2 SAMUEL 23 - Bawm Common Language Bible Version

David Thu Madungchem

¹ Jese fapa David chu Pathian nih milian ah a siam le, amah chu Jakob Pathian nih lal ah a thîm. Israel rangah la dawhtak phuaktu asi. Hi tla hi David thusim madung asi:

² LALPA thlarau nih keimah mang hen thu a sim le, a thu chu ka mûr ah hin a um.

³ Israel Pathian nih a sim; Israel vêngtu nih ka sinah, “Diknâk hen lâirêltu lal nih chun Pathian lakah ê-aw ngâi hen a rêl mi chu;

⁴ Vândâwm lo hen khuadei lakah nî a chêu mi hâwi asi. Ruah nûnah nî nih belh tla a tlektir mi hâwi asi,” ti hen.

⁵ Keimah hen zungzâl thudântuknâk a nei rawh ruangah asi, Pathian nih hi hâwi hen ka thlâk tla chu mal a sâwm awt; chu remnâk chu â râwk lai lo le, a thutiam khawm thlâkthleng asi lai loh. Chu zawng chu ka duh mi chu asi; ka nehnâk ding mi chu asi. Chu chu Pathian nih a langhtir lai.

⁶ Sikhawmsele Pathian nei lo mi tla chu ling lawnh kho mi hâwi hen an si; âukhawm nih kut ko hen an tawngh kho lo.

⁷ Thîr hen riamnâm leh fei na mang lai, chu tla chu duah hep an si lai.

David Kawrsen Minthang Tla

⁸ Hi tla hi David kawrsen minthang tla an si: a pakhatnâk chu Tachemon thawk hen mi Josheb Bashebeth asi, amah hi “Pathum” lakah hotu chem asi, veikhat râltuknâk ah a fei hen minung zariat a thah asi.

⁹ Pathum lakah hotu minthang panihnâk chu Dodo fapa Eleazar, Ahoh phun lakah mi asi. Nikhat chu Philistia mi tla râltuk ding hen anna pûm liauah amah leh David nih an zuam na.

¹⁰ Israel tla an tawlh hep liau khawm ah bir tak a dîr hen Philistia mi tla chu a nâmsâu vei kho lo rê hen a tuk na asi. Chu ni chun LALPA nih a nehtir na. Râltuk a lîm rawh chun Eleazar umnâk ah Israel tla chu an hawng kîr le, a thi mi râlthuam tla an lâk.

¹¹ Pathum lakah a minthang pathumnâk chu Agee fapa Shammah, Harar thawk hen mi asi. Philistia mi tla chu Lehi thlâi an chîngnâk phâi ah anna pûm. Israel tla chu Philistia mi thawk hen an tek le, sikhawmsele

¹² Shammah chu phâisen ah chun a do thlo na le, Philistia mi tla a thah na. LALPA nih chu ni chun nehnâk a pêk.

¹³ Fângzûn awt bâiah “Sâwmthum lakah” a râlṭha mi mi pathum chu, David Adullam pûk ah a um liauah a sinah an va kal le, chu liau chun Philistia mi tla chu Rephaim Kuam ah um mun an khuar.

¹⁴ Chu liau chun David chu tlângah kulh ah a um le, Philistia murui nih Bethlehem an luah.

¹⁵ David chu lawksawngnâk ruangah a uai thlo le, “Bethlehem kulh kiangah tikhurchawh lakah mi tî lâk hen hawng ka pêktu um sele a!” a ti.

¹⁶ Kawrsen minthang pathum nih Philistia riakmun lei chu an tâwn le, tikhurchawh mi tî chu an va than le, David sinah an hawng kîr nawlh. Sikhawmsele, din lo hen Lalpa sinah bâwlnâk hâwi hen a thlêt le,

¹⁷ “LALPA, hi hi ka din kho awtlo, hi pathum tla an nungnâk pêk rê hen anna tiam mi thisen din hâwi asi!” a ti. Din ding a duh lo. Chu chu kawrsen minthang pathum thilti asi.

¹⁸ Joab unaupa Abisai (an nu chu Zeruiah) chu “Minthang Sâwmthum” mi hotu asi. Abisai nih minung zathum a fei hen a do le, a thah hep na, kha rawh chun “Minthang sâwmthum” lakah a minthang.

¹⁹ Abisai chu “Sâwmthum” lakah a minthang chem asi ruangah an hotu a hawng si rawh le, sikhawmsele, “Mi pathum” hâwi ngâi hen chun a min a thang lo.

²⁰ Jehoiada fapa Benaiah, Kabzeel ah mi khawm kawrsen minthang dang asi, râltuknâk thilti tam tak a nei le, Moab mi kawrsen râltuk thiam tak panih a thah mi hen. Veikhat chu pûk ah vûr tlâk liauah chakeibaknei a thah.

²¹ Aigupta milian tak fei hen â thuam zat mi khawm a thah. Benaiah nih talhbo hen a do le, a fei a suh rawh chun chu hen a thah rawh.

²² Chu tla chu Benaiah râlṭhat thilti tla chu asi, “Minung sâwmthum” lakah mi pakhat asi.

²³ Amah hi an lakah chun a fawng bîk mi pakhat asi, sikhawmsele “Minung Pathum” hâwi hen chun a min a thang lo. David nih amah taksa vêngtu lakah hotu ah a siah.

^24-39 “Mi sâwmthum” lakah anna tel mi tla chu: Asahel, Joab unaupa Dodo fapa Elhanan, Bethlehem mi. Harod thawk hen mi Shammah leh Elika. Pelet mi Helez. Tekoa mi Ikkesh fapa Ira, Anathot mi Abiezer. Hushah mi Mebunnai. Ahoh mi Zalmon. Netophah mi Maharai. Netophah mi Baanah fapa Heleh. Benjamin thlâk Gibeah mi Ribai fapa Ittai. Pirathon ah mi Benaiah. Gaash tivakuam kiangah mi Hiddai. Arabah mi Abialbon. Bahurim mi Azmaveth. Shaalbon a mi Eliahba. Jashen fapa tla Jonathan Harar mi Shammah, Harar mi Sharar fapa Abiam. Maakah mi Ahasbai fapa Eliphelet. Gilo mi Ahithophel fapa Eliam. Karmel ah mi Hezro Arab ah mi Paarai. Zobah mi Nathan fapa Igal. Gad ah mi Bani Ammon mi Zelek Joab râlthuam puttu Beeroth a mi Naharai. Jattir mi Ira leh Gareb Hit mi Uriah An ektê hen kawrsen minthang chu sâwmthum leh pasarih an si.