2 SAMUEL 21 - Bawm Common Language Bible Version

Saul Thlâk Tla Chu Thah An Si Rawh

¹ David a lal liauah pâm fâk tak kum thum kar chu an tuar. Churuangah David nih LALPA a râwn, churawhchun LALPA nih, “Saul leh a dâwngsung tla chu mi thah hen an sual, Gibeon mipi tla khawm a thah.

² (Gibeon mi chu Israel tla an si lo, Amor murui mêtê, Israel tla nih hum ding hen anna tiam mi asi. Sikhawmsele Saul nih Israel leh Juda tla rangah a ṭhanemsemsê ngâi ruangah râwk a tum na.)

³ Churawhchun, David nih Gibeon mi tla a kawh na le, an sinah, “Nan rangah zei ka ti kho lai? LALPA mipi tla mal nan sâwm khonâk ding hen nan tlûnah thil diklo ti hen a um mi tla hi remh ding ka duh asi,” a ti.

⁴ Annih nih an sâng le, “Saul leh a dâwngsung tla hen kanna rêlkhâwnglonâk chu ngûn leh tangka hen remh kho mi zât khawm asi lo, Israel tla chu âukhawm thah na ding kan duh lo,” an ti. David nih, “Takhan chun zei hâwi an ti piak na sele ṭha hen nan ruat?” ti hen a deih na.

⁵ Annih nih an sâng le, “Saul nih rawk hep ding hawng kan duh le, Israel ram ah hin pakhat khawm nung hen zuah ding hawng kan duh lo.

⁶ Churuangah Saul, LALPA thîm mi lalchem khuapi Gibeah ah LALPA mâikâ ah thlâi ding hen an thlâk lakah mi mipa pasarih hawng kan pêk,” an ti. Lalchem nih, “Kan pêk na lai,” a ti.

⁷ Sikhawmsele, amah leh Jonathan nih thutiamnak bir tak a nei ruangah David nih Jonathan fapa Mephiboset, Saul tupa chu a nungnâk a zuah asi.

⁸ Sikhawmsele, Aiah fanu Rizpah nih fapa panih Armoni leh Mephiboset, Saul rangah a ring piak mi leh Meholah ah um mi Barzilai fapa Adriel rangah Saul fanu Merab nih a ring piak mi fapa panga khawm an tleih le, an pêk na rawh.

⁹ Churawhchun, David nih Gibeon mipi rangah a pêk na rawh chun LALPA mâikâ tlângah an thlâi na le, an pasarih hen munkhat ah an thi rawh. Hi tla an thah na mi hi fûr dawnghlei ah barley fâng an ât dawmh awt hun ah asi.

¹⁰ Churawhchun, Saul nupisûn Rizpah, Aiah fanu nih an thihnâk mun lungpi karah salâ puan dawrnâk rangah a siam le, chunah chun pâwl tlâk thawk hen fûr ruah tî tlâk tiang a um. Chu hun sung zawzawngah chun an ruak tla, zû leh vâ leh mang sa tla nih an ei lo ding hen vêng asi.

¹¹ David nih chu hâwi hen Rizpah nih a ti mi a theih rawh chun,

¹² Gilead ah mi Jabes mipi tla thawk hen Saul leh Jonathan ruh tla a lâk. (Chu chu Beth San vântlâng umnâk ah mi an fîr mi asi, chu chu Philistia tla nih Gilboa Tlângah Saul an thah hen an thlâi mi kha asi.)

¹³ David nih Saul leh Jonathan ruh leh mi pasarih an thlâi mi ruh tla a khawmh.

¹⁴ Lalchem nih thu a pêk mi hâwi hen Benjamin ram ah Zela mun ah Saul pa Kish thlân mun ah Saul leh Jonathan ruh tla chu an phûm rawh. Chu nûn chun Pathian nih an thlachamnâk a ram rangah a sâng rawh.

Philistia Milian Rangah Tuknâk

¹⁵ Philistia leh Israel karah tuknâk dang a um le, David leh a mi tla nih Philistia tla an do na. Tuknâk lakah veikhatnâk ah chun David chu a dî rawh.

¹⁶ Milian pakhat Ishbibenob nih dâr fei a rih zat chu kilongramme thum leh sêu asi, nâmsâu thar a put, chu pa nih David rangah thah kho ding â ruat.

¹⁷ Sikhawmsele, Zemiah fapa Abisai chu David sinah a hawng le, minung a do mi chu a ṭangpi le, an thah. Churawhchun, David mi tla nih, David chu an sinah râltuknâk ah kal lo rawh ding hen thu an tiamhtir. “Nang chu Israel tla lungumnâk na si, na tlâu ding kan duh lo,” an ti.

¹⁸ Hi nûnah khawm Philistia mi tla hen Gob ah tuknâk a um le, hi sung hin Sibekai, Hushah thawk hen mi nih an milian Saph chu a thah.

¹⁹ Gob ah Philistia mi tla hen tuknâk dang a um fâwn le, Jair fapa Elhanan, Bethlehem ah mi nih Gath mi Goliath unaupa Lahmi a thah. A fei chu tleihnâk a nei le, thiamtlêng hâwi tluk hen a sah.

²⁰ Churawhchun, Gath ah tuknâk a um fâwn le, chunah chun râltuk duh mi tak milian a um le, khatlei kut pakhat lakah kutmar paruk a nei le, a kê khawm mar ruk a nei.

²¹ Chu pa nih chun Israel leh Jonathan rangah thungâi hen a zuam na. David unaupa, Shamah fapa Jonathan nih a thah.

²² Hi milian pali tla hi Gath thlâk tla an si, David leh a mi leh nih an thah na.