2 Lal 9 - Bawm Common Language Bible Version

Israel Lalchem Si Ding Hen Jehu Chu Sariak Thuh Asi

¹ Chu liau chun khuavâng Elisa nih khuavâng tla lakah mi tlangvâl pakhat a kawh le, a sinah, “Gilead ram ah Ramoth khua ah kal ding hen a tîm rawh. Hi oliv sariak dûr hi a put le,

² chu mun na tleng rawh chun Jehu, Jehosaphat fapa Nimsi tupa va hâwl. A hâwi leh tla lakah mi in kardang sungah kalpi le,

³ a lû ah hi sariak hi tawih, ‘LALPA nih Israel lalchem rang ding ah sariak an thuh ti phuang le, mawhsareh hen tektâk ving,’ a ti.

⁴ Churawhchun, khuavâng tlangvâl chu Ramoth khua ah a kal.

⁵ Chunah anna pûmnâk ah chun kawrsen hotu a muh le, a sinah, “Pu, thu simh ding ka nei,” a ti. Jehu nih, “A zei mi hi me na kan sawnh dauh?” a ti. Anih nih a sâng le, “Nangmah ta a,” a ti.

⁶ An panih hen in sungah an lût le, khuavâng tlangvâl nih Jehu lû ah oliv sariak a tawih le, a sinah, “LALPA, Israel Pathian nih, ka mi Israel tla lalchem siding hen sariak ka nan thuh,

⁷ Jezebel nih ka to-aw leh ka khuavâng tla a thah ruangah amah ka rêp khonâk ding hen na pu Ahab fapa chu na thah ding asi.

⁸ Ahab dâwngsung zawzawng leh a thlâk tla chu an thi hep ding asi; a dâwngsungkhur lakah mi mipa fa upa mi leh ngâksia ka veih hep awt.

⁹ Israel lalchem Jeroboam dâwngsungkhur tla leh Israel lalchem Baasha leh a dâwngsungkhur tla ka ti hâwi hen ka ti awt.

¹⁰ Jezebel chu vûi hen a um lai lo le, Jezreel ram ah a ruak ui nih an ei lai,” a ti. Chu thu a sim thluh rawh chun in kardang sungah mi chu a suak le, khuavâng tlangvâl chu a tek rawh.

¹¹ Jehu chu a hâwi tla sinah a kîr le, annih nih chun a sinah, “Thil zeizawng a tluang ma? Kha mi â pa nih zei rangah an duh?” an ti. Jehu nih a sâng le, “A duh mi chu nan theih ko kha ta a,” a ti.

¹² Annih nih an sâng le, “Kan theih lo a! Zei thu a sim hawng kan simh bâk,” an ti. Anih nih, “LALPA nih Israel lalchem siding hen sariak ka nan thuh a ti, ti hen hawng ka simh,” a ti.

¹³ A hâwi le tla nih mawhsareh hen an kawrdawh an lît le, Jehu dîrnâk ding hen leilâk ah an phah le, tâwtawrâwt an tum le, “Jehu lalchem asi rawh,” ti hen an âu.

Israel Lalchem Joram An Thahnâk

^14-15 Churawhchun, Jehu chu Lalchem Joram chu Siria lalchem Hazael hen Ramoth ah anna donâk ah an liamh le, a mâ thlawp ding hen Jezreel khua ah a um mi lakah a hel rawh. Jehu nih a minung tla hotu sinah, “Keimah leiah ṭângṭawm mi nan si chun, pakhat khawm Ramoth khua thawk hen suak hen Jezreel mi tla theihtir lo ding kha theih set u,” a ti.

¹⁶ Jehu chu a kari ah â chuan le, Jezreel leiah â thawh rawh. Joram chu a dam tliang lo rih le, Juda lalchem Ahaziah khawm amah a veh le, chunah a um ko.

¹⁷ Jezreel khua râl vêngnâk insâng thawk hen râl vêngtu nih Jehu leh a minung tla hawng mi a muh na. “Âu tla mawh kari lakah an hawng chuan mi ka muh na,” ti hen a âu. Joram nih, “Rang tlûn chuan mi fial na u, hâwikawmh mawh, mêlma mawh, an si,” a ti.

¹⁸ Mifial chu Jehu sinah a kal le, “Hâwikawmh si hen ma na hawng kal ti lal nih theih a duh,” a ti. Jehu nih a sâng le, “Chubang chu nang theih ding mi asi loh, ka dunglei hin um,” ti hen a sâng. Râlvêngtu nih, “Kan mifial chu a hawng mi tla sinah tleng chu a tleng le, khawmsele a hawng kîr lo rêng,” ti hen a sim.

¹⁹ Mifial dang an kaltir nawlh le, chu nih chun, a kal masa mi hâwitê hen Jehu rangah thu a deih fâwn. Jehu nih, “Nang theih ding a um loh, ka dunglei hin um rawh,” a ti fâwn.

²⁰ Râl vêngtu nih, “Mifial chu a hawng mi tla sinah a tleng le, khawmsele a hawng kîr lo rêng,” a ti fâwn. Chun anih nih chun murui lakah hotu nih a kari chu mi â hâwi hen a khalh, “Jehu ko a bangh,” a ti.

²¹ Lalchem Joram nih,“Kari kha timhtuah u,” a ti. Kari chu an timhtuah le, Joram leh lalchem Ahaziah chu anmah kari vevê ah anna chuan le, Jehu tawng ding hen an suak rawh. Naboth phâisen ah anna tawng rawh.

²² Joram nih, “Remnâk thu hen ma na hawng?” a ti. Jehu nih, “Zeitin remnâk a um kho lai, na nu Jezebel nih dâwithiam leh milem a siam mi a um kar vial chu remnâk a um kho lai mazei?” a ti.

²³ Joram nih Ahaziah sinah, thahtu ma hi a!” a ti le, a kari a her le, a tek rawh.

²⁴ Jehu nih a chanhtiang a tha hen a kâu le, Joram rangah a kah le, a kêng ah a lût le, a lung a dingh, Joram chu a kari lakah a thi chawlh.

²⁵ Jehu nih amah ṭangpitu Bidkar sinah, “A ruak kha lâk le, Naboth phâisen ah lawnh. Nangmah hen kari ah kanna chuan le, Joram pa Ahab dunglei ah kan kal liauah Ahab tlûnah LALPA nih a lungsilo thu a sim le,

²⁶ mazân ah Naboth leh a fapa tla an thah na mi ka muh, hi phâisen mun ah hin ka nan rêp lai, ti hen thu ka sim asi a ti mi kha theih ko me,” a ti le; amah Jehu ṭangpitu nih Joram ruak chu a lâk le, Naboth phâisen ah a lawnh rawh. LALPA nih a sim mi thu a tlung khonâk ding hen.

Juda Lalchem Ahaziah Thah Hen A Um

²⁷ Lalchem Ahaziah nih thil a hawng um mi a muh le, a kari hen Beth Hagan khua leiah a tek le, Jehu nih a ṭhâwl. Jehu nih a mi tla sinah, “Anih khawm thah bâk u,” ti hen thu a pêk na. Ibleam khua kiangah Gur kalnâk lampi ah kari lakah a kal liauah Ahaziah chu an liamh. Sikhawmsele, Megido khua tlung ding ko hen a tum le, chunah chun a thi rawh.

²⁸ A mi tla nih a ruak chu Jerusalem ah kari hen an kalpi le, David khuapi ah lal thlân ah an vûi.

²⁹ Ahab fapa Joram Israel lal kum leikhatnâk ah Ahaziah chu Juda lalchem a hawng si.

Lalnu Jezebel Thah A Sinâk

³⁰ Jehu chu Jezreel ah a tleng. Jezebel nih thil umdân tla a theih rawh chun, dul mitcheh â cheh le, a sam tla a riat, a lal in langawtkawt ah a dîr le, lam lian lei a zauh.

³¹ Jehu chu kulh kawtkâ a hawng lût liauah Jezebel nih, “Nang Zimri! Mi thahtu! Zei rangah na hawng?” ti hen a auh.

³² Jehu nih tlûnlei a zauh le, “Kei lei ṭângṭawmtu âu an um?” ti hen a âu. Lal in rianṭuantu panih pathum langawtkawt thawk hen amah lei chawnh hen an bih ko.

³³ Jehu nih an sinah, “Kha nunau kha hawng lawnh u!” a ti. An lawnh le, a thî nih vâm leh rang tla a perh hep. Jehu nih a rang kari hen a ruak chu a chîltir le,

³⁴ Lal in sungah a lût le, buh a ei. Kha siat phurhtu kha va vûi u, lal fanu asi dangâiah,” a ti.

³⁵ Sikhawmsele vûi ding hen kaltu tla nih a luruh, a kut leh a kezaphah cho an muh.

³⁶ Jehu sinah chu thu chu an simh le, anih nih, “Hi hi LALPA nih a to-aw Elija mang hen thu a simkan mi a hawng tlung mi asi.

³⁷ Jezreel ah Jezebel ruak chu ui tla nih an ei lai le, an ei bang chu tual churtirnâk rang cho asi lai, âukhawm nih amah asi ti an theih kholonâk ding hen,” a ti.