2 SAMUEL 6 - Bawm Common Language Bible Version

Thudântuk Bâwm Jerusalem Ah Put Hen A Um Mi

¹ David nih a kawrsen a ṭha ṭha mi sîng thum ding a pumh na le,

² Juda ram ah Baalah ah mi, chunah mi Pathian Thudântuk Bâwm a min LALPA zeizawng tikho cherub tlûnah laltophah um mi chu lâk ding hen a kalpi na.

³ Tlâng tlûnah Aminadab in ah mi chu an lâk le, kari thar tlûnah an chuanh. Aminadab fapa Uzah leh Ahio chu kari khalhtu an si.

⁴ Ahio chu mâilei ah a kal.

⁵ David leh Israel mi zawzawng chu LALPA chawnglawmh hen an chelhri hen lasak hen an lâm. Ṭingṭang tla, khuang tla, khuangtê tla, chêngchêng tla an tum.

⁶ Nakon fâng khâwngnâk mun ah an hawng tleng le, chawchal chu a hâwr le, Uzah nih Thudântuk Bâwm chu a dawmh.

⁷ A zahlo tuktarâi ruangah Uzah tlûnah LALPA Pathian chu a thinthawk le, Uzah chu a thah thlo. Uzah chu Pathian bâwm kiangah a thi le,

⁸ chu mun chu Perez Uzah an ti kumza rawh. LALPA nih Uzah a thah mi ruangah David chu a thinrun.

⁹ Churawhchun, David nih LALPA a ṭih le, “Tuhin hi Thudântuk Bâwm hi ka sinah zeitin ka put kho lai,” a ti.

¹⁰ Churawhchun, Jerusalem khua ah a sinah kalpi lo rawh hen a pial le, Obed Edom Gath khuapi ah mi in leiah an kalpi rawh.

¹¹ Chunah chun thla thum a um le, LALPA nih Obed Edom leh a dâwngsung tla mal a sâwm.

¹² David nih chun Thudântuk Bâwm chu Obed Edom in ah a um ruangah Obed Edom dâwngsung leh a neih zawzawng mal a sâwm ti a theih le, Obed Edom in ah mi Thudântuk Bâwm chu David nih a lâk le, chawnglawmhnâk fâk tak hen Jerusalem ah a kalpi rawh.

¹³ LALPA Thudântuk Bâwm zawnhtu tla chu kâr ruk an kâr nûnah David nih LALPA sinah chawchal leh chawlâ a ap kar vial chu a dîntir na.

¹⁴ David nih a tâi ah puannêm mangṭhia cho â ruk le, LALPA chawnglawmh hen a chelhri a lâm.

¹⁵ Chu hâwi hen Israel mi zawzawng nih Pathian Thudântuk Bâwm chu an lâk le, lâwm tak a âu bû hen leh tâwtawrâwt rihâu hen Jerusalem ah an kalpi rawh.

¹⁶ Bâwm chu khuapi ah an va lûtpi rawh chun Saul fanu Mikal nih langawtkawt thawk hen a chawnh le, David a lâm mi leh â lâwm mi tla a muh le, a zauhnawmh.

¹⁷ Thudântuk Bâwm chu David nih a mun a siamnâk in sungah a va siah le, bâwlnâk leh remnâk thil ap LALPA sinah a pêk.

¹⁸ Chu bâwlnâk a ap mi a lîm rawh chun, LALPA zeizawng tikho min hen Israel tla chu mal a sâwm na.

¹⁹ Churawhchun, zapi tla chu ei ding a pêk na, nunau, mipa Israel lakah mi zawzawng chu sang tlang khat, meh em leh grep rah châr tla a pêk na. Churawhchun, mikip in leiah an lâwi rawh.

²⁰ Churawhchun, David chu a dâwngsung chibai bûk ding hen a va kal le, Mikal chu amah dawng ding hen a hawng suak le, “Tusûn chu Israel lal nih a min a rokual tir, amah murui a to-aw nungak sinah mi â hâwi â langh!” a ti.

²¹ David nih a sâng le, “Na pa leh a dâwngsung ruangrûl ah leh Israel mi tla ruitu rangah hawng ka thîmtu LALPA chawnglawmh hen ka lâm mi asi. LALPA chawnglawmh ding hen chun ka lâm awt vima.

²² Hi ngâk hen zahpi khawm ka kâi dadauh lai, zeikhawm ah na ka siarlo dahmawh, sikhawmsele nungâk tla lam nih chun an hawng ka sung-û tir thlo,” a ti.

²³ Saul fanu Mikal nih fa rerêng a nei lo.