2 SAMUEL 5 - Bawm Common Language Bible Version

David Chu Juda Leh Israel Lalchem Asi Rawh

¹ Israel mi zawzawng tla chu Hebron ah David sinah an hawng le, “Nangmah taksa leh thisen tak kan si.

² A lânah Saul kan lalchem asi liau khawm ah râltuknâk ah Israel ruitu na si le, LALPA nih a mi tla lâirêltu leh ruitu ding ah thu a nan tiamh rawh,” an ti.

³ Churawhchun, Israel ruitu tla zawzawng chu David sinah Hebron ah an hawng hep. Anmah hen tlâinâk ding David nih a siam le, annih nih sariak an thuh le, Israel tla lalchem asi rawh.

⁴ David chu lalchem asi liauah kum sâwmthum asi, kum sâwmli lâi a rêl.

⁵ Hebron ah Juda tla lakah kum sarih leh a khing lâi a rêl. Jerusalem ah Israel leh Juda lakah kum sâwmthum leh kum thum lâi a rêl.

⁶ David leh a mi tla nih Jerusalem do ding hen kal ding ni a hawng tlung. Jebus mi chunah um mi tla nih chun David nih khuapi a lâk kho ding rêng an ruat lo. Churuang chun, “Hinah hin na hawng lût kho rêng lai loh, mikhêng leh mitchâw nih men an kham pang kho lai,” an ti.

⁷ (David nih Zion kulhpi chu a lâk le, “David khuapi,” ti asi rawh.)

⁸ Chu ni ah chun David nih a mi tla sinah, “Keimah tluk hen Jebus mi tla hua hen thah duhtu âu nan um? Chu hâwi asi chun tî luangnâk lei hen kal ule, mipâm, mitchâw leh kekhêng tla do na u,” a ti. (Chu a tinâk san chu “mitchâw leh kekhêng tla chu LALPA in ah an lût kho lai loh ti ruangah asi.”)

⁹ Chu kulhpi chu an va lâk rawh, chun, chunah chun David chu a va um le, “David khuapi” ti hen min a sak. A kiangkam tla ah chun khuapi saklei tlâng thawk hen a dawmh le, a kiangkam khat zit hen a siam.

¹⁰ LALPA, Pathian zeizawng tikho sinah a um ruangah zeiliau zawng ah a chak vima.

¹¹ Tura ram lalchem Hiram nih David sinah sawlehtu a fial le; mistri tla, lal in saktu ding hen lungsâitu tla a fial le, sidar thing tla a pêk.

¹² David nih Israel lalchem siding hen amah chu a birhtir mi leh a mi tla ruangah a ram tla chu tluang tak hen a siam ti a theih rawh.

¹³ Hebron thawk hen Jerusalem ah â thial nûnah, David nih nupi leh nupisûn dang a lâk sap le, fanu leh fapa dang tla a nei.

¹⁴ Hi bang tla hi Jerusalem ah an suak mi tla an si: Samua, Sobab, Nathan, Solomon,

¹⁵ Ibhar, Elisua, Nephek, Japhia

¹⁶ Elisama, Eliada leh Eliphelet tla hi an si.

Philistia Mi Rangah Nehnâk

¹⁷ Philistia mi tla nih David chu Israel tla lalchem ah ruat asi rawh ti an theih le, amah va tleih ding hen an kawrsen tla an suak rawh. David nih a theih le, kulh sungah a lût rawh.

¹⁸ Philistia mi tla chu Rephaim Kuam ah an hawng tlung le, an luah.

¹⁹ David nih LALPA sinah, “Philistia tla hi ka do na lai ma? Anmah nehtu ah na ka siam lai ma?” a ti. LALPA nih a sâng le, “Nehtu ah ka nan siam lai, do rawh!” a ti.

²⁰ Churawhchun, David chu Baal Perazim ah a va kal le, Philistia tla chu a neh rawh. David nih, “LALPA nih ka mêlma tla chu tîlian hâwi hen a râwk,” a ti. Churuang chun chu mun min ah chun Baal Perazim a ti.

²¹ Philistia mi tla an tek liauah an dunglei ah an milem an mâk thlap le, David leh a mi tla nih an put rawh.

²² Philistia mi tla chu Rephaim Kuam ah an hawng kîr le, an luah nawlh.

²³ David nih sângtu LALPA chu thu a deih fâwn le, “Hi thawk hen do lah na, sikhawmsele hêl le, varâl leiah Thing rimthaw kûng ram ah do ding hen a timhtuah.

²⁴ Thing rimthaw kûng pârah kal hâu na theih chun, Philistia mi tla neh na ding hen na mâilei ah keimah ka hawng kal awt ruangah do na rawh,” a ti.

²⁵ David nih chun LALPA nih thu a pêk mi hâwi hen a ti le, Philistia tla chu Geba thawk hen Gezer kalnâk lampi tiang hen a ṭhâwl na.