2 SAMUEL 10 - Bawm Common Language Bible Version

David Nih Siria Mi Leh Amon Mi A Neh Na

¹ Chubang nûnah chun Amon lalchem Nahas chu a thi le, a fapa Hanun chu a hawng lal.

² Lalchem David nih, “Ka lakah a pa Nahas nih a ti hâwi hen kei khawm nih Hanun lakah hâwi zumhkâi ka sinak ka langh awt,” a ti. Churawhchun, David nih a dâwt leh riahnâk thu va ruah ding hen mi tla a fial. Amon ram an va tlung rawh chun,

³ Amon ruitu tla nih lal sinah, “David nih na pa zah ruangah dâwtnâk thusim ding hen hi bang tla hi hawng fial ding hen ma na ruat? Asi rîlmâl lai loh! Kanmah hawng kan neh khonâk ding hen khuapi thlingthlâktu ah a hawng fial na mi an si!” an ti.

⁴ Hanun nih David mifial tla chu a tleih na le, an khamul sîr khatlei a mêt piak na le, an nipuan tla an tawkâwng tiang a ât piak na le, a tlungtir na.

⁵ Tlung ding khawm an ningzak thlo rawh. Chu thil a hawng um mi chu David nih a theih le, an khamul a chawrh nawlh lânlo chu Jeriko ah um rih ding hen thu a chah na.

⁶ Amon mi tla nih David chu an mêlma ah an siam rawh ti an theih le, Bethrehob leh Zobah ah mi Siria kawrsen sîng nih Tob ah mi sîng khat sâng nih, Maakah lalchem nih minung sâng a hawng put.

⁷ David nih chu chu a theih le, Joab leh a kawrsen zawzawng va do na ding hen a fial rawh.

⁸ Amon mi tla chu an hawng le, Rabah an khuapi kiangah mun an khuar le, a dang tla Siria mi leh Tob ah mi leh Maakah thawk hen hawng mi tla chu ram lakah um mun an khuar.

⁹ Joab nih chun dunglei leh mâilei ah mêlma tla nih an do na awt ti a theih le, churawhchun Israel kawrsen zumhkâi chem mi tla chu Siria leikâng hawi hen mun a khuartir na.

¹⁰ A dang tla chu a unaupa Abisai ruai hen Amon leikâng hawi hen mun an khuar.

¹¹ Joab nih Abisai sinah, “Siria nih hawng kan neh chun, hawng ule, hawng ka bawmh u, nang khawm Amon mi tla nih an neh chun ka hawng lai le, kan bawmh lai.

¹² Chak tak leh râlṭha tak hen um u! Kan mi leh kan Pathian khuapi rangah kan do lai. LALPA duhzia hâwitê hen ti hen um seh!” a ti.

¹³ Joab leh a mi tla nih tuk ding an va kal le, Siria mi tla chu an tek rawh.

¹⁴ Amon mi tla nih Siria mi tla an tek mi an muh rawh chun, Abisai hen anna do mi chu an tek bâk le, khuapi ah an kîr. Churawhchun, Joab nih Amon a do mi chu Jerusalem leiah a kîr bâk rawh.

¹⁵ Siria mi tla nih Israel mi nih hawng kan neh rawh ti anna theih le, an kawrsen zawzawng an pumh na.

¹⁶ Siria mi tla chu Eufretis tiva saklei kângah lalchem Hadadezer nih a fial na le, Jobah ah mi lalchem Hadadezer kawrsen hotu, Sobak ruinâk hen Helam ah an kal.

¹⁷ David nih chu chu a theih rawh chun Israel kawrsen tla chu Jordan Va kanh hen a pumh na le, an na donâk ding mi mun Siria tla nih an khuar mi Helam lei an fûk. Tuknâk chu an hawng a dawmh le,

¹⁸ Israel kawrsen tla nih Siria kawrsen tla chu dunglei kângah an khirh na. David leh a mi tla nih kari lakah a chuan mi zasarih leh rang tlûnah to mi sîng li an thah, an mêlma hotu Sobak an liamh mi a thi mi hen.

¹⁹ Lalchem Hadadezer tangah an um mi lal tla nih Israel tla nih an neh na ti an theih le, Israel tla hen remnâk an siam le, anmah minung ah an um rawh. Siria mi tla nih Amon tla ṭangpi ding an ṭih rawh.