2 SAMUEL 7 - Bawm Common Language Bible Version

David Sinah Nathan Thusim

¹ David chu a lal in ah a um le, LALPA nih a mêlma zawzawng lakah a hum.

² Lalchem nih chun khuavâng Nathan sinah, “Kei chu sidar thing hen sak mi in ah ka um le, Pathian Thudântuk Bâwm lehlam puanin ah a um,” a ti.

³ Nathan nih a sâng le,“Na thinlung ah a um mi hâwi hen ti ko me, Pathian na sinah a um ko silo ma?” a ti.

⁴ Sikhawmsele, LALPA nih Nathan sinah,

⁵ “Va kal le, ka to-aw David sinah, ‘Nang lam nih chun ka umnâk in na sak lai loh.

⁶ Ka mi Israel tla Aigupta ram ah mi ka suakpi na mi thawk hen tutiang hen ka in ah ka um lo rih, puanin ah um hen ka zî lemang.

⁷ Ka mi Israel ruitu tla sinah chubang ka kalnâk zawng khawm ah zei rangah sidar thing hen in nan hawng ka sak piak lo, ti hen ka sim dahlo,’ a ti.

⁸ “Churuang chun ka to-aw David chu simh le, Kei, LALPA zeizawng tikho nih chun, ‘Dawrâ vêng hen phâisen ah na um liauah ka mi Israel tla lâirêltu ah kan thîm mi asi.

⁹ Na kalnâk zawng ah na sinah ka um le, na mêlma zawzawng tla ka nan nehtir. Laikulh ah mi minthang ruitu rokual chem ah ka nan siam awt.

^10-11 Ka mi Israel tla rangah mun ka thîm piak le, chunah chun âu nehsawh khawm tawnglo rawh hen an um lai. Hi mun ah an hawng lûtnâk thawk hen siat leh râwktu nih an do na le, chubang hâwi chu a um lai lo rawh. Nan mêlma zawzawng lakah an vêng ding leh thlâk tla pêk ding hen ka tiam asi.

¹² Na thi lai le, an thlâk natu tla sinah vûi hen na um tikah na fapa lakah mi pakhat lal ah ka siam lai le, a ram chu chak tak hen ka kilkâwi piak lai.

¹³ Anih nih chun ka umnâk ding in a sak lai le, a lalnâk chu kumleza hen ka birhtir lai.

¹⁴ Kei chu a pa kasi lai le, anih chu ka fapa asi lai. Thilsual a ti chun pa nih a fa a rêp mi hâwi hen ka rêp lai.

¹⁵ Nangmah lalchem sikho ding hen Saul ka lawnh mi hâwi hen amah ka ṭangpinâk chu ka lêt lai loh.

¹⁶ Thlâk tla na nei kumza lai le, na lalram chu ka siah kumza lai, na lalnâk chu a dawng lai loh, a ti,’ ” ti hen va simh.

¹⁷ Nathan nih David rangah Pathian nih a sim mi zawzawng a simh hep.

David Nih Lâwmthusim Hen Thla A Cham

¹⁸ David chu LALPA sinah Puanin ah a va kal le, thla a cham, “LALPA zahkâi, ka lakah leh ka dâwngsung lakah hi hâwi thil na ti mi hi ka tlâklo.

¹⁹ Sikhawmsele, na thilti hi ruat ngâk hen a tam. LALPA zahkâi, tik a hawng um ding mi lakah thlâk tla hawng ka neitir ding hen thu na tiam. LALPA, zahkâi, chubang chu minung rangah na muhtir!

²⁰ Na sinah thusim ding dang zei me ka nei lai rawh! Na to-aw chu na ka theih asi.

²¹ Hi hâwi ti ding hen hi hi na duhzia ti ding na tum mi asi. Hi bang thil rokual na ti mi zawzawng hi na sîntirnâk ver asi.

²² LALPA zahkâi, nang chu na rokual ngâk a! Nang hâwi âukhawm an um lo; nangmah cho Pathian na si zia kan theihkumza.

²³ Israel mi tla sal ah tang mi, na mi rang ding ah na suah na mi hâwi hen tual tlûnah âu phun khawm an um lo. An rangah thilchê rokual tak tla na ti le, laikulh pumpi ah na min a thang rawh. Nangmah mi siding hen Aigupta ram ah mi na suah na mi tla, an kalnâk zawzawngah phun tla leh an pathian chu na nar piak hep na.

²⁴ Israel mi tla chu na mi si kumza ding hen na siam na le, nang, LALPA chu an Pathian na si.

²⁵ “Tuah, LALPA Pathian, ti ding hen na sim mi ka lakah leh ka thlâk tla lakah ti ding hen thu na tiamh mi zawzawng tla rangtlingtir rawh.

²⁶ Na min chu rokual tak hen a thang lai le, mi zawzawng nih ‘LALPA zeizawng tikho chu Israel Pathian asi,’ an ti kumza lai le, zeiliau zawng ah ka lalram chu na kilkâwi lai.

²⁷ Zeizawng tikho LALPA, Israel tla Pathian! Hi thlachamnâk hi na sinah râlṭha tak hen ka cham kho, na to-aw keimah sinah na hawng a langh hen, ka thlâk tla chu lal ah na siam awt mi na ka simh ruangah.

²⁸ “Tuah, LALPA zahkâi, nang chu Pathian na si; na thutiam chu bir tak hen na kil le, thutiamnâk chê tak na ka tiamh.

²⁹ Na sunhsaknâk lakah anna lâwm khonâk ding hen ka thlâk tla mal na sâwm na ding hen kan ngiar. Nang, LALPA zahkâi, ka thlâk tla lakah na malsâwmnâk um kumza ding hen thu tiamh,” a ti.