa chu a va tleng rawh chun, David mâika ah zah tak hen a kûn le, mâi a mûk. David nih, “Mephiboseth” a ti le. Anih nih, “Pu, na to-aw kasi,” ti hen a sâng.

⁷ David nih, “Lâu lah, na pa Jonathan ruangah na tlûnah ka vêlneihnâk ka suah awt. Na pu Saul ram zawzawng nangmah ka nan pêk nawlh lai le, ka buh kheng lakah ei ding hen ka nan sâwm kumza lai,” a ti.

⁸ Mephiboseth chu a kûn nawlh le, a sinah, “Pu! Ui ruak khawm ka tluk lo mi, zei zia hi tluk hen ka tlûnah ṭhat na suah?” a ti.

⁹ Churawhchun, Lalchem nih Saul to-aw Ziba chu a kawh le, a sinah, “Na pupa tupa Mephiboseth rangah a dâwngsung leh Saul thilneih zawzawng chu ka pêk rawh.

¹⁰ Nang leh na fapa tla, na to-aw tla nih na pupa dâwngsungkhur rangah phâisen nan tuah lai le, nan ât lai le, an rangah ei leh bâr nan timhtuah piak na ding asi. Mephiboseth lam chu ka buh einâk mun ah ka sinah khual hâwi hen a ei kumza lai,” a ti. (Ziba nih fapa leinga leh to-aw kul a nei.)

¹¹ Ziba nih a sâng le, “Lalchem nih thu na ka pêk mi zawzawng chu ka ti lai,” a ti. Churawhchun, Mephiboseth chu lal fapa tla hâwi hen lal buh einâk mun ah â tel kumza rawh.

¹² Mephiboseth nih fapa ngâksia pakhat a min Mika a nei. Ziba dâwngsungkhur tla zawzawng chu Mephiboseth to-aw an si hep rawh.

¹³ A kê khiang khinih a khêng mi Mephiboseth chu Jerusalem ah a um le, lal buh einâk dawhkân ah a ei rawh.