2 Lal 4 - Bawm Common Language Bible Version

Elisa Nih Numei Pâm A Ṭangpi Mi

¹ Khuavâng murui lakah mi numei pakhat chu Elisa sinah a va kal le, a sinah, “Pu, ka pasal chu a thi rawh, na theih rawh hâwi hen anih chu Pathian ṭih mi asi le, sikhawmsele, lei a batnâk ruangah mi nih ka fapa panih hi lei ruangrûl ah sal ah an ruai awt,” a ti.

² Elisa nih, “Na rangah zei kan ti piak lai, hawng sim? Na in ah zei na nei?” a ti. Anih nih a sâng le, “Zeikhawm ka nei lo, oliv sariak dûrtê pakhat cho ka nei,” a ti.

³ Elisa nih, “Na inpa na zâwlbâwm sinah va kal le, dûr karo na tawng kho rirî va lâng le,

⁴ churawhchun, nang leh na fapa tla hen in sungah lût ule, inkhâr pang u, dûr sungah sariak chu tleng ule, a khat mi zawng chu a dang hen siah vima,” ti hen a simh.

⁵ Churawhchun, nunau chu a fapa tla hen in sungah an lût le, in an khâr le, oliv dûr chu an lâk le, dûr lakah an tleng le, a fapa tla nih dûr dang an hawng pêk vima.

⁶ Dûr zawzawng chu an hawng khah ver nûnah an nu nih, “Dûr dang a um rih ma?” ti hen a deih na. A fapa lak mi pakhat nih, “Kha kha a dawnghnâk asi rawh,” ti hen a sâng. Sariak chu a dih rawh.

⁷ Elisa khuavâng sinah a va kal nawlh le, anih nih, “Oliv sariak kha zuar ule, nan lei zawzawng rulh ule, a lei mi chu nang leh na fapa tla rangah â tâwk rerêng lai,” a ti.

Elisa Leh Shunem Khua Mi Nunau Minei Tak

⁸ Ni khat chu Elisa, Shunem khua nunau nei tak umnâk ah a va kal le, chu nunau nih buh ei ding a sâwm. Shunem khua ah a kal kip ah Elisa chu chu nunau in ah buh-an a ei tâwn.

⁹ Chu nunau nih chun a pasal sinah, “Hi minung hinah a hawng kumza mi hi Pathian mi thenhlimh asi ti ka theih.

¹⁰ In tlûnlei khin kardangtê kan siam lai le, ihkhun, dawhkân, tophah, khâwnvâr tla kan siah lai le, hawng kan pal kip ah chunah chun a um khonâk ding hen,” a ti.

¹¹ Nikhat chu Elisa chu Shunem khua ah a kîr le, a umnâk in kardang ah va a dîn ding hen a kal.

¹² A to-aw Gehazi sinah, “In dâwngpinu kha va kawh,” a ti. A hawng rawh chun,

¹³ Elisa nih Gehazi sinah, “Kan rangah thil herh zeizawng hawng kan ti piak mi ruangah â nawk mi, ka ti piak kho ding hen zei a duh deih nik. Lalchem sinah thusim piak ding hen mawh asi lo leh kawrsen hotu sinah va kal hen a rangah thu ṭha va sim piak ding hen hawng ka duh dahmawh,” a ti. Nunau nih a sâng le, “Hinah ka mi leh tla sinah ka herh mi thil zawng chu ka nei hep,” a ti.

¹⁴ Elisa nih Gehazi sinah, “Asi chun, a rangah zei ka ti piak lai rawh ne?” a ti. Gehazi nih, “Ngâiah, fapa a nei lo thlo, a pasal khawm a tar thlo rawh,” a ti.

¹⁵ Elisa nih, “Hinah hawng ding hen va simh,” a ti. Nunau chu a hawng le, kawtkâ kiangah a dîr le,

¹⁶ Elisa nih, “kum vei tutik ding ah na kut hen fapa na pawm lai,” a ti. Nunau nih chun, “Pu, nang Pathian mi, ka sinah âwkrâwl thu sim lah ko!” a ti.

¹⁷ Sikhawmsele Elisa nih a sim hâwi tik takah fapa a nei rawh.

¹⁸ Kum zeimaw zat nûnah fângzûn liau chirah zîng khat chu mipa ngâksiatê nih chun phâisen ah a pa fângâtnâk ah a va ât bâk.

¹⁹ Lâkkhatko ah a pa a auh le, “Ka lû a fâk! ka lû a fâk!” a ti. A pa nih a to-aw sinah, “A nu sinah va kalpi,” a ti.

²⁰ To-aw nih a nu sinah a tlungpi le, nî sûn tiang a êl tlûnah a pawm le, chu liau chir chun a thi rawh.

²¹ A nu nih Elisa umnâk kardang sungah a kalpi, a ihkhun tlûnah a siah, a kaltâk le in a khâr pang.

²² Churawhchun, a pasal a kawh le, a sinah, “To-aw kha sanatung hawng put ding hen hawng fial. Khuavâng Elisa sinah kal ding ka herh, a rang kho zia zia hen ka hawng kîr nawlh lai,” a ti.

²³ A pasal nih, “Zei rangah tusûn ni ngelchel ah na kal awt Thla Thar kût leh Sabbath ni khawm asi lêm lo mi,” a ti.

²⁴ Anih nih, “A pawi loh,” a ti. Churawhchun, sanatung tlûnah â chuan le, a to-aw sinah, “Sanatung kha a chak kho rirî hen kaltir, fûmtir lah, keimah nih ka nan simh lo chun,” ti hen thu a pêk.

²⁵ Churawhchun, a suak le, Karmel Tlâng leiah Elisa umnâk ah a va kal rawh. Elisa nih lât vat thawk hen a hawng mi a muh le, a to-aw Gehazi sinah, “Zauhnik Shunem khua thawk hen nunau a hawng kal mi khi!

²⁶ A sinah va kal phêt le, a fapa leh a pasal tla dam hen an um ma? Va deihfiang nik,” a ti. Nunau nih chun Gehazi rangah, “Thil zeizawng a tluang hen kan dam tlâng rih,” a ti.

²⁷ Sikhawmsele Elisa sinah a va kal le, a kûn le, a kezaphah a tleih. Gehazi nih kiang ding hen a tul le, sikhawmsele Elisa nih, “Zauh ziar rih, a lawksawng thlo mi hi na muh lo ma? LALPA khawm nih zei thu khawm hawng ka simh lo rih,” a ti.

²⁸ Nunau nih Elisa sinah, “Pu, fapa ka nan deih mazei? Ka lungumnâk chiam siam lah ka nan ti lo mazei?” a ti.

²⁹ Elisa chu Gehazi leiah â hawi le, “Khulrang hen ka ṭhianṭhunh kha put le va kal, lampi ah minung na tawng khawm ah chibai bûk ding hen a dîn lah le, mi âutal nih chibai an bûk khawmsele leh na sâng ding hen a dîn lah, in leiah kal phêt le, ṭhianṭhunh hi ngâksia tlûnah thâng,” a ti.

³⁰ Nunau nih Elisa sinah, “LALPA, a nung mi sinah leh nangmah sinah zumhkâi hen ka umnâk min sâl hen ka sim asi, kan kaltâk ding asi lo,” a ti. Churawhchun, an panih hen kîr ding hen anna thawh rawh.

³¹ Gehazi chu anmah lanh hen a va kal le, Elisa ṭhianṭhunh chu ngâksia tlûnah a siah le, sikhawmsele hâu khawm a suah lo, a thaw khawm a suah lo. Churawhchun, Elisa sinah va tawng ding hen a kîr le, a sinah, “Ngâksia chu zeikhawm a theih loh,” a ti.

³² Elisa chu a va tleng rawh chun, insung kardang ah amah lâwng hen a lût le, ngâksia a thi mi ihkhun tlûnah an zâutir mi chu a muh.

³³ In a khâr le, LALPA sinah thla a cham.

³⁴ Ngâksia chu a bawk nawh le, ngâksia kâ leh a kâ, ngâksia mit leh a mit, ngâksia kut leh a kut a tawnh le, ngâksia tlûnah a bawk mi a ruang a zangh le, ngâksia tak chu a hawng lum rawh.

³⁵ Elisa chu a thawk le, in kardang sungah â zî le, ngâksia tlûnah chun a ruang a va zangh fâwn, ngâksia chu vei sarih a hatthiau le, a mit a meng rawh.

³⁶ Elisa nih Gehazi rangah a nu va kawh ding hen a simh. Churawhchun, a nu chu a va lût le, Elisa nih a sinah, “Na fapa hi,” a ti.

³⁷ Ngâksia nu chu Elisa kê kiangah a mêl tual tawngh khet hen a kûn le; churawhchun a fapa a pawm le, a kal rawh.

Thilchê Dang Panih

³⁸ Veikhat chu ram pumpi ah pâm a tlung le, Elisa chu Gilgal leiah a va kîr. Elisa nih khuavâng murui a sîntir na liauah, a to-aw rangah bêlpi hen zeimawh a suangtir.

³⁹ Chun, minung pakhat phâisen ah an rah zei zeimawh lâk ding hen a va kal le, mâng mi rizûn neh leh nehlo hen a lâk. A chan dip le a chiar, zei asi ti khawm a thei lo.

⁴⁰ Chu chiar mi chu ei ding hen an sâwk le, an hawng tem rawh chun, “Thihnâk tûr mahi,” an ti le, an ei kho lo.

⁴¹ Elisa nih, “Sangvut hawng put u,” a ti le, chu sangvut chu bêl ah a phulh le, “Tuah cherkhet hen sâwk piak na rawh,” a ti. Churawhchun, zeikhawm ṭih ding a um lo rawh.

⁴² Hun dangah minung pakhat Baal Salisah thawk hen a hawng le, Elisa rangah sangtlêp kul, fathar ât masa chem mi hen siam mi leh fâng a vûi masa chem mi a hawng put. Elisa nih a to-aw sinah, “Khuavâng murui rangah hi hi ei ding hen pêk na,” a ti.

⁴³ Sikhawmsele, a to-aw nih a sâng le, “Hi hi minung zâ ei ding a tam tâwk ding hen ma na ruat?” a ti. Elisa nih a sâng le, “Ei ding hen pêk na ko, LALPA nih, an ei lai le, a leizut lai, a ti,” ti hen.

⁴⁴ Churawhchun, to-aw nih buh chu a hunh na le, LALPA nih a sim mi hâwi hen, an ektê hen an ei thluh nûnah a lei nget rih.