2 Lal 7 - Bawm Common Language Bible Version

¹ Elisa nih a sâng le, “LALPA thusim hi ngâi rawh, thâizing tu tik ding ah Samaria khua ah sangvut a ṭha chem mi kilogramme thum mawh, barley kilogramme ruk tangka khat hen châwk kho asi lai,” a ti.

² Lalchem zûlvêltu nih Elisa sinah, “Chu hâwi hen a um kho lai loh, LALPA amah tak nih mawhsareh hen fâng a hawng sûrtir lo chun,” a ti. Chun, Elisa nih, “Thil a hawng tlung mi chu na muh lai le, ei lam chu na ei lai loh,” a ti.

Siria Kawrsen Tla An Tlung Hep

³ Samaria kulh lênglei ah phâr pali um mi tla nih, “Zei rangah thihnâk ngâk hen hinah kan um ko.

⁴ Khuapi sungah va lût khawmsele, zeikhawm a ṭhatvaknâk a um lo, kan lût khawmsele sungvâng hen kan thi ding nget, hinah kan um ko khawm ah kan thi ding fâwn, churuangah Siria tla riakmun ah kan kal ko lai, an duh chun hawng kan thah seh, an duh chun hawng kan zuah na seh,” an ti.

⁵ Churawhchun, a mûi sulsal liauah Siria tla riakmun ah an kal le, an tleng rawh chun pakhat khawm an um lo.

⁶ LALPA nih Siria tla chu kawrsen rualpi kal hâu hâwi hen rang leh kari tla kal hâu hâwi a theihtir na. Churawhchun, Siria tla nih chun Israel lalchem nih Hit mi leh Aigupta lalchem tla kanmah hawng kan do ding hen a sâwm na mi asi lai ti an ruat.

⁷ Churawhchun, zânleibâi ah thi ding ṭih hen an tek phin le, an puanin tla, rang tla, sanatung tla, an riakmun tla a mahmuntê hen an mâk rawh.

⁸ Chu phâr pali tla chu riakmun an tlung rawh chun, puanin sungah an lût le, a um mi zawng an din hen an ei rawh, tangka, ngûn, nipuan an tawng mi zawng chu an lâk le, an thuh, puanin dang tla khawm chu hâwi hen an lût le, an ti.

⁹ Churawhchun, anmah leh anmah anna sâwn le, “Hi hâwi kan ti ding asi lo! Thâwngthâng ṭha tak kan nei mi hi pheh ding asi loh, thâizîng tiang kan um ko chun rêp kan tawng ngelchel lai, kan kal reh lai le, lal rianṭuantu tla kan simh na lai,” an ti.

¹⁰ Siria riakmun chu an kaltâk le, Samaria khua leiah an kîr le, kulh vêngtupa an kawh; “Siria tla riakmun ah kan kal le; âukhawm kan muh na hen kan theih loh, rang leh sanatung tla khawm â rêng lêm lo, puanin tla khawm a mahmuntê an mâk ko,” an ti.

¹¹ Kawtkhâr vêngtu nih chu thâwngthâng chu lal in ah a thanh rawh.

¹² Zân asi rih liauah lal chu a ihkhun ah mi a thawk le, a rianṭuantu tla sinah, “Siria tla thiltum zei asi ti kan simh na lai! Hinah pâmnâk hi an theih ko, churuangah an riakmun an mâk le, mâng ah anna thup hep mi asi lai. An thinlung hen an ruatnâk ah ei ding hâwl hen khuapi hi kan kaltâk chun kanmah khawm a nung bû hen tleih hen khuapi khawm lâk an tum asi lai,” a ti.

¹³ A rianṭuantu lakah pakhat nih, “Hi khuapi mi minung tla hi zeitin tal khawm hen kan vân a duai mi rerêng rawh, a thi chia hâwi ko rawh. Churuangah rang tlûnah to mi minung panga kan fial lai le, chu tikah thil zei hâwi a hawng um mi kan theih kho lai,” a ti.

¹⁴ Churawhchun, minung an thîm na le, Lalchem nih kari panih lakah a chuantir na le, Siria kawrsen tla zei an bangh zauhfiang ding hen a chah na.

¹⁵ Chu minung tla chu Jordan tiang an va kal le, Siria tla an tek liauah an thlâu mi nipuan leh thilthuam lampi tluan hen an tawng; an kîr le, lal sinah an simh.

¹⁶ Samaria khua mi tla chu an kal le, Siria mi tla riakmun chu an thlawk rawh. Churawhchun, LALPA nih a sim mi hâwi hen sangvut a ṭha chem mi kilogramme thum leh barley sang kilogramme ruk chu tangka khat hen an zuar.

¹⁷ Lalchem nih amah zûltu bîk ah a ruat mi chu kulh kawtkâ vêngtu ah a hawng um taktê rawh. A lânah lalchem nih Elisa muh ding hen a kal liauah Elisa nih a sim mi hâwi hen chu kawtkâ vêngtu chu mi zapi nih an lamh le, a thi thlo.

¹⁸ Elisa nih lalchem sinah, “Thâituan tu tik ding ah, sangvut kilogramme thum mawh barley sang kilogramme ruk chu tangka khat hen Samaria khua ah an zuar lai,” a ti liauah,

¹⁹ chu lal zûltupa nih, “Chu hâwi hen a um kho lai loh, LALPA amah ngelchel nih fâng veikhat tal a sûrtir lo chun,” a ti mi kha. Elisa nih a leh le, “Thil a hawng tlung mi chu na muh lai le, sang lam chu na ei lai loh,” a ti mi hâwitê hen a sinah a hawng tlung.

²⁰ Kulh kawtkâ ah mi zapi nih an chîl le, a thi rawh.