2 SAMUEL 12 - Bawm Common Language Bible Version

Nathan Thusim Leh David Rimnâk

¹ LALPA nih David sinah khuavâng Nathan a fial. Nathan chu a sinah a va kal le, a sinah, “Minung panih khua khat ah an um le, minung pakhat chu minei asi, pakhat chu mipâm asi.

² Mineipa nih ranrual leh dawrâ rual tla tam tak a nei,

³ mipâm nih chun a châwk mi dawrâ fatê pakhat cho a nei. A fa le hen a in ah a kilkâwi na, a in sungkhur a mi buh hen a châwm le, a dinnâk hâi lakah mi a dintir le, a êl tlûnah a siah, chu dawrâ fa chu a fanu hâwi hen a zauh.

⁴ Nikhat chu mineipa in ah khual pakhat a hawng tlung. Chu mineipa nih chun khualpa rangah a ran neih chu pakhat khawm thah ding a siang lo le, mipâm dawrâ fa chu a suh le, a khual rangah buh ei ding a tuah piak,” a ti.

⁵ David chu mineipa thu lakah thungâi a rothawk le, “LALPA a nung mi min sâl hen ka tiam, chu hâwi minung chu thi tlâk asi!

⁶ Chu hâwi hen thil diklo a ti ruangah a lâk mi a leh li hen a rulh nawlh ding asi,” a ti.

⁷ Nathan nih a sinah, “Chu minung chu nangmah na si. Hi hi LALPA, Israel Pathian nih a sim mi chu asi: ‘Saul kutah mi ka nan hum le, Israel lalchem ah ka nan siam.

⁸ Saul ram leh a nupi tla khawm ka nan pêk; Israel leh Juda lakah lalchem ah ka nan siam: Hi hi tâwk lah sele, a dang a lehnih khawm ka nan pêk lai.

⁹ Chu hâwi mi lakah zei rangah ka thu na ngâilo? Zei rangah hi hâwi sualnâk thil na ti? Râl tuknâk ah Uria chu Amon mi tla rangah na thahtir na, a nupi chu na lâk piak ving!

¹⁰ Tuah na thlâk zawzawng thlâk tla zeimaw mi chu Uria nupi na suh ruangah leh ka thu na ngâilo ruangah an thi hep ding asi.

¹¹ Nangmah dâwngsungkhur lakah mi, na tlûnah nawknâk tuahtu ding hen ka siam awt ti ka nan simh. Na nupi tla chu na sinah mi ka lâk lai le, midang rangah ka pêk lai le, sûn nî chêu ah an ihpi na lai.

¹² A thuptê hen na sual mi, Israel mi zawzawng sinah sûn ah nî chêu ah ka langh awt,” a ti.

¹³ David nih Nathan sinah “LALPA tlûnah thilsual ka ti ngâk asi,” a ti. Nathan nih, “LALPA nih a nan ngaihdam rawh, na thi lai loh.

¹⁴ Sikhawmsele, hi bang hâwi na thilti nih LALPA na siarlo zia a langh ruangah na fa lam chu a thi lai,” a ti.

¹⁵ Churawhchun, Nathan chu a in leiah a lâwi rawh. LALPA nih Uria nupi nih David rangah a ring piak mi chu fâk tak hen a damlotir.

David Fapa Thihnâk

¹⁶ David nih chu ngâksia dam ding hen Pathian sinah thla a cham. Zân siar hen a in kardang ah a lût le, ṭuang ah zân khuadei a rîl ko.

¹⁷ A rianṭuantu tla nih thawh ding an tum le, thawk hen an sinah zeikhawm ei ding a duh lo.

¹⁸ Zarhkâr khat nûnah ngâksia chu a thi le, sikhawmsele a rianṭuantu tla nih simh ding an ṭih. “Ngâksia a dam liau men ah kan sawnh le, hawng kan sâng lo mi, a fa a thih thu zeitin kan va sim kho zia lai? Amah leh amah nganfâk â pêk lebang lai mawh!” an ti.

¹⁹ David nih thu thup anna ruah mi lakah a fa a thi rawh ti a theih le, churawhchun ngâksia a thi le thi lo thu a deih na. Annih nih an sâng le, “A thi rawh,” an ti.

²⁰ Ṭuang ah a it mi a thawk le, tak â khawlh le, a sam a riat le, a nipuan a thleng. Churawhchun, LALPA in ah a kal le, Pathian a sawnh le, in leiah a hawng lâwi rawh chun, buh a lam le, an tuah kâ hen a ei rawh.

²¹ A rianṭuantu tla nih, “Hi hi zei zia kan theihthiam lo thlo, ngâksia a dam liau lehlam ah na ṭap le, buh-an khawm na ei lo, a thih nûnah na thawk le, buh-an tla na ei!” an ti.

²² David nih a sâng le, “Asi ngâk, ngâksia a dam liau chun buh khawm ka ei lo, ṭap khawm ka ṭap. LALPA nih hawng ka zângfah lai le, a damtir kekkawk lai mawh ka ti ruangah.

²³ Sikhawmsele, tuah lam chun a thi rawh le, zei rangah buh ka ei lo ding? Ngâksia chu ka nungtir kho nawlh mazei? Zei tik ni ah mawh chun a umnâk ah ka kal nget bâk lai, kei sinah lam chun a hawng kîr ding asi lo rawh,” ti ka ruat ruangah.

Solomon Suaknâk

²⁴ David nih a nupi Bethseba chu thla a ngamh le, a ihpi le, fapa a ring le, a min ah Solomon ti hen a sak. Ngâksia chu LALPA dâwt hen a um le,

²⁵ Nathan khuavâng rangah a min ah Jedidiah sak ding hen thu a chan.

David Nih Rabah Khua A Lâk

²⁶ Chu liau chun Joab nih Rabah khua Amon khuapi chu a do vima.

²⁷ David sinah thâwng thanh ding hen mi a fial le, “Rabah khua ka do le, an tikhur chu ka lâk rawh.

²⁸ Tuah murui dang tla zawzawng pumh na le, nangmah ngelchel nih khuapi chu lâk. Khuapi chu keimah nih lâk mi si hen min put ding ka duh lo,” a ti.

²⁹ Churawhchun, David nih a mi le a pumh na le, Rabah khua leiah a va kal le, a do na le, a neh rawh.

³⁰ Amon pathian Milkom (Molek) lû ah mi ngûn lallukhuh kilogramme sawmthum panga rit leh lungsung hen David nih a lâk. David nih amah lû ah â khuh, thil tam tak chu khuapi ah mi chu a lâk.

³¹ Chubang tla hen chu mi khua minung rangah sarei tla, tualchawhnâk thîrzum tla, reitlung tla leh tual rawh siamnâk rian a ṭuantir na. Chu hâwi hen Amon mi khua dangah um mi tla rang khawm a titir na. Churawhchun, a mi tla hen Jerusalem leiah an kîr rawh.