2 Lal 2 - Bawm Common Language Bible Version

Elija Chu Chung Vân Ah Lâk Hen A Um

¹ LALPA nih Elija chu thli â zî mi lakah lâk ding a hun a tlung rawh. Elija leh Elisa chu Gilgal thawk hen an suak le,

² lampi ah Elija nih Elisa sinah, “Tuah hinah hin um le, LALPA nih Bethel ah kal ding hawng ka fial” a ti. Sikhawmsele Elisa nih a sâng le, “LALPA a nung mi leh na sinah zumhkâi tak hen ka um mi min hen ka sim asi, ka nan kaltâk lai loh,” a ti. Churawhchun, Bethel ah an panih hen an va kal.

³ Khuavâng rual chunah um mi tla chu Elisa sinah, “Tusûn ah LALPA nih na hotupa na sinah mi hi a lâk awt mi na theih ma?” an ti. Elisa nih a sâng le, “Ka theih ta a, sikhawmsele, chu thu chu kan sim lai loh,” a ti na.

⁴ Churawhchun, Elija nih Elisa sinah, “Tuah hinah um le, LALPA nih Jeriko ah kal ding hen hawng ka fial,” a ti. Sikhawmsele, Elisa nih, “LALPA, a nung mi lakah zumhkâi tak hen ka um mi min hen na sinah thu ka sim asi, ka nan kaltâk lai loh,” a ti. Churawhchun, Jeriko ah an va kal.

⁵ Chunah khuavâng um mi tla chu Elisa sinah an va kal le, a sinah, “Tusûn ah LALPA nih na hotupa na sinah mi hi a lâk awt ti na theih ma?” an ti. Elisa nih a sâng le, “Ka theih ta a, sikhawmsele, hi thu chu kan sim lai loh,” a ti na.

⁶ Churawhchun, Elija nih Elisa sinah, “Hinah hin um le, LALPA nih Jordan Va leiah kal ding hen hawng ka fial,” a ti. Sikhawmsele Elisa nih a sâng le, “LALPA a nung mi min hen leh na sinah zumhkâi tak hen ka um mi min hen ka sim asi, ka nan kaltâk lai loh,” a ti.

⁷ Churawhchun, Jordan Va leiah an kal le, khuavâng sâwmnga nih an zûl na. Elija leh Elisa chu tiva kapah anna dîn le, khuavâng sâwmnga tla chu tâwm lât dauh ah an dîr.

⁸ Churawhchun, Elija nih a kawrfual chu a lît le, a zual le, chu hen chun tî a vuak le, tî chu â ṭhek phawk, amah leh Elisa chu tual hul lakah kal hen varâl leiah an tan.

⁹ Chunah chun, Elija nih Elisa sinah, “Lâk hen ka um lânah, zei me an ti piak sele na duh, hawng ka simh,” a ti. Elisa nih, “Nangmah ruangrûl ah um ding hen na thiltikhonâk hawng ka tingtir bâk,” a ti.

¹⁰ Elija nih a sâng le, “Sâng ding mi thil ngiar har tak ma chu,” a ti. “Sikhawmsele, na sînah mi lâk hen ka um liauah na ka muh chun na ting lai, na ka muh lo lam chun na ting lai loh,” a ti.

¹¹ Chu hâwi hen kal pah hen anna sâwn lemang liau chun, lâkkhatko ah mei rang kari chu anna karah a hawng a tenh thap le, thli â zî mi nih Elija chu vân leiah a lâk ving.

¹² Elisa nih a muh le, churawhchun Elija rangah a auh, “Ka Pa, Ka Pa! Israel vêngtu chak! Na kal ving ko a!” a ti. Elija chu a muh pawt lo rawh. Elisa nih a ngaihsia tuk le, a kawrfual a thlêk le, lâp nih hen a suah.

¹³ Churawhchun, Elija kawrdawh a hawng thlâk mi chu a sar le, a kîr nawlh le, Jordan vakap ah a dîr.

¹⁴ Elija kawrfual hen tî chu a vuak le, “LALPA, Elija Pathian chu zeiah me a um?” a ti. Churawhchun, tî chu a vuak nawlh le, â ṭhen le, varâl leiah a tan rawh.

¹⁵ Jeriko khua mi khuavâng sâwmnga tla nih Elisa chu an muh le, “Elija thiltikhonâk chu Elisa sinah a um ving rawh,” an ti. Amah va tawng ding hen an kal le, mâi an mûk.

¹⁶ Annih nih, “Hinah minung sâwmnga kan um, kan ektê hen mi chak hep kan si, na hotupa kan va hâwl lai. LALPA thlarau nih a kalpi ving hen zei tlâng tlûnah mawh tivakuam ah mawh a va siah ko dahmawh,” an ti. Elisa nih a sâng le, “Siah lai loh, kal khawm kal lah u,” a ti na.

¹⁷ Sikhawmsele, a kaltir na lânlo chu, an ngiar êu le, minung sâwmnga an ektê hen tlâng tlûnlei leh tanglei tla Elija rangah ni thum an hâwl le, an tawng lo.

¹⁸ Churawhchun, Elisa, Jeriko ah a um mi sinah an va kîr le, anih nih an sinah, “Kal lah u, kan ti na asi lo ma?” a ti.

Elisa Nih Thilchê A Tinâk

¹⁹ Jeriko khua ah mi zeimaw mi tla chu Elisa sinah an va kal le, a sinah, “Pu, na theih rawh hâwi hen hi hi khuapi ṭha tak asi, sikhawmsele, tî a ṭhalo le, nausiatnâk a umtir,” an ti.

²⁰ Anih nih, “Khêng thar lakah chitê siah ule, ka sinah hawng put u,” a ti na.

²¹ A sinah an hawng put le, tiva ah a va kal le, chitê chu tî lakah a lawnh le, “Hi hi LALPA thusim asi: Hi ti hi ka thiangtir rawh, thihnâk leh nausiatnâk a umtir lai lo rawh,” a ti.

²² Churawhchun, chu thawk hen chun Elisa nih a sim mi hâwi hen a thiang rawh.

²³ Elisa chu Jeriko a mâk le, Bethel ah a va kal, lampi ah khuapi ah mi mipa ngâksia tla an hawng le, an nihsanh, “Nang lukâwngpa, suak ving,” ti hen an âu.

²⁴ Elisa chu â her le, a mit sen hen a zauh na le, LALPA min hen siat a barh na. Churawhchun, vawm nunau panih tumun thawk hen an hawng suak le, mipa ngâksia murui lakah mi sâwmli leh panih an sâm dip na.

²⁵ Elisa chu Karmel Tlângah a va kal le, chu thawk hen Samaria leiah a kîr rawh.