2 SAMUEL 2 - Bawm Common Language Bible Version

David Chu Juda Lalchem Ruat Hen A Um

¹ Chu nûn chun David nih “Juda ram ah khua pakhat ka va ho na lai ma?” ti hen LALPA sinah a deih. LALPA nih a sâng le, “Va kal rawh,” a ti. David nih, “Zei mi dauh ah?” ti hen a deih. LALPA nih, “Hebron ah,” a ti.

² Churawhchun, David chu a nupi panih hen chunah chun a kal rawh. Ahinoam chu Jezreel khua mi asi le, Abigail chu Karmel mi Nabal nupi asi.

³ A mi tla leh an dâwngsungkhur tla khawm Hebron khua kiangkam tla ah chun an um.

⁴ Juda mi tla chu Hebron ah an hawng le, David chu Juda lalchem siding hen sariak an thuh. David nih Gilead ram ah Jabes mi tla nih Saul an vûi rawh ti a theih le,

⁵ chunah chun mi zeimaw mi tla thâwng thanh ding hen a fial na: “Nan lalchem nan vûi mi lakah nan sunhsak asi ti â theih ruangah LALPA nih mal an sâwm na seh.

⁶ Tu thawk hen LALPA chu nan lakah vêlnei hen zumhkâi seh. Kei khawm nih nan thilti ruangah ṭha tak hen kan ti na bâk awt.

⁷ Chak tak leh râlṭha tak hen um ule, nan lalchem Saul chu a thi rawh le, Juda tla nih an lalchem siding hen sariak an ka thuh,” a ti.

Isboseth Chu Israel Lalchem Siding Hen Ruat Asi

⁸ Saul kawrsen hotu Ner fapa Abner chu Saul fapa Isboseth hen an tek le, Jordan Va an kanh le, Mahanaim ah an kal.

⁹ Chunah Abner nih Isboseth chu lalchem ah a siam le, Gilead, Aser, Jezreel, Efraim, Benjamin, leh Israel ram zawzawng rang ding ah.

¹⁰ Israel lalchem ah an siam liau chun kum sâwmli mi asi le, kum nih ding lâi a rêl. Sikhawmsele Juda phun tla chu David lakah zumhkâi tak hen an um le,

¹¹ Hebron ah Juda tla lakah kum sarih leh a khing lâi a rêl.

Juda Leh Israel Donâk

¹² Abner leh Isboseth minung tla chu Mahanaim thawk hen Gibeon khua ah an va kal.

¹³ Joab, a nu chu Zeruiah, David minung tla hen tî dil ah an va tawng le, chunah chun an ektê hen an to, murui khat chu khatlei varâl ah, murui khat anmah zâwn khatlei râl ah an um.

¹⁴ Abner nih Joab sinah, “Kan tlangvâl tla chu khatlei mi leh khatlei mi kan dotir na lai,” a ti. Joab nih a sâng le, “Dotir lai ta a,” a ti.

¹⁵ Benjamin phun Isboseth lei mi minung leinih nih David minung leinih tla rangah an do na.

¹⁶ Mikip nih mah tum mi chiau chu an lû ah anna tleih le, an dêm ah fei hen anna sunh le, minung kul leh pali chu mun khat kâ ah an tlû phut. Churuangah Gibeon ah chu mun chu “Nâmsâu Mun” (Helkat-Hazorim) an ti.

¹⁷ Churawhchun, tukpi a hawng suak le, Abner leh Israel mi tla chu David mi tla nih an neh na.

¹⁸ Chunah chun Zeruiah fapa tla pathum an um, chu tla chu Joab, Abisai leh Asahel an si.

¹⁹ Asahel sazuk hâwi hen tek chak mi nih chun Abner chu a ṭhâwl le, a phâk khet.

²⁰ Abner chu dunglei a hawng her le, a sinah, “Nangmah ma Asahel?” a ti. “Mah’ ta a” ti hen a sâng.

²¹ Abner nih, “Hawng ka ṭhâwl lah rawh!” a ti. “Kawrsen pakhat ṭhâwl le, a thil neih tla lâk pah” a ti. Sikhawmsele Asahel nih a ṭhâwl nget rih.

²² Abner nih a sinah, “Hawng ka ṭhâwl lah rawh e! Zei rangah keimah thah ding na tuah êu? Zeitin na unaupa Joab mêl ka zauh ngam lai?” a ti.

²³ Sikhawmsele Asahel nih a thlah duh rerêng lo, churawhchun Abner nih a dunglei kângah fei hen a hawng sunh le, a paw ah a dingh le, a kêng leiah fei a tleng dak. Asahel chu tual ah a bawk rep le, a thi rawh. Chu mun ah kaltu zawzawng chu an dîr tawt tâwn.

²⁴ Joab leh Abisai nih Abner chu an ṭhâwl le, Ammah tlâng an tlung rawh chun nî a tlâ rawh, chu chu Gibeon ramkaro kalnâk lampi Geah saklei asi.

²⁵ Benjamin phun tla chu Abner sinah an hawng a pûm nawlh le, chu tlâng sîpah chun anna sang.

²⁶ Abner nih Joab rangah a auh le, “Kanna do kumza awt ma? A dawngh leiah thungâi ngaihsiat a kâi awt ti na theih loh ma? Na ram mi minung kan si. Zei ti riamruam me na mi tla chu hawng kan ṭhâwl lo ding hen thu na pêk na awt?” a ti.

²⁷ Joab nih a sâng le, “Pathian nung min sâl hen ka tiamh asi, chu hâwi hen thu sim lah le chu, ka mi tla nih thâituan tiang an ṭhâwl na awt,” a ti.

²⁸ Churawhchun, Joab nih Israel tla ṭhâwl lo rawh ding ti theihnâk ding ah tâwtâwrâwt a tum rawh, churawhchun tuknâk chu an bâng rawh.

²⁹ Abner leh a mi tla chu zân khuadei ver hen Jordan Vakuam leiah an kal; Jordan Va an tan le, a thâituan nî tlâk an kal le, Mahanaim an va tleng rawh.

³⁰ Joab nih Abner a ṭhâwl na lo rawh, a mi zawzawng a pumh na le, minung leikua hen an tling lo, Asahel rêlsih hen.

³¹ David mi tla nih Benjamin phun ah mi Abner mi tla chu minung zathum leh sâwmruk an thah na.

³² Joab leh a mi tla nih Asahel ruak chu a dâwngsungkhur thlân Bethlehem ah an vûi. Zan khuadei ver hen an kal le, khuadei ah Hebron an tlung.