2 SAMUEL 19 - Bawm Common Language Bible Version

Joab Nih David Rangah Nun A Simh

¹ David chu Absalom sûn ruangah a ṭap mi thu Joab rangah an simh.

² Lalchem nih a fapa rangah a sûn ti an theih ruangah chu ni chu David kawrsen tla rangah chun nehnâk lâwmnâk chu ngaihsiatnâk ah â chang rawh.

³ Churawhchun, dâisiptê hen khuapi ah an lût le, râltuknâk thawk hen tek mi kawrsen hâwi an si ruangah thungâi an ning a zak.

⁴ Lalchem chu a mêl a khuh le, fâk tak hen a ṭap. “Aw ka fapa! Ka fapa Absalom! ka fapa,” ti hen.

⁵ Joab chu lalchem in ah a kal le, a sinah, “Na nungnâk leh na fanu fapa tla nungnâk leh na nupi leh na nupisûn tla nungnâk sanhtu tla chu tusûn ni hin ningzak hen na umtir na rawh asi.

⁶ A nan zângfahtu chu na hua le, a nan huatu chu na ṭangpi asi! Na rianṭuantu tla leh na minung tla hi na rangah zeikhawm silo mi hâwi hen na siam na asi. Kannih chu thi ver hen Absalom chu hawng nung nawlh sele thungâi na lâwm lai ti fiang tak hen kan muh kho asi.

⁷ Tuah kal le, na mi le tla rangah simhfiang na. LALPA min sal hen ka sim asi, chu hâwi na tilo chun, thâizîng chu na sinah âukhawm an um lai loh. Chu chu vânduainâk na damsung na tuar mi lakah a sia chem mi asi lai,” a ti.

⁸ Churawhchun, lalchem chu a thawk le, khuapi kulh kawtkâ ah a va kal le a to rawh. A mi le tla nih chu mun ah a um ti an theih rawh chun, anna pûm. A nehnûn chun, Israel tla chu anmah in lei chiauah an lâwi rawh.

Jerusalem Ah Kîr Ding Hen David A Thawh Rawh

⁹ Churawhchun, ram sungah chun anmah leh anmah êl hen anna chaih chur. “Lal David nih kan mêlma lakah mi hawng kan hum, Philistia mi thawk hen khawm hawng kan hum, sikhawmsele Absalom thawk hen a tek le, ram chu a mâk thlap rawh.

¹⁰ Absalom chu lalchem siding hen sariak kan thuh le, khawmsele tuknâk ah thah asi rawh. Churuangah lalchem David hi kîrpi nawlh ding hen âukhawm nih an tum lo na maw?” an ti.

¹¹ Israel tla nih an sim mi thâwng chu Lalchem David sinah a tlung rawh. Churawhchun, Lalchem nih bâwlpu Zadok leh Abiathar chu Juda ruitu tla sinah a fial na le, annih nih chun, “Zei rangah lalchem chu a in leiah kîrpi ding hen a madung chem ah nan um?

¹² Nannih chu keimah taksa tlâi, ka taksa leh ka thisen nan si mi, zei rangah lalchem kîrpi ding hen nanna madung chem zia?” ti hen lalchem nih a sim mi an simh na.

¹³ David nih Amasa sin khawm ah, “Nang chu ka taksa tlâi na si ruangah Joab ruangrûl ah kawrsen hotu chem ah ka nan siah lai, ka ti lo chun Pathian nih zeitin tal hawng ka ti ko seh,” ti hen a simh na.

¹⁴ David thusim nih Juda tla thinlung chu a neh rawh le, churawhchun a rianṭuantu tla zawzawng hen a sinah kîr ding hen thu an thanh.

¹⁵ Lalchem chu a kîr leiah Juda mi tla hen anna tawng le, chu tla chu amah rangah dawng ding hen Gilgal ah tipi an tan rawh.

¹⁶ Chu mi liau chun Bahurim khua mi Benjamin mi Gera fapa Shimei khawm mawhsareh hen Jordan ah Lalchem David tawng ding hen a kal.

¹⁷ Benjamin phun ah mi minung sâng khat a sinah a put. Chun Ziba, Saul dâwngsung to-aw khawm a fapa leinga tla leh a to-aw kul tla hen lalchem a hawng tlung lânah Jordan an hawng tlung.

¹⁸ Lalchem murui leh lal nih a duh mi zawng ti piak leh dawng ding hen tiva an tan rawh. Lalchem nih tiva a tan thluh nûn chun Shimei chu lalchem mâika ah bawkbukhup hen,

David Nih A Vêlneihnâk Shimei Sinah A Langhnâk

¹⁹ “Bâwipa, Jerusalem na mâk awt liauah ka thilsual ti tla kha zângfahtê hen hawng ka philh piak le, ka lakah huatnâk nei hen thinlung ah siah lo rawh ding hen kan ngiar.

²⁰ Pu, ka sual asi ti theih hen, churuangah asi, tusûn ah nangmah Bâwipa tawng ding hen marlei phun a mi lakah hawng masa chem kasi,” a ti.

²¹ Zeruiah fapa Abisai nih, “Shimei chu LALPA nih lalchem rangah a thîm mi siatbarhtu asi ruangah thah ding asi,” a ti.

²² Sikhawmsele David nih, Abisai leh Joab sinah, “Nannih ngaihdan âunih an deih na? Nawknâk nan hawng ka pêk awt na maw? Kei hi tuhin Israel tla lakah lalchem kasi, tusûn ah Israel tla lakah mi âukhawm thah ding asi lo,” a ti.

²³ Churawhchun, Shimei sinah, “Thah ding na si lai loh, ti ka nan simh,” a ti.

David Nih Mephiboset Lakah A Vêlneihnâk A Langhtir

²⁴ Churawhchun, Saul tupa Mephiboset chu lalchem tawng ding hen a hawng. Lalchem chu Jerusalem a kaltâknâk thawk hen neh hen a hawng kîr nawlh lânlo chu a kê khawm tâwl lo hen, a khamul mêt lo hen a um ko.

²⁵ Mephiboset chu Jerusalem thawk hen lalchem tawng ding hen a hawng liauah lalchem nih a sinah, “Mephiboset, zei rangah ka sinah na kal bâk lo, na kal awtlo ma?” a ti.

²⁶ Anih nih a sâng le, “Na theih hâwi hen Bâwipa, kei chu kekhêng kasi. Ka to-aw rangah ka sanatung timhtuah ding leh ka chuan kho hen na sinah hawng ding ka ti le, sikhawmsele diklo hen hawng ka ruai.

²⁷ Nangmah sinah âwkrâwl hen hawng ka sim le, sikhawmsele nang chu Pathian vânmifial hâwi na si le, nangmah nih dik na ti zia zawng hen ti ko.

²⁸ Ka pa le dâwngsung tla chu nangmah lalchem nih thah ding an tlâk asi, sikhawmsele na dawhkân ah ei khonâk thuneihnâk na ka pêk le, nangmah lalchem sinah zângfahnâk deih khonâk ka nei lo rawh,” a ti.

²⁹ Lalchem nih a sâng le, “Nang sim ding zeikhawm a um lo rawh, nang leh Ziba nih Saul thilrî chu nanna ṭhen ding hen ka ruat mi rawh asi,” a ti.

³⁰ Mephiboset nih, “Ziba nih a ting hep ko seh, nangmah Bâwipa, himtê hen na hawng tlung mi ka rangah â tâwk asi,” a ti.

David Nih Barzilai Lakah A Vêlneihnâk A Langhtir

³¹ Gilead mi Barzilai khawm Rogelim thawk hen lalchem dawng ding hen Jordan ah a hawng bâk.

³² Barzilai chu upa tak asi le, kum sâwmriat mi asi. Amah chu minei tak asi le, Mahanaim ah lalchem a um liauah buh pêktu asi.

³³ Lalchem nih a sinah, “Jerusalem ah ka sinah hawng, keimah nih kan zauhkhenh lai,” a ti.

³⁴ Sikhawmsele, Barzilai nih, “Ka dam lai lo rawh, Lalchem sinah Jerusalem ah chun zeiruangah ka hawng êu lai?

³⁵ Kum sâwmriat kasi rawh le, zeikhawm nih hawng ka lawmhtir kho lo rawh, ka din leh ka ei mi khawm a thâwtnâk rêng ka theih lo rawh, la sak hâu khawm ka theih kho lo rawh. Lalchem rangah nawktirtu salam kasi lai.

³⁶ Kha hâwi lâwmman rokual tawng ding ka phû lo rawh. Churuangah Jordan Varâl lei tan hen na sinah ka hawng lai.

³⁷ In leiah hawng ka tlungtir le, ka nu leh ka pa thlân kiangah ka vûi kho ding hen. Hinah ka fapa Chimham a um ko, na sinah kal sele, na rian an ṭuan piak seh, ṭha na ti zia zawng hen hawng ti ko,” a ti.

³⁸ Lalchem nih a sâng le, “Ka sinah ka put lai le, na duh hâwi hen a tlûnah ka ti lai. Na deih hâwitê hen kan ti piak lai,” a ti.

³⁹ Churawhchun, David leh a mi le tla chu Jordan an kâi rawh. Barzilai chu a châwchawk le, mal a sâwm le, Barzilai chu in leiah a kîr rawh.

Lalchem Thu Ah Juda Leh Israel Anna êl

⁴⁰ Lalchem chu a hawng kâi rawh chun Juda mi zawzawng leh Israel mi khingkhuai nih an dawng le, Gilgal leiah a kal vima le, Chimham khawm a sinah a kal bâk.

⁴¹ Churawhchun, Israel mi zawzawng chu lalchem sinah an kal le, a sinah, “Bâwipa, zei rangah kan unau Juda mi le nih nang rangah an tâ bîk a ngaih hen na dawngsung leh na mi tla Jordan an tanpi na zia?” an ti.

⁴² Juda mi tla nih an sâng le, “Lalchem chu kanmah lakah mi asi ruangah kan ti asi. Zei rangah hi mi ruangah nan thinrun? Amah nih buh hawng kan pêk mi khawm asi lo, thildang zeikhawm hawng kan pêk mi khawm asi lo,” an ti.

⁴³ Israel tla nih an sâng le, “Lalchem David hi nanmah lakah mi pakhat sikhawmsele, nanmah tâ bîk a nanna ngaih mi ngâk hen a let râ hen kan nei dauh asi. Zei rangah hi tluk hen hawng kan zauhnawmh. Kîrpi ding hen sim masatu kha kanmah kan si ti nan philh rawh ma?” an ti. Sikhawmsele Juda tla thusim chu Israel tla ngâk hen a fâk dauh.