2 SAMUEL 13 - Bawm Common Language Bible Version

Amnon Leh Tamar

¹ David fapa Absalom nih farnu mêlṭha tak a min Tamar a nei. David fapa dang Amnon nih a mêldi thlo.

² A duh tuktarâi ruangah a zâw phah rê. Tamar chu nungâk thenhlimh asi le, mi hen anna tawng lo ding hen kilkâwi mi asi ruangah Amnon rangah chun thilhar ual asi.

³ Sikhawmsele David unaupa Shamah fapa a min Jonadab mi perpê tak hâwipa pakhat a nei.

⁴ Jonadab nih Amnon sinah, “Nang hi lalchem fapa na si, sikhawmsele a ni ni hen zûrnâk mêl na put dadauh mi hi a san zei?” a ti. Anih nih a sâng le, “Ka unaupa, Absalom farnu thungâi ka duh,” a ti.

⁵ Jonadab nih a sinah, “A damlo tir le, na ihkhun ah it. Na pa an zauh ding hen a hawng tikah a sinah, ‘Zângfahtê hen ka farnu Tamar kha hawng ka bulsan ding hen simh, ka mitmuh ah buh an hawng ka timhtuah piak sele amah ngelchel nih hawng ka bulsan seh,’ ti hen simh,” a ti.

⁶ Churawhchun, Amnon chu â damlo tir le, a ihkhun ah a it rawh. Lalchem David chu amah zauh ding hen a va kal le, Amnon nih a sinah, “Zângfahtê hen Tamar kha hawng sele, ka mitmuh ah sang hawng ka siam piak sele, amah ngelchel nih ka rangah hawng ka timhtuah piak seh,” a ti.

⁷ David nih Tamar lal in ah a um mi sinah thu a chah, “Amnon in ah va kal le, ei bâr va timhtuah piak,” a ti.

⁸ Churawhchun, a va kal le, ihkhun ah a it mi chu a va muh. A mitmuh ah sang chawmh mi a lâk le, sang tlang a siam. Chun sang tlang chu a rêu le,

⁹ a rêunak lakah mi chu a rangah ei ding hen a thur piak le, sikhawmsele a duh lo. Chun Amnon nih “Midang tla kha suaktir hep na,” a ti le, an suak hep.

¹⁰ Churawhchun, Tamar sinah, “Sang tlang chu ka ihkhun ah nangmah ngelchel nih hawng ka pêk rawh ne,” a ti. Sang tlang chu a lâk le, a sinah pêk ding hen a sinah a kal rawh.

¹¹ Sang a pêk liau takah a kuah rep le, a sinah, “Ka sinah hawng it bâk!” a ti.

¹² Tamar nih, “Ka duh loh, chubang hâwi thangduainâk ding hen hawng ka ti êu lah. Hi hâwi chu a mualpho tuk!”

¹³ Zeitin zatlâng sinah ka thang nawmhnâk chu ka thuh kho lai? Nang khawm nih Israel phun chu ningzak na saih awt asi. Lalchem simh le, na ka umpi ding rem a ti ding ka ruat,” a ti.

¹⁴ Sikhawmsele, a ngâi duh lo le, a nih ngâk chun a chak dauh dangâiah a tleihrêm rawh.

¹⁵ Churawhchun, Amnon nih Tamar rangah chun a hua tuktarâi fâwn rawh, a huatnâk chu a lânah a duhnâk ngâk hen a fâk dauh. Tamar rangah, “Suak ving!” a ti.

¹⁶ Tamar nih a sâng le, “Chu hâwi ding asi lo, na hawng ka nar mi mawhnâk chu hi na ka tleihrêm mi ngâk hen a fâk!” a ti. Sikhawmsele Amnon nih tâwm khawm a siar piak lo.

¹⁷ A to-aw a kawh le, “Hi nunau hi ka mitmuh ah mi hi suah ving le, inkhâr renh,” a ti.

¹⁸ A to-aw nih chun lênglei ah a suah le, inkhâr a renh pang. Tamar nih kawrfual bânbul â ruk, chu liauah lal fanu tla pasal nei lo mi thuamh dân asi.

¹⁹ Tamar nih vachâm a lû ah a phulh le, a kawrdawh a thlêk le, a kut hen a mêl a huh le, ṭap bû hen a kal vima rawh.

²⁰ A ṭapa Absalom nih a muh le, Amnon nih na thin an runhtir mu? Ka farnu, a runh tuk lah, na nu-ei na ṭapa bâk ma kha a, âu sin khawm sim lah,” a ti. Churawhchun, Tamar chu a ṭapa Absalom sinah ngaihsia tak hen a va um rawh.

²¹ Lalchem David nih chu hâwi hen thil a um mi chu a theih le, thungâi a thin a thawk.

²² Absalom khawm nih a farnu a tleihrêm ruangah Amnon rangah a hua le, sawnh khawm a sawnh duh loh.

Absalom Nih Phû A Lamnâk

²³ Kum nih nûnah Absalom nih Efraim khua kiangah Baal Hazor ah a dawrâ mul a mêt le, lal fapa zawzawng chunah a sâwm na.

²⁴ Lalchem David sinah a va kal le, a sinah, “Bâwipa, ka dawrâ mul ka mêt awt. Nang leh na rianṭuantu tla chu puai lakah nan hawng kho lai lo ma?” a ti.

²⁵ Lalchem nih a sâng le, “Hawng kho lai loh ka fapa, kan ektê hen kan hawng chun, na rangah a nawk tuk lai,” a ti. Absalom nih a ngiar êu le, khawmsele lalchem chu a êt lo, Absalom rangah, “Kal ko,” a ti.

²⁶ Sikhawmsele, Absalom nih, “Asi ma chu, ka unaupa Amnon tal na hawng tir lai lo ma?” a ti. Lalchem nih, “Anih khawm zei rangah a hawng êu ding?” a ti.

²⁷ Sikhawmsele, David rangah Amnon leh lal fapa dang tla khawm kal ding hen a ngiar êu. Absalom nih lalchem rangah puai hâwi a timhtuah le,

²⁸ a to-aw tla khawm a simh zet na, “Amnon rangah zû cherkhet dinh u le, thah ding hen thu kan pêk na tikah amah chu thah ko u, ṭih rîlmâl lah u, a mawh chu keimah nih ka phurh lai, zâm lo hen râlṭha tak hen um u,” a ti,

²⁹ Churawhchun, to-aw tla nih Absalom nih a simh na hâwi hen Amnon chu an thah rawh, David fapa dang tla chu an sanatung tlûnah anna chuan le, an tek hep.

³⁰ In leiah an tlung hen lampi ah an um liauah David sinah, “Absalom nih na fapa tla pakhat khawm relh lo hen a thah hep na,” ti hen an simh,

³¹ Lalchem chu a thawk le, a ngaihsia tuk ah a puan a thlêk le, tual ah a rîl thlo. A to-aw a sinah mi tla khawm nih an nipuan an thlêk bâk.

³² Sikhawmsele, David unau Shamah fapa Jonadab nih a sâng le, “Pu, na fapa zawzawng chu an thah na lo le, Amnon lâwng lo ma a thi a! Amnon nih a farnu Tamar a tleihrêm ruangah a râl ti na theih ko kha ta a.

³³ Churuangah na fapa zawzawng an thah ti mi chu lung lah, Amnon cho thah asi,” a ti.

³⁴ Absalom chu chu liau chun a tek ving. Chu liau tak chun râlvêngtu nih Haronaim tlâng thawk hen an hawng ṭum mi zapi minung a muh na. Chun, râlvêngtu chu lalchem sinah a va kal le, a muh na mi thu a va simh,

³⁵ Jonadab nih David sinah, “Chu tla chu na fapa tla an hawng lai ka ti mi kha an si taktê,” a ti.

³⁶ Chu hâwi a sim thluh kâ hen David fapa tla chu an hawng lût le, an ṭap chawlh, David leh a rianṭuantu tla khawm ngaihsia tak hen an ṭap bâk.

^37-38 Absalom chu a tek le, Gesur lalchem Amihud fapa Talmai sinah a va kal le, chunah chun kum thum a va um. David nih a fapa Amnon chu hun sâwt tak a ulh le,

³⁹ Amnon thihnâk a ulh mi a lîm rawh chun Absalom thungâi a ngâi.