2 SAMUEL 20 - Bawm Common Language Bible Version

Sheba Helnâk

¹ Gilgal ah mi dukdaklo a min Sheba, Bikri fapa, Benjamin phun lakah mi a um. Chu nih tâwtâwrâwt a tum le, “David rangah nawmh hen! David rangah zûl ding asi lo, ‘Israel mi tla, mah in lei chiauah kal hep ding’ ” ti hen.

² Churawhchun, Israel tla chu David kaltâk hen Sheba sinah an kal le, sikhawmsele, Juda mi tla chu zumhkâi tak hen David chu Jordan thawk hen Jerusalem ah an zûl.

³ David chu Jerusalem a tlung rawh chun lal in ngâktu ding ah a mâk na mi a nupisûn parâ a kawh na le, vêngtu an rangah siah hen an thil herh tla a pêk na. Sikhawmsele an sinah a it a zâu lo. An dam kar zawzawng chu numei hâwi hen a siah na ko.

⁴ Lalchem nih Amasa sinah, “Juda mi tla a pûm ding kawh na le, thâikip ah hinah hawng kîrpi nawlh na ding hen,” a ti.

⁵ Amasa chu kawh na ding hen a kal le, khawmsele kîr ding mi hun ah a hawng kîr lo.

⁶ Churawhchun, Lalchem nih Abisai sinah, “Sheba nih hin Absalom ngâk hen hawng kan nawktir dauh awt asi lai, Ka mi le ruai na le, ṭhâwl rawh, chu lo chun khuapi kulh ah a um chun ruang a suak lebang lai,” a ti.

⁷ Churawhchun, Joab minung tla, lal vêngtu leh kawrsen dang tla chu Jerusalem kaltâk hen Abisai le hen Sheba an ṭhâwl rawh.

⁸ Gibeon ah lungpi mun an tlung liauah Amasa nih Joab chu râltuk ding timhtuah hen a nâmsâu chu tâisâwm ah pâi hen a tawng. Anih chu mâilei ah a hawng fûk le, a nâmsâu chu a tlâ.

⁹ Joab nih Amasa sinah, “Zeitin na um kawi?” a ti le, a châwchawk khonâk ding hen a khamul ah a vawrhlei bân hen a tleih piak.

¹⁰ Amasa nih chun Joab nih khatlei kut hen nâmsâu a put mi lakah chun a vêng lo thlo le, Joab nih a paw lakah a sunh le, â ril chu tual ah a tlâ le, mawhsareh hen a thi rawh. Churawhchun, a sunh nawlh lo rawh. Churawhchun, Joab leh a unaupa Abisai nih Sheba chu an ṭhâwl.

¹¹ Chun, Joab lei mi pakhat Amasa ruak kiangah a dîr le, “Joab leh David leikâng ṭangṭawmtu vial nih Joab rangah zûl seh,” a ti.

¹² Amasa ruak chu thî nuai hen lampi lâi chirah a rîl ko. Churawhchun, Joab lei mi, mi pakhat nih an hawngtu zawng chu an dîr vima mi a muh hen a ruak chu zâwllâi ah a nûk le, puan a vurh.

¹³ Chu ruak lampi ah mi chu ṭhial asi nûn chun Sheba ṭhâwl ding hen Joab an zûl rawh.

¹⁴ Sheba nih Israel ram zawzawng a lanh nûnah Abel Beth Maakah khuapi a tleng le, churawhchun Bikri phun lakah mi tla chu anna pûm le, khuapi leiah an zûl rawh.

¹⁵ Joab minung tla nih Sheba chu chunah a um ti an theih le, churawhchun an kal le, khuapi chu an hual le, kulh lênglei ah tual an pawng le, kulh chu a chim khonâk ding hen tual an chawh.

¹⁶ Khuapi ah chun nunau fing tak a um le, kulh vâm thawk hen a âu le, “Ngâi u! Joab hinah hawng ding hen simh u, sawnh ding ka duh,” a ti.

¹⁷ Joab chu a va kal le, anih nih, “Joab na si ma?” a ti. Anih nih, “Ka si” a ti. Anih nih, “Pu hawng ka ngai piak rih,” a ti. Anih nih, “Kan ngai ko,” a ti.

¹⁸ Chu nunau nih chun, “A lânah chun, Abel khua ah kal le, thuthlûknâk lâk masa u an ti tâwn.

¹⁹ Kan khua hi a rokual le, Israel ram ah khuapi nuam leh zumhkâi pakhat asi. Zei rangah râwk ding nan awt? LALPA tâ hi râwk ding nan duh awt na maw?” a ti.

²⁰ Joab nih, “Râwk lai loh, khuapi chu ka râwk rerêng lai loh.

²¹ Chu chu kan thiltum asi lo. Mi pakhat a min Sheba, Bikri fapa, Ephraim tlâng ram ah mi nih lalchem David lakah helnâk a tuah asi. Hi pa hi hawng kan pêk ule, khua chu ka râwk lai lo,” a ti. Churawhchun, chu nunau nih, “A lû chu kulh vâm tlûnah kan hawng lâwnh lai,” a ti.

²² Churawhchun, amah krai hen khuapi ah mipi tla a rualpi na le, Sheba lû chu an tan le kulh vâm tlûnlei hen Joab rangah a lawnh piak rawh. Churawhchun, Joab nih khuapi kaltâknâk ding hen tâwtawrâwt a tum le, kha rawh chun an in leiah an kîr rawh. Joab chu lalchem sinah Jerusalem ah a kîr rawh.

David Rianṭuantu Tla

²³ Joab chu Israel kawrsen tla hotu asi le, chun Jehoiada fapa Benaiah chu Lalchem vêngtu hotu asi.

²⁴ Adoniram chu kawrsen rianṭuantu tla hotu asi. Jehoshaphat Ahilud fapa chu thil singsiahnâk leiah hotu asi.

²⁵ Sheva chu lasui rîntu asi, Zadok leh Abiathar chu bâwlpu an si.

²⁶ Ira, Jair khuapi thawk hen mi khawm David bâwlpu lakah pakhat asi bâk.