2 SAMUEL 17 - Bawm Common Language Bible Version

Husai Nih Absalom Rangah A Ruai Sual

¹ Hun sâwtlotê nûn chun Ahithophel nih Absalom sinah, “Minung sîng khat leh sâng nih hawng ka thîmtir le, tuzân ah David rangah ka ṭhâwl lai.

² An dît liau leh an chaklo liau chirah ka va do na lai le, an ṭih lai le, a mi le chu an tek hep lai. Churawhchun, lal cho ka thah lai le,

³ an ektê hen a mi le tla chu mo a pasal sinah a hawng kîr mi hâwitê hen ka hawng kîrpi na lai. Mi pakhat cho thah ding na duh, a dang vial chu an him lai,” a ti.

⁴ Hi hi Absalom leh Israel ruitu tla rangah krai ṭha tak hâwi hen a lang asi.

⁵ Absalom nih, “Tuah Husai kawh ule, zei hâwi hen a sim bâk lai, kan ngâinik lai,” a ti.

⁶ Husai a hawng tleng rawh chun, Absalom nih a sinah, “Hi hi Ahithophel nih krai hawng kan pêk mi asi, kan zûl lai ma? Asi lo chun, zei hâwi hen kan ti lai?” a ti.

⁷ Husai nih, “Tutan Ahithophel nih krai an pêk na mi chu a ṭhalo.

⁸ Na pa leh a kawrsen tla chu râltuktu râlṭha tak an si, vawm a fa an lâk piak le, a râng mi hâwi ko an si lai. Na pa chu kawrsen râltuk thiam tak asi le, zânah khawm a kawrsen tla sinah a um lai loh.

⁹ Tuhin pûk ah mawh mun dangah â thup lai. David nih nan mi le a do chun, a hâu theihtu zawng nih chun nan mi le rangah a neh rawh ti asi lai.

¹⁰ Churawhchun, chakeibaknei hâwi hen a râl a ṭha mi men nih na pa chu kawrsen rokual leh a mi le tla chu mi râlṭha tak an si ruangah an zâm lai.

¹¹ Kei krai chu hi hâwi asi, khatlei ram dawng thawk hen khatlei mi, tiva kap ah sep zat hen hawng a pûm na sele, nangmah nih tuknâk ah na ruai na lai.

¹² Churawhchun, David chu zei mun tal ah um seh kan tawng lai le, zei thil a hawng tlung ti a theih manh lânah kan do lai le, amah leh a mi le khawm pakhat khawm an him lai loh.

¹³ Khuapi ah a lût khawmsele, kan mi leh nih rirual an put lai le, khuapi chu tivakuam tleng khet an nûk lai le, tlâng tlûnah lung pakhat khawm umlo hen kan nûk rel lai,” a ti.

¹⁴ Absalom leh Israel mi zawzawng nih, “Husai krai chu Ahithophel krai ngâk hen a ṭha dauh,” an ti. Ahithophel krai ṭha zûl lo ding leh Absalom râwknâk ding hen LALPA nih a ruatkanh rawh asi.

David Chu Theihtir Leh Ruangsuak Hen A Um

¹⁵ Churawhchun, Husai nih bâwlpu Zadok leh Abiathar sinah Absalom leh Israel ruitu tla rangah krai a pêk mi leh Ahithophel nih krai a pêk dân tla a simh na.

¹⁶ Husai nih, “Mawhsareh hen David sinah mi fial ule, tuzân ah ramkaro kâinâk tiva ah riak lo hen Jordan lei kâi sawm seh, amah leh a mi le tla tleihtir leh thah an silonâk ding hen,” a ti.

¹⁷ Abiathar fapa Jonathan leh Zadok fapa Ahimaz nih Jerusalem dâivâu Enrogel tikhurchawh ah an ngâk ko, khuapi ah an lût mi âukhawm muh lo ding hen. To-aw nunau ngâksia nih thil a tlung mi a va simh na tâwn le, churawhchun annih nih Lalchem David sinah kal hen an va simh ding hen.

¹⁸ Sikhawmsele, nikhat chu mipa ngâksia nih a muh na le, Absalom rangah a va simh le, churawhchun mawhsareh hen an kal le, Bahurim ah mi pakhat in ah an va a thup. Chu mi pa nih a in kiangah tikhurchawh a nei le, a sungah an ṭum.

¹⁹ Churawhchun, chu dâwngpupa nupi nih khuhnâk a lâk le, puan a zâr le, a tlûnah fâng a pho le, âukhawm nih an theih kho lo ding hen.

²⁰ Churawhchun, Absalom to-aw tla chu, chu nunau in ah an va kal le, “Ahimaz leh Jonathan kha zeiah an um? ” ti hen an deih. Chu nunau nih chun, “Tiva an tan rawh,” a ti. Chu minung tla nih chun an zauh le, sikhawmsele an tawng na lo, churawhchun Jerusalem leiah an kîr nawlh rawh.

²¹ Chu minung tla an tlung nûn chun Ahimaz leh Jonathan chu tikhurchawh thawk hen an hawng suak le, David sinah thâwngthâng an va simh rawh. Ahithophel nih amah David rangah do ding krai a pêk na mi thu an simh le, khulrang hen tiva kanh ding an simh.

²² Churawhchun, David leh a mi le tla chu Jordan tan ding hen nî chêu ah anna thawh rawh.

²³ Ahithophel nih a krai a pêk mi an zûl lo ti a theih rawh chun, a sanatung a timhtuah le, amah khua leiah a kîr rawh. A thilti ding a ti thluh rawh chun â âwk le, a dâwngsung le thlân ah an vûi rawh.

²⁴ Absalom leh Israel tla nih Jordan an kâi liau takah David chu Mahanaim khuapi a tlung rawh.

²⁵ (Absalom nih Joab ruangrûl ah Amasa chu kawrsen hotu rangah a ruat. Amasa chu Jether, Ismael mi fapa asi, a nu chu Abigail, Nahas fanu Joab nu Zeruiah unaunu asi.)

²⁶ Absalom leh a mi tla chu Gilead ah riakmun an khuar.

²⁷ David chu Mahanaim a tlung rawh chun Nahas fapa Shobi, Amon thlâk Rabah khua thawk hen a hawng mi leh Ammiel fapa Makir, Gilead ram ah Rogelim khua mi Lodebar leh Barzilai nih an dawng.

^28-29 Annih tla nih chun khêng, tualbêl, ihkhun, David leh a hâwi le rangah buh rangah wheat, barley, buh, sang em mi, bâilep, purun, khuaizû, nûk khal, riakthâu leh dawrâ tla an hawng put. David leh a mi tla chu sungvâng leh tîhâl hen ramkaro ah an um lai ti an theih ruangah.