2 Lal 3 - Bawm Common Language Bible Version

Moab Leh Israel Anna Do

¹ Juda lalchem Jehosaphat nih lâi a rêl mi a kum leiriatnâk ah Israel lalchem Ahab fapa Joram chu a lal le, Samaria ah kum leinih lâi a rêl.

² LALPA lakah thilsual a ti le, sikhawmsele, a nu leh a pa mawh a nu Jezebel hâwi ngâi chu asi lo. A pa nih Baal sawnhnâk a siam mi a râwk.

³ Sikhawmsele amah lânah mi Nebat fapa lalchem Jeroboam hâwi hen Israel tla thilsual a titir na le, a bâng duh lo thlo.

⁴ Moab lalchem Mesa chu dawrâ vulhtu asi le, kum siar hen Israel lalchem sinah siah châwi mi rang chanah dawrâ nuai khat leh a mul a pêk kumza.

⁵ Israel lalchem Ahab a thi rawh chun Mesa chu Israel tlûnah a hel rawh.

⁶ Lalchem Joram nih Samaria a suaktâk sawm le, a kawrsen zawzawng a pumh na.

⁷ Juda lalchem Jehosaphat sinah thu a chah, “Moab lalchem kan tlûnah a hel le, amah va do ding hen hawng kan bawppi lai ma?” a ti. Lalchem Jehosaphat nih a sâng le, “Bawmh lai ta a, kei chu nangmah thu ko, ka mi tla leh ka rang tla khawm.

⁸ “Zei leikâng lampi me va do na ding hen kan kal lai?” a ti. Joram nih a sâng le, “Edom ramkaro lampi leikângah kal a suak lai,” a ti.

⁹ Churawhchun, lalchem Joram, Juda leh Edom lalchem tla chu an suak rawh. Ni sarih an kal rawh chun tî din ding an nei lo le, an minung tla leh ran tla rangah a um lo rawh.

¹⁰ Lalchem Joram nih, “Kan nih lal pathum tla hi LALPA nih Moab lal kut ah hawng kan pêk mi asi ko rawh ma hi!” a ti.

¹¹ Lalchem Jehosaphat nih, “Hinah hin LALPA sinah thu deih ding hen khuavâng a um lo menmaw?” a ti. Lalchem Joram hotu nih a sâng le, “Elija ṭangpitu, Saphat fapa Elisa chu hinah a um ko,” a ti.

¹² Lalchem Jehosaphat nih, “Khuavâng dik tak asi,” a ti. Churawhchun, lalchem pathum chu Elisa sinah an va kal rawh.

¹³ Chun, Elisa nih Israel lalchem sinah, “Zei rangah nang rangah kan ṭangpi lai, na nu leh na pa nih thu an deih na tâwn mi khuavâng tla sinah va kal le, thu va deih ko,” a ti. Joram nih a sâng le, “Silo! Kannih lalchem pathum tla hi Moab kut ah hawng kan pêktu chu LALPA asi,” a ti.

¹⁴ Elisa nih a sâng le, “LALPA, a nung mi a rian ka ṭuan mi min sâl hen ka sim asi, Juda lalchem Jehosaphat nan bawp mipa hen kan na rem lo rawh asi chun, nannih sin khawm zeikhawm ka ti awtlo.

¹⁵ Tuah ṭingṭang tum thiam hawng ka kawh piak u,” a ti. Ṭingṭang tumtupa nih ṭingṭang a tum rawh chun, LALPA thiltikhonâk chu Elisa tlûnah a hawng tlung le,

¹⁶ “Hi hi LALPA thusim chu asi: Hi tikang va hi mun kip ah chawh u,

¹⁷ thli leh ruah muhlo khawm ule, hi tiva hi tî hen a hawng khat lai le, nanmah leh nan ranrual tla nih din ding tam tak nan nei lai,” a ti.

¹⁸ Elisa nih thu a sim vima, “Sikhawmsele, hi hi LALPA rang chun thilti awl tak asi. Moab tla khawm an nehtir na lai.

¹⁹ Kulhnei mi an khuapi dawh tak tla chu nan neh lai le, an thei kûng a rah mi tla chu nan hâu lai le, an tikhur tla nan râwk lai le, an phâisen tla nan râwk lai le, a tlûnah lung nan pawng lai,” a ti.

²⁰ Zînglei bâwlnâk ap cham, a thâizîng ah, Edom ram mun kip thawk hen tî a hawng luang le, tual chu tî a hawng khat rawh.

²¹ Moab mi tla nih lalchem pathum anmah do ding hen an hawng mi thu an theih rawh chun, riamnâm put khotu ding mi zawzawng, a upa thawk hen a ngâksia chem tiang ramri ah anna pûm hep.

²² A thâituan zîng ah an hawng thawk le, tî chu nî nih a cherh le, an zauh le, thî hâwi hen a sen kur.

²³ “Thisen ma khi! Kan mêlma lalchem pathum anmah leh anmah anna thah mi asi lai! An umnâk mun kan va zauhnik lai,” an ti.

²⁴ Israel riaknâk mun an va tlung rawh chun, annih nih an hawng do na le, an dunglei ah an khirh na. Israel tla nih an ṭhâwl na le, Moab mi tla chu an thah na le, an khuapi tla an râwk.

²⁵ Kalnâk ah mi phâisen ṭha tla chu Israel tla nih lung an lawnh nawh le, phâisen zawzawng chu hâwi hep an ti le, an tikhur tla chu an silh le, an theikûng rah mi tla an hâu. A dawnghnâk ah chun Kir Heres khuapi cho a um le, chanhtiang kahtu tla nih an hual dak le, an do.

²⁶ Moab lalchem nih râltuk chu neh kho ding â zûm lo rawh le, a kawrsen, nâmsâu mangtu tla zasarih a put na le, Siria lalchem sinah tek ding hen lampi a tâwntir na, sikhawmsele, a ti kho lo.

²⁷ Churawhchun, a fapa upachem, amah ruangrûl ah lal ding mi chu Moab pathian sinah khuapi tlûnah bâwlnâk ah a ap. Israel tla chu an lâu le, anna nâwp le, an ram leiah an kîr rawh.