2 SAMUEL 3 - Bawm Common Language Bible Version

¹ Saul murui leh David murui chu sâwt tak anna do. David chu a chak vima le, Saul murui chu an chak lo vima.

David Fapa tla

² David nih hi a fapa paruk tla hi Hebron ah a sang sang vima hen a ring na mi an si: Amnon nu chu Jezreel ah mi Ahinoam asi,

³ Kileab nu chu Karmel ah mi Nabal nupi roh Abigail asi, Absalom nu chu Gesur lal Talmai fanu Maakah asi,

⁴ Adonijah nu chu Hagith asi, Sephatiah nu chu Abital asi,

⁵ Ithream nu chu Eklah asi. Hi bang a fa le tla hi Hebron ah suak mi an si.

Abner Chu David Leiah A Ṭawm

⁶ Saul murui leh David murui chu anna do vima le, Saul leikângah mi Abner chu a chak dadauh.

⁷ Nikhat chu Saul fapa Isboseth nih a pa nupisun Rizpah, Aiah fanu chu Abner nih a ihpi ti hen a puh.

⁸ Chu mi ruangah Abner thungâi a thin a thawk, “Saul tleihtu ah ma na ka ruat? Juda leikângah bawp ding ma na ka ruat, a tîr thawk hen na pa Saul lakah zumhkâi tak hen um mi kasi, a unau leh a hâwi le tla chu David lakah mi ka hum na; tusûn ni ah nunau hen thang na hawng ka nawmh!

^9-10 LALPA nih David rangah, Saul leh a thlâk tla lalram chu lâk piak hen Israel leh Juda lakah lalchem ah siam ding hen thu a tiamh, a ram chu khatlei thawk hen khatlei dawngh tiang. Hi hâwitê hen ka ti lo mi asi chun Pathian nih hawng ka thah seh,” a ti.

¹¹ Isboseth nih Abner chu a ṭih ruangah zei thu khawm a sim lo rawh.

¹² Abner nih Hebron ah um mi David sinah, “Hi ram hi âunih lâi a rêl awt? Keimah hen remnâk siam le, Israel mi zawzawng nangmah leikângah ṭângṭawm hep ding hen ka nan ṭangpi lai,” ti ding hen mi a fial.

¹³ David nih, “A ṭha asi! A san pakhat nei hen nangmah hen remnâk ka siam lai: A tawng ding hen ka sinah na hawng tikah Saul fanu Mikal ka sinah na hawng put ding asi,” ti hen a sâng.

¹⁴ David nih Isboseth sinah, “Ka nupi Mikal hawng ka pêk nawlh, amah umpi ding hen a man Philistia mi fêm zâ ka pêk asi,” ti ding hen mi a fial.

¹⁵ Churawhchun, Isboseth nih a pasal Paltiel, Lais fapa sinah mi chu a suh ving.

¹⁶ A pasal Paltiel nih lampi tluan hen Bahurim tiang ṭap bû hen a zûl. Sikhawmsele, Abner nih, “In leiah kîr” a ti le, a kîr rawh.

¹⁷ Abner chu Israel ruitu tla sinah a va kal le, an sinah, “Sâwt tak thawk hen David chu nan lalchem rangah nan duh le,

¹⁸ tu hi tik dêngkhâwng asi. LALPA nih, ‘David ka to-aw chu Israel mi tla, Philistia leh mêlma dang tla lakah humtu ding ah ka mang awt,’ a ti mi kha theihkumza u.

¹⁹ Abner nih Benjamin phun tla rang khawm a simh na le, Benjamin leh Israel mi tla khawm nih rem ti vima ding hen David sinah Hebron ah a va kal rawh.

²⁰ Abner chu a minung kul hen David sinah Hebron ah an va kal liauah David nih puai a tuah piak na.

²¹ Abner nih David sinah, “Tuah ka kal lai le, nangmah an lal siding hen Israel tla chu ka neh hep na lai. An lalchem rangah an pawm lai le, churawhchun na duh mi chu na tawng lai le, ram pumpi ah lâi na rêl lai rawh,” ti hen a simh. David nih Abner rangah himnâk thutiam a pêk le, a kalnâk ding ah a kaltir rawh.

Abner Thahnâk

²² Chu nûn chun David mi leh Joab chu râltuk an kal mi, thil-le-rî tam tak put hen an hawng tlung. Abner lam chu David sinah a um lo rawh, him tak hen David nih a kaltir rawh ruangah.

²³ Joab leh a mi tla an hawng tlung rawh chun, Abner chu David sinah a hawng le, him tak hen a tlung tir rawh ti hen Joab rangah an simh.

²⁴ Churawhchun, Joab chu lalchem sinah a kal le, a sinah, “Abner na sinah a hawng mi sinah zei thil na ti? Zei rangah kha hâwi hen na kaltir ko?

²⁵ Hinah a hawng mi kha nangmah perpet ding leh an thilti leh na um na kal theih ding hen a hawng mi asi na theih ko kha ta a,” a ti.

²⁶ David sinah a kal rawh chun, Joab nih Abner kawh ding hen mi a fial. Sirah tichawh ah mi chu an hawng kîrpi. Sikhawmsele chu thu chu David nih a theih loh.

²⁷ Abner chu Hebron ah a va tleng rawh chun Joab nih kulh kawtkâ ah a kalpi le, amah chu mi kingnâk ah thu thup ruah ding hâwi hen a kalpi le, a paw lakah thi thlo hen a sunh. Abner chu Joab unaupa Asahel rangah a thah ruangah amah khawm thah hen a um rawh.

²⁸ David nih chu thu chu a theih rawh chun, “Abner thihnâk lakah hin kei leh ka mi tla chu kan mawh lo ti LALPA nih a theih.

²⁹ Joab leh a dâwngsung tla tlûnah rêpnâk chu tlung seh! Phâr mawh vunrâi mawh, rianṭuan kho lo hen mawh, râltuknâk ah thi hen mawh, pâm hen mawh an thlâk tla tlûnah um seh,” a ti.

³⁰ Joab leh a unaupa Abisai nih chun Abner nih an unaupa Asahel Gibeon râltuknâk ah Abner nih a thah mi phû chu an lam rawh.

Abner Chu An Vûi

³¹ Churawhchun, David nih Joab leh a mi tla chu an puan thlêk hen Abner sûnnâk salâ aih ding hen thu a pêk na. A vûi nâkah lalchem David khawm lâng dung leiah a kal bâk.

³² Abner chu Hebron ah an vûi le, lalchem nih chun hâu fâk tak hen thlân ah a ṭappi le, mi zawzawng nih chu hâwi hen an ṭappi.

³³ David nih Abner rangah sûnnâk ding ah a sak: “Zei rangah Abner chu mi â hâwi hen a thi?

³⁴ A kut khawm â phuar lo? A kê tla khawm â phuar lo, Misual thah mi hâwi hen a thi!” a ti. Mipi tla chu amah rangah an ṭappi nawlh chiam.

³⁵ Nî tlâk hen David chu buh ei ding hen an ngiar le, sikhawmsele Pathian sinah thu a tiam, “Nî tlâk lânah zeital ka ei mi asi chun Pathian nih hawng ka thah seh,” a ti.

³⁶ Chu chu an theih hen mi le tla chu thungâi anna lâwm.

³⁷ David minung tla zawzawng leh Israel mi zawzawng nih Abner thahnâk ah lalchem chu telnâk a nei lo ti an theih.

³⁸ Lalchem nih a mi le sinah, “Tusûn ni ah hin Israel lakah ruitu rokual tak thih ni asi nan theih lo ma?

³⁹ Kei, Pathian thîm mi lalchem men nih tusûn ni ah thungâi ka tuar phah asi. Hi bang Zeruiah fapa tla hi ka rangah veihtu an si. Chubang hâwi hen mi thah mang tla chu LALPA nih rêp na seh,” a ti.