2 SAMUEL 16 - Bawm Common Language Bible Version

David Leh Ziba

¹ David nih tlâng tlûn a lanh nûnah Ziba Mephiboset to-aw hen anna tawng le, anih nih sanatung panih a phurhtir mi sang tlang zanih, grep châr sûr zâ, theirah sûr zâ leh savun uain dûr khat dil hen a hawng put.

² David nih, “Kha zawng kha zei na ti awt?” a ti. Ziba nih a sâng le, “Sanatung chu nangmah lal dâwngsung chuannâk ding, sang leh theirah chu na mi le tla ei ding, uain chu ramkaro ah an dî tikah din ding rangah asi,” a ti.

³ “Na pupa Saul tupa Mephiboset hi zeiah a um?” ti hen lalchem nih a deih. Ziba nih, “Jerusalem ah a um ko,” a ti. A pupa Saul ram chu amah rangah Israel tla nih an dirh piak awt nawlh ruangah.

⁴ Lalchem nih Ziba sinah, “Mephiboset thilneih zawzawng chu na tâ asi,” a ti. Ziba nih, “Na to-aw kasi, na duhzia ka ti vima lai,” a ti.

David Leh Shimei

⁵ Lalchem David chu Behurim a tlung rawh chun Gera fapa Shimei, Saul taksa tlâi chu tawng ding hen a hawng le, a hawng lemang hen siat a barh. David chu a rianṭuantu leh a mi leh amah vêngtu nih kulh bung khawmsele,

⁶ Shimei nih lung seh hen, “Kal ving! Kal ving! Mi thah tupa, misual!

⁷ Saul ram na suh le, a dâwngsung tam tak na thah ruangah tuah LALPA nih a nan rêp asi.

⁸ Na ram chu na fapa Absalom sinah LALPA nih a pêk rawh; tu chun na vei rawh, mi thahtu!” ti hen siat a barh.

⁹ Churawhchun, Zeruiah fapa Abisai nih lalchem sinah, “Zei rangah nang Bâwipa rangah hi uicho nih siat an barh zia? Hawng ka kaltir le, a lû ka tan lai!” a ti.

¹⁰ Lalchem nih Abisai leh a unaupa Joab sinah, “Hi hi nan rangah zei me a pawi, nanmah tlûnah â sei lo, LALPA nih hawlhsiat barh ding hen a titir mi asi chun zei rangah a ti âunih a ti kho lai?” a ti.

¹¹ Churawhchun, David nih Abisai leh a rianṭuantu tla sinah, “Ka fapa ngelchel nih thah ding a hawng ka awt, churuangah hi Benjamin mi thilti hi zei rangah chê nan ti? LALPA nih ti ding hen a simh mi asi. Churuangah amah chu mâk thlap ule, ti ko seh.

¹² LALPA nih ka vânduainâk hi a theih hen hi hawlhsiat barh hi malsâwmnâk hen khawm a rulh kho asi,” a ti.

¹³ David leh a mi tla chu lampi ah an kal vima le, Shimei nih a ṭhâwl vima, hawlhsiat barh leh lung leh valei hen a seh na le, tlâng sîrah a kal vima bâk.

¹⁴ Lalchem leh a mi tla chu Jordan an tleng rawh chun thungâi an dî le, anna dîn.

Absalom Chu Jerusalem Ah A Um

¹⁵ Absalom leh Israel mi zawzawng chu Jerusalem ah an lût le, Ahithophel khawm an sinah â tel bâk.

¹⁶ David hâwipa a zumh thlo mi Husai nih Absalom a muh rawh chun, “Lalchem chu dam sâwt seh! Lalchem chu dam sâwt seh!” ti hen a au.

¹⁷ Absalom nih Husai sinah, “Na hâwipa na zumh thlo mi chu zei hâwi asi rawh ne? Zei rangah a sinah na kal bâk lo?” a ti.

¹⁸ Husai nih, “Zeitin ka kal kho lai? Israel mipi zawzawng leh LALPA nih a thîm mi leiah ka ṭângṭawm mi, nangmah sinah ka um awt.

¹⁹ Ka pupa fapa lo chu âu me a rian ka ṭuan piak awt? Na pa rian ka ṭuan hâwitê hen na rian ka ṭuan awt,” a ti.

²⁰ Churawhchun, Absalom nih Ahithophel sinah, “Tuah hinah kan um ko, zei hâwi ti ding hen krai na kan pêk awt ne?” a ti.

²¹ Ahithophel nih a sâng le, “Na pa nupisûn lal in ngâktu ding hen a mâk mi sinah kal le, va ihpi rawh. Churawhchun, na pa nih mêlma hâwi hen an ruat mi asi ti Israel mi tla nih an theih asi chun, nangmah zûltu tla chu thungâi an râl a ṭha lai,” a ti.

²² Churawhchun, lal in tlûnah puan an zâr le, âuzawng muh hen Absalom chu in sungah a lût le, a pa nupisûn tla chu a ihpi na rawh.

²³ Chubang hun liauah Ahithophel nih krai a pêk na mi zawng chu Pathian nih a pêk na mi hâwitê hen an pawm tâwn. David leh Absalom khawm nih an zûl tâwn asi.