2 SAMUEL 14 - Bawm Common Language Bible Version

Absalom Hawng Kîrnâk Rangah Joab Nih A Timhtuah

¹ Joab nih David chu Absalom a um lo ruangah thungâi a lung fâk ti a theih le,

² Tekoa ah um mi nunau fing tak chu a kawhtir na le, a hawng tleng rawh chun a sinah, “Mithi ruangah ulh mi hâwi hen um le, ulhnâk puan a khuh le, na sam khawm riat lah, nunau sâwt tak mithi ulh mi hâwi hen a langhtir.

³ Churawhchun, sim ding mi thu va sim ding hen lalchem sinah va kal,” a ti. Sim ding mi thu vial chu Joab nih a simh rawh.

⁴ Nunau chu lalchem sinah a va kal le, zah tak hen a buk rep le, mâi a mûk, a sinah, “Bâwipa, hawng ka ṭangpi!” a ti.

⁵ Lalchem nih, “Zei na duh?” ti hen a deih. Nunau nih a sâng le, “Pu, Numei pâm tak kasi, ka pasal nih hawng ka thih tâk.

⁶ Fapa panih ka nei le, nikhat chu phâisen ah thu anna êl le, anmah ṭhentu ding âukhawm an um lo, pakhat nih a unaupa rangah a thah ving.

⁷ Pu, ka rualsia zawzawng nih keimah thangsiat an hawng ka phurh le, a unaupa a thah mi ruangah a thahtupa chu thah bâk ding an ka deih. Kei chu fapa lo hen um ding ko rawh, ka lungumnâk chem an veih ving lai le, ka pasal chu fapa lo hen a min a tlâu awt ko rawh,” a ti.

⁸ Lalchem nih a sâng le, “Na in leiah kîr ko rawh, chu thunawk chu keimah nih ka ruat lai,” a ti.

⁹ Anih nih chun, “Bâwipa, na ruat mi zawzawng chu kei leh ka dâwngsung nih a mawh chu kan phurh lai, nang leh na lalchem dâwngsung lak chun a mawh um lah seh,” a ti.

¹⁰ Lalchem nih a sâng le, “Âu tal nih an ṭhih chun, ka sinah hawngpi le, zeiliau khawm ah a nan nawktir lai lo rawh,” a ti.

¹¹ Nunau nih, “LALPA, na Pathian sinah, ka fapa pakhat a thih ruangah ka unau tla nih a thahtu ka fapa rangah lehrûl sam ding an awt mi thu ah an thah lonâk ding hen hawng ka ngiar piak,” a ti. David nih a sâng le, “LALPA a nung mi min sâl hen ka sim asi, na fapa chu tâwmtê khawm nganfâk a tawng lai loh,” a ti.

¹² Nunau nih a sinah, “Bâwipa, zângfahtê hen thu kâ khat hawng ka simtir rih,” a ti. Anih nih a sâng le, “Sim ko me,” a ti.

¹³ Nunau nih a sinah, “Zei rangah Pathian mi lakah thil diklo na ti zia? Mi ram ah na fapa a tâng mi chu na tlungtir dahlo. Churuangah tuah na thusim ruangah nangmah na mawh asi.

¹⁴ Kan thi ver ding ko rawh, tual ah tî thlêt hen pumh nawlh kho lo mi hâwi hen kan si ko rawh. Pathian khawm nih a thi rawh mi chu a nunh nawlh lo. Sikhawmsele, Lalchem nih chun a tâng mi minung kîr nawlh ding hen a lampi a hâwl kho asi.

¹⁵ Tuah, Bâwipa, na sinah mi nih an hawng ka ṭhih ruangah thusim ding hen ka hawng nâk san chu, an deih mi chu na hawng ka ti piak lai ti lungum ruangah asi.

¹⁶ Ka thu hi nangnih hawng ka ngâi piak hen kei leh ka fapa hawng kan thah hen Pathian nih a mi le rangah a pêk na mi ram lakah kan um mi hi veih ding hen hawng kan awttu lakah mi chu na kan hum ding hen ka ruat ruangah asi.

¹⁷ Pu, kei ruatnâk ah nang chu Pathian vân minung hâwi na si le, a sia a ṭha khawm na thliar kho, thu na sim mi hâwi hen na ka hum lai ti ka ruat. LALPA na Pathian chu na sinah um seh,” a ti.

¹⁸ Lalchem nih a sâng le, “Thu ka nan deih awt, thudik fiang tak na hawng ka simh ding asi,” a ti. Nunau nih a sâng le, “Bâwipa, zei thu tal hawng ka deih,” a ti.

¹⁹ Lalchem nih chun a sinah, “Hi thu lakah hin Joab nih an telhsih bâk ma?” a ti. Nunau nih a sâng le, “Bâwipa, nangmah min hen ka sim asi, na thu deihnâk sâng ding hen zeikhawm khamnâk lampi a um lo. Hotu ah na siam mi Joab nih ti ding leh sim ding hen hawng ka simh mi asi.

²⁰ Sikhawmsele hi thu zawzawng hi a tluang khonâk ding hen a ti mi asi. Nang Lalchem chu Pathian vânmifial hâwi hen na fing le, thil a hawng um mi khawm na theih hep,” a ti.

²¹ A nehnûn chun lalchem nih Joab sinah, “Na duh mi thu chu ka thlûk rawh, va kal le, tlangvâl Absalom chu hinah hawng tlungpi,” a ti.

²² David mâika ah Joab chu tual ah a buk le, a sinah, “Bâwipa, Pathian nih mal an sâwm seh! Tuah ka nan ngiar mi na ka siang piak ruangah ka lakah na lungawi ti ka theih,” a ti.

²³ Churawhchun, a thawk le, Gesur ah a va kal le, Absalom chu Jerusalem ah a hawng tlungpi nawlh rawh.

²⁴ Lalchem nih, “Absalom chu lal in ah um lo ding hen thu a pêk rawh. Lalchem nih chun, “Muh ding ka duh lo,” a ti. Churuangah Absalom chu amah in ah a um le, lal mâika ah chun â va langh lo.

Absalom Leh David Anna Remnâk

²⁵ Israel ram zawzawngah Absalom hâwi hen a mêlṭha minthang pakhat khawm an um lo, a lû thawk hen a kezaphah tiang zei khawm sâwinâk a um lo.

²⁶ A sam khawm thungâi a ṭha, kum khat ah veikhat vima tan ding a suak, a sâu hen a rit tuktarâi ruangah. A sam rit chu tahnâk dân hen kilogramme nih ngâk hen a rit.

²⁷ Absalom nih fapa pathum leh fanu pakhat a nei, a min chu Tamar asi, mêlṭha tak asi.

²⁸ Absalom chu lal muh lo hen Jeruslem ah kum nih a um.

²⁹ Churawhchun, Absalom nih Joab chu lal sinah kal piak ding a kawh le, sikhawmsele, a kal duh lo. A fial nawlh le, chu khawm ah a kal duh lo fâwn.

³⁰ Churawhchun, Absalom nih a to-aw sinah, “Joab phâisen chu ka tâ sangtu asi, fâng min liau chir asi. Kal u le, va duah u,” a ti. Churawhchun, phâisen chu an va duah rawh.

³¹ Joab chu Absalom in ah a va kal le, “Zei rangah ka phâisen na to- aw tla nih an duah?” ti hen a va deih.

³² Absalom nih a sâng le, “Kan kawh le, na hawng lo ruangah, lal sinah kal hen hawng ka deih piak ding kan duh ruangah: “Zei rangah Gesur kaltâk hen hinah ka hawng êu? Chunah um ziar sele kei rangah a ṭha ding mi,” a ti. Absalom nih a sim vima le, “Lalchem muh kho ding hen rem na ka ruat piak ding kan duh le, ka sual mi asi chun hawng ka thah ko seh,” a ti.

³³ Churawhchun, Joab chu lalchem sinah a va kal le, Absalom thusim chu a lanh. Lalchem nih Absalom chu a kawh le, churawhchun a va kal le, a mâika ah a kûn le, mâi a mûk, lalchem nih châwchawk hen a lawmh.