2 Lal 5 - Bawm Common Language Bible Version

Naaman Damh Asi nâk

¹ Siria lalchem kawrsen hotu Naaman chu LALPA nih amah mang hen Siria tla nehnâk a pêk ruangah lal nih thungâi hen sunhsak hen a putso. Kawrsen zahkâi tak asi, sikhawmsele phâr vei mi asi.

² Veikhat chu Israel an do na liauah, Siria tla nih nunautê an tleih mi chu Naaman nupi to-aw ah a um.

³ Nikhat chu a pinu sinah, “Ka pu hi Samaria ram ah a um mi khuavâng sinah kalpi sele thungâi ka duhpi! Anih nih a râi hi a damtir kho lai,” a ti.

⁴ Naaman nih chu thu a theih rawh chun nunau ngâksiatê thusim chu lal va simh ding hen a va kal.

⁵ Lalchem nih, “Israel lalchem sinah hi lasui hi put le, va kal rawh,” a ti. Naaman nih tangka sîng thum, ngûn sângruk leh nipuan ṭha parâ a put le, a kal rawh.

⁶ Lasuikuat chu lalchem nih a lâk le, a rêl, “Hi lasui hi ka minung Naaman theihtirnâk asi le, a râi hi na damh piak ding hen ka nan ngiar,” a ti.

⁷ Israel lalchem nih chu lasuikuat chu a rêl rawh chun a lawksawng le, a nipuan tla a thlêk, “Zei zia Siria Lalchem nih hi minung hi damh kho ding hen hawng ka ruat zia? Nunh khotu leh thah khotu Pathian ma hawng ka ruat? kan kar lakah remlonâk a tum mi mahi!” a ti.

⁸ Khuavâng Elisa nih chu thu chu a theih rawh chun, lalchem sinah thu a chah, “Zei rangah kha hâwi hen na lawksawng? Kha minung kha ka sinah hawng fial, Israel ram ah khuavâng a um ti ka zauhtir lai,” a ti.

⁹ Naaman chu a rang kari tla hen a vâ kal le, Elisa umnâk tualmâi ah a va a dîn.

¹⁰ Elisa nih a to-aw sinah, “Va suak le, Naaman sinah, Jordan Va ah vei sarih tak va khawlh sele a dam ko lai a nan ti,” ti hen a simh.

¹¹ Naaman chu a thinthawk bû hen a kal le, “A suak tal hawng suak sele, LALPA a Pathian sinah thlacham hen a kut ka mâ tlûnah thâng hen hawng ka damh ding ka ruat mi!

¹² Israel ram mi ngâk hen tiva ṭha dauh mi Damaska ah Abana tiva leh Pharpar tiva tla lakah tak khawlh hen ka dam kho lo ma?” a ti.

¹³ A to-aw tla nih Naaman sinah “Pu, khuavâng nih thil tam tak har an simh khawmsele na ti ding asi. Zei rangah damnâk ding a ti mi chu na khawlh awtlo le?” an ti

¹⁴ Churawhchun, Jordan Va ah a va kal le, vei sarih a va a nîm le, Elisa nih a sim mi hâwitê hen a phâr chu a dam ziar. A vun tla chu a hawng a remh le, ngâksia vun hâwitê hen a no.

¹⁵ Elisa sinah a minung tla zawng hen a va kîr nawlh le, a sinah, “Tu chun Israel Pathian cho lo chu zei Pathian khawm a um lo ti ka theih rawh, churuangah chun zângfahtê hen, Pu, lâwmman ka nan pêk mi hi hawng ka lâk piak,” â ti.

¹⁶ Elisa nih a sâng le, “LALPA, a nung mi a rian ka ṭuan mi min sâl hen ka sim asi, lâwmman rerêng ka lak awtlo,” a ti. Naaman nih lâk ding ko hen a ngiar le, sikhawmsele, a duh lo.

¹⁷ Naaman nih a sinah, “Ka lâwmman na duh lo asi chun, sanatung panih phurh valei hawng ka phurhtir, tu thawk hen duah mi thil ap mawh bawlnâk âu sin khawm ka ap awtlo rawh,” a ti.

¹⁸ Siria pathian, Rimmon biakin ah sawnh ding hen lal hen kan va kal mi khawm LALPA nih hawng ka ngaihdam lai ti ka ruat. LALPA nih hawng ka ngaihdam ngelchel lai!” a ti.

¹⁹ Elisa nih a sinah, “Thlangam tak hen kal rawh,” a ti le, Naaman chu a kal rawh. Tam a kal lo rih,

²⁰ Elisa to-aw Gehazi nih a thinlung hen, “Ka pu nih Naaman thilpêk a duh lo, a khirh thlo, Siria mi lâwmman pêk chu hei lâk ko ding mi, LALPA a nung mi min hen ka va ṭhâwl lai le, zeimaw zat ka lâk awt,” a ti.

²¹ Churawhchun, Naaman chu a ṭhâwl rawh. Naaman nih a dunglei ah minung a hawng tek mi chu a muh rawh chun, a kari thawk hen a ṭum le, “Zei me a pâwi mi ma a um?” ti hen a deih.

²² Gehazi nih a sâng le, “A pawi mi a um lêm loh, sikhawmsele, ka pu nih, Efraim tlâng ram thawk hen khuavâng murui lakah mi panih tuko ah an hawng tlung le, tangka sâng thum leh nipuan thleng panih pêk na ding mi ruangah an simh ding hen hawng ka fial,” a ti.

²³ Naaman nih, “Zângfahtê hen tangka chu sâng ruk hen lâk ko me,” a ti. Churawhchun, a sim mi hâwi hen tangka sâwngkhâwi panih ah a sâwm le a pêk, nipuan thleng ṭha tak mi khawm a to-aw a puttir na le, Gehazi mâilei ah â fial na.

²⁴ Gehazi nih tangka sâwngkhâwi nih chu a lâk le, in sungah a lûtpi. Naaman to-aw tla chu a kîrtir na rawh.

²⁵ In sungah a lût rawh chun Elisa nih thu a deih, “Zeiah me na um lak?” a ti. Anih nih a sâng le, “Pu, zeikhawm ka kal lo, ka um ko,” a ti.

²⁶ Sikhawmsele, Elisa nih, “Naaman, a kari thawk hen nangmah hen tawng ding hen a ṭum liauah thlarau hen ka um bâk ko asi lo ma? Tuhun hi tangka, puan, oliv thing tla, grep zûn tla, dawrâ, ranrual, to-awnu leh to-awpa lâk tik asi lo.

²⁷ Tuah Naaman phârnâk chu na lakah a hawng tlung lai, nang leh na thlâk tla nih nan nei pawt lai rawh!” a ti. Churawhchun, Gehazi chu a kal le, râi a vei chawlh le, a vun chu vûr hâwi hen a ngo rawh.